“Buku ja Chilamusiji jikatyokaga pakamwa penu. Mjiŵalanjeje soni mganichisyeje yayili mwelemu musi ni chilo ni chakulinga chakuti mkuyeje mwakusamala yosope yayili m’bukuji. Naga mkutenda yeleyi yindu yichimjendela chenene paumi wenu soni chimchitendaga yindu mwalunda.”

Yoswa 1:8

“Jemanjaji ŵapitilisye kuŵalanga mwakwesya maloŵe m’bukujo. Ŵaŵalangaga Chilamusi cha Mlungu jusyesyene ni kulondesyaga mwakupikanika chenene soni ŵagopolelaga ŵandu Chilamusicho. Yeleyi yakamuchisye ŵanduwo kuti apikanichisye yayaŵalanjidwagayo.”

Nehemiya 8:8

“Jwakusangalala ali mundu jwangajenda mwakuya yindu yakusamsalila ŵandu ŵakusakala. . . .  Nambo jwalakwe akusachinonyela mnope chilamusi cha Yehofa. Akusachiŵalanga ni kuchiganichisyaga chilamusicho musi ni chilo. . . . Yiliyose yakutenda yichimjendelaga chenene.”

Salimo 1:1-3

“Filipo ŵaliwutuchile ligaletalyo ni kwendaga mumbali mwakwe. Kaneko ŵajipikene ndunajo jili mkuŵalanga mpukutu wa jwakulochesya Yesaya, ni ŵajiwusisye kuti, ‘Ana akuyipikanichisya yakuŵalangayo?’ Ndunajo jajanjile kuti, ‘Ana mpaka mbikanichisye uli pali pangali mundu jwakungopolela?’”

Masengo 8:30, 31

 “Ndamo sya Mlungu syangawoneka ni meso sikusawonechela chenene mu yindu yaŵapanganyisye, soni m’weji mpaka tumanyilile mwaŵelele jwalakwejo patukulola yindu yaŵapanganyisyeyo. Yindu yeleyi yikusalosya machili gakwe gangamala soni yikusasimichisya kuti jwalakwejo ali Mlungu mwamti ŵanduwo ŵangalisoni ligongo lyakukanila.”

Aloma 1:20

“Mganichisyeje mnope yindu yeleyi soni mlipelecheje mnope pakuyitenda yindu yeleyi kuti kwawula kwenu pasogolo kuwonechele kwa ŵandu wosope.”

1 Timoteyo 4:15

“Kwende tuganichisyaneje soni tulimbikasyaneje ni chakulinga chakuti tukomboleje kunonyelana soni kutenda yambone. Kwende tukaleka kusongana pampepe.”

Ahebeli 10:24, 25

“Naga jwine lunda lukumpelembela, amŵendeje Mlungu, mwamti chachimpa, pakuŵa Mlungujo akusapeleka mwakoloŵa makono kwa wosope, soni akusapeleka kwa mundu mwangamnyosya.”

Yakobo 1:5