Baibulo jili maloŵe ga Mlungu gagalembedwe kuti aŵechetaneje ni ŵandu wosope. Tukusasosekwa kulijiganya buku jeleji kuti tummanyilile chenene juŵajilembile. (Yohane 17:3; 2 Timoteyo 3:16) M’bukuji, Yehofa Mlungu ŵasasile chakulinga chakwe pa ŵandu soni chakulinga chakwe pakwamba ya chilambo chapasi, kwakuli kumangwawo ŵanduwo.—Genesesi 3:15; Chiwunukuko 21:3, 4.

Pangalisoni buku jine jajikusakamuchisya ŵandu kuchenga umi wawo kupunda Baibulo. Baibulo jikusatukamuchisya kuti tukomboleje kusyasya ndamo syambone sya Yehofa mpela chinonyelo, umbone mtima soni kwatendela ŵane chanasa. Baibulo jikusakamuchisya ŵandu kuti akajasa mtima. Yeleyi yikusiyakamuchisya ŵanduwo kuti apilileje yakusawusya yakusasimana nayo atamose yiŵe yekulungwa chamtuli. Jikusatukamuchisyasoni kumanyilila yakutendekwa ya m’chilambochi yayili yangakamulana ni chakulinga cha Mlungu chachili chambone mnope.—Salimo 119:105; Ahebeli 4:12; 1 Yohane 2:15-17.

Pandanda Baibulo jalembedwe mu Chihebeli, mu Chialamu soni mu Chigiliki. Kaneko jiŵele jili mkugopoleledwa josope kapena mbalipe mu yiŵecheto yakupunda 3,000. Kutandila kalakala, Baibulo jili buku jajigopoleledwe m’yiŵecheto yejinji mnope soni jajigaŵidwe mnope kwa ŵandu kupunda mabuku gane gosope. Yeleyi chiyipitilisye kutendekwa. Ni ligongo lyakwe Baibulo jasasile kuti, “Ngani syambone asi syakwamba ya Umwenye [wawuli utenga wekulungwa wa m’Baibulo] sichilalichidwa pachilambo chosope chapasi kuti uŵe umboni kwa ŵandu ŵamitundu josope, kaneko mbesi jichiyika.”—Mateyu 24:14.

Paganichisya kusosekwa kwa utenga wa m’Baibulo, twayiweni kuti yili yakusosekwa kujilinganyasoni kuti jikamulane ni utenga wakwe wawuli wakusosekwa mnope. Twayiweni kuti tukwete udindo wekulungwa wagopolela utengawu mwakuŵajilwa. Baibulo jelinganyesoniji jigopoleledwe kutyochela ku Mabaibulo gachisungu ga Chilambo Chasambano ga Malemba Geswela gagaŵele gali mkukopoka munyumamu. Baibulo jandanda jakopweche yaka yakupunda 60 munyumamo. Nambope, pakwikanaga apano chiŵecheto cha Chisungu chichenjile mnope. Kuchenga kweleku kwatendekasisye kuti Komiti Jagopolela Baibulo ja Chilambo Chasambano jikole nganisyo syakulinganyasoni Baibuloji. Chakulinga chetu chili kukoposya Baibulo jegopolele mwakamulana ni mujaŵelele Baibulo ja chiŵecheto chandanda nambosoni kuti jiŵe jakupikanika chenene soni jangasawusya kuŵalanga. Kumbali jakuti Yakumbesi kwana ngani syakuti, “Yindu Yaŵakuyiye Pagopolela Baibulo,” “Yindu Yayili mu Baibuloji,” soni jakuti “Yayatendekwe Kuti Baibulo Jisimanikwe Mpaka Lelojino.” Ngani syelesi sikulondesya yindu yine ni yine yatulinganyisyesoni m’Baibuloji.

Ŵandu ŵakusamnonyela Yehofa Mlungu soni ŵakusamlambila jwalakwejo akusasachilila kuŵalanga Maloŵe ga Mlungu gele gagopoleledwe mwakupikanika chenene soni mwakuŵajilwa. (1 Timoteyo 2:4) Pa ligongo lyeleli, Baibulo ja chisungu twajilinganyisyesoni ni chakulinga chakuti jigopoleledwe mu yiŵecheto yejinji. Tuli ŵakusachilila soni lili lipopelo lyetu kuti pakuŵalanga Baibulo ja Malemba Geswelaji jakamuchisye wawojo pakulingalinga ‘kumsosasosa Mlungu . . . ni kumpata nditu jwalakwejo.’—Masengo 17:27.