Panyuma pa 4026 B.C.E.

“Lijoka” lyakayichile yakuti Yehofa ali jwakuŵajilwa kulamulila soni lyakayichile kalamulile kakwe. Yehofa jwasasile kuti chachitendekasya kuti papagwe “mwanache,” kapena kuti “mbeju,” jwele pambesi pakwe chachimjonanga Satana. (Genesesi 3:1-5, 15, maloŵe gamwiŵanda) Nambope Yehofa akundile kuti papite ndaŵi ŵandu ali mkulilamulila jika mwakulongoleledwa ni lijokalyo.

1943 B.C.E.

Yehofa ŵamsalile Abulahamu kuti “mwanache” juŵamsasile kuti chachipagwa, chachiŵa jumo mwa yisukulu yakwe.—Genesesi 22:18.

Panyuma pa 1070 B.C.E.

Yehofa ŵamsimichisye Mwenye Daudi, kaneko mwanache jwakwe Solomoni kuti “mwanache” juŵamsasile kuti chachipagwa chachityochela mu msela wa liŵasa lyawo.—2 Samuyele 7:12, 16; 1 Ayimwene 9:3-5; Yesaya 9:6, 7.

29 C.E.

Yehofa akusala kuti Yesu ali “mwanache” juŵamsasile kuti chachipagwa, jwele juchachijigala mpando waumwenye wa Daudi.—Agalatiya 3:16; Luka 1:31-33; 3:21, 22.

 33 C.E.

Lijoka, lyalikwimila Satana, lyatendekasisye kuti Yesu awulajidwe, yayaliji mpela kumwulasya “mwanache” kwa ndaŵi jamnono. Yehofa ŵamjimwisye Yesu mwamti jwapite kwinani. Kweleko Mlungu ŵajitichisye mbopesi ja umi wakwe wamlama mpela malipilo gakuti ŵanache ŵa Adamu ŵakululuchile yakulemwa yawo ni kwapa upile wakutama ni umi wangamala.—Genesesi 3:15; Masengo 2:32-36; 1 Akolinto 15:21, 22.

Cha m’ma 1914 C.E.

Yesu akuliponya pachilambo chapasi lijoka, jwali Satana. Kaneko akumtaŵa Satanajo kwakandaŵi kamnono.—Chiwunukuko 12:7-9, 12.

Msogolo

Yesu akumwugalila Satana mundende kwa yaka 1,000. Pambesi pakwe akumjonanga jwalakwe, yayikwimila kukasanya mtwe wa lijoka. Panyuma pakwe chakulinga chaŵakwete Yehofa pandanda chakwamba chilambo chapasi soni ŵandu chikukwanilichikwa, lina lyakwe likuswejesyedwa soni kalamulile kakwe kakuwonechela kuŵa kambone mnope.—Chiwunukuko 20:1-3, 10; 21:3, 4.