CHIWUSYO 6
Ana Baibulo Jasasile Kala Yindu Yapi Yakwamba Mesiya?
YAKULOCHESYA
“Mmwe Betelehemu Efulata, . . . mwa mmwejo muchikopoka mundu juchachiŵa jwakulamulila jwa Ayisalayeli.”
KUKWANILICHIKWA KWAKWE
“Yesu ali apagwile ku Betelehemu mu chigawo cha Yudeya m’masiku ga Mwenye Helodi, ŵakulupilila ndondwa ŵakutyochela Kungopokolyuŵa ŵayiche ku Yelusalemu.”
YAKULOCHESYA
“Jemanjaji akugaŵana yakuwala yangu pasikati pawo, soni akutenda kalotalota pa chakuwala changu.”
KUKWANILICHIKWA KWAKWE
“Sambano asilikali ŵala paŵamkomele Yesu pachitela, ŵajigele yakuwala yakwe yakusa ni kuyigaŵa mbali mcheche . . . Malaja gamkati ŵagapanganyisye ni nguwo jimpepe soni galiji gangatota palipose, kutandila kwinani mpaka pasi. Myoyo jemanjajo ŵatandite kukambilana kuti, ‘Malaja gelega tukagapapula, nambo tugambe kutenda kalotalota kuti tumanyilile jwachajigale.’”
YAKULOCHESYA
“Mlungu akusagachenjela mawupa gosope ga mundu jweleju. Pangali liwupa atamose limo lyalichitemanguka.”
KUKWANILICHIKWA KWAKWE
“Paŵayiche pa Yesu, ŵamsimene ali awile kala, myoyo nganatemangula ngongolo syakwe.”
YAKULOCHESYA
“Jwalakwe ŵamsomile ligongo lya yakulemwa yetu.”
KUKWANILICHIKWA KWAKWE
“Msilikali jwine ŵamsomile jwalakwejo mumbalati ni lipanga, mwamti ndaŵi jijojo pakopweche myasi ni mesi.”
YAKULOCHESYA
“Jemanjajo ŵambele malipilo gangu. Ŵambele mbiya syasilifa syakwana 30.”
KUKWANILICHIKWA KWAKWE
“Kaneko jumo mwa ŵakulijiganya ŵakwe 12 ŵala, jwakolanjidwa Yudasi Isikaliyoti, jwapite kwa ŵakulolela ŵakutaga mbopesi ni kwawusya kuti, ‘Ana chachimba chichi naga ngumpeleka jwalakwejo kwa jemanja?’ Jemanjajo ŵakamulene kuti chachimpa mbiya 30 syasilifa.”
