Yoswa 9:1-27
9 Sambano mamwenye gosope ga mbali ja kungapililolyuŵa kwa lusulo lwa Yolodani+ gagatamaga ku dela jamatumbi, ku Sefela, mumbali mwa Nyasa Jekulungwa* josope+ soni mu dela jakulolegana ni Lebanoni gapikene ngani jeleji. Gelega galiji mamwenye ga Ahiti, Aamoli, Akanani, Apelesi, Ahifi soni Ayebusi.+
2 Jemanjaji ŵakamulene yakuti akataje ngondo Ayisalayeli nambosoni Yoswa.+
3 Ŵandu ŵaŵatamaga ku Gibiyoni+ nombenawo ŵapikene yaŵatesile Yoswa pakuwugomeka msinda wa Yeliko+ soni msinda wa Ai.+
4 Myoyo jemanjaji ŵatesile yindu mwakalamuka. Ŵajigele yakulya ni ŵayiŵisile m’misaku jepapuchepapuche ni kuyikwesa pa achibulu. Ŵakwesisyesoni finyo juŵajuŵisile m’misaku jamapende jepapuchepapuche soni jetaŵetaŵe mwepapuchemo.
5 Jemanjaji ŵawetesoni sapato kusajo* syawo syemalemale soni syetoteleletotelele yigamba. Ŵawetesoni yakuwala yepapuchepapuche. Mikate* jiŵajigele kuti alyeje paulendowu jaliji jejumu soni jeteketucheteketuche.
6 Kaneko jemanjaji ŵapite kwa Yoswa ku matenti ga Ayisalayeli ku Giligala.+ Kweleko ŵamsalile Yoswa soni achalume ŵa Chiyisalayeli kuti, “M’weji tutyochele ku chilambo chakwakutalika. Sambano jemanja atende chilanga ni m’weji.”
7 Nambo achalume ŵa Chiyisalayeliwo ŵajanjile Ahifiwo*+ kuti, “Kombolekatu jemanja mkutama pakuŵandika. Ni chitutende uli chilanga ni jemanja?”+
8 Pelepo jemanjajo ŵamjanjile Yoswa kuti, “M’weji tuli ŵakutumichila* ŵenu.”
Kaneko Yoswa ŵawusisye jemanjajo kuti, “Ana jemanja mli ŵani, soni mtyochele kwapi?”
9 Jemanjajo ŵajanjile kuti, “M’weji achikapolo ŵawo tutyochele ku chilambo chakwakutalika.+ Tuyiche akuno ligongo lya lina lya Yehofa Mlungu jwawo. Pakuŵa tupikene ya mbili jakwe soni yosope yaŵatesile ku Iguputo.+
10 Tupikenesoni yosope yaŵatesile Mlungu jwawo kwa mamwenye gaŵili ga Aamoli gagatamaga ku lisi line* lya lusulo lwa Yolodani, Mwenye Sihoni+ juŵatamaga ku Hesiboni soni mwenye Ogi+ jwa ku Basana juŵatamaga ku Asitaloti.
11 Myoyo achakulungwakulungwa ŵetu soni ŵandu wosope ŵa m’chilambo chetu ŵatusalile kuti, ‘Mjawule mkasimane ni jemanjajo, soni mjigale yakulya yakuti mlyeje paulendowo. Mkasalile jemanjajo kuti, “M’weji tuchiŵa ŵakutumichila ŵawo.+ Sambano atende chilanga ni m’weji.”’+
12 Palisiku lyatwatyokaga kumangwetu mkate watujigelewu waliji wamoto. Sambano alole, ujumwile soni uteketwicheteketwiche.+
13 Soni misaku jamapendeji jaliji jasambano patwatagaga finyoju. Nambo sambano jipapwichepapwiche.+ Nambosoni yakuwala yetu soni sapato syetu sipapwichepapwiche ligongo lya ulewu wa ulendowu.”
14 Pelepo achalume ŵa Chiyisalayeliwo ŵajigele yine mwa yakulyayo kuti ayilolechesye, nambo nganawusya lunda kwa Yehofa.+
15 Myoyo Yoswa ŵakamulene yamtendele ni jemanjajo,+ soni ŵatesile nawo chilanga chakuti ngaŵawulaga. Achakulungwakulungwa ŵa Ayisalayeli ŵalumbile pakwitichisya yeleyi.+
16 Pali pamasile masiku gatatu chitendele chilanga chila ni jemanjajo, Ayisalayeli ŵapikene yakuti ŵanduwo ŵatamaga pakuŵandika.
17 Pa lisiku lyatatulyo Ayisalayeli ŵanyakwiche ni kwawula ku misinda ja ŵanduwo. Misinda jakwe jaliji Gibiyoni,+ Kefila, Beeloti soni Kiliyati-yelimu.+
18 Nambo Ayisalayeli nganiŵawulaga jemanjajo ligongo achakulungwakulungwa ŵawo ŵaliji ali alumbile kala pameso pa Yehofa+ Mlungu jwa Isalayeli kuti ngaŵawulaga jemanjajo. Myoyo Ayisalayeli wosope ŵatandite kunyinyita pa yindu yaŵatesile achakulungwakulungwa ŵawo.
19 Pelepo achakulungwakulungwawo ŵasalile ŵandu wosopewo kuti, “Pakuŵa tulumbile kwa jemanjaji pameso pa Yehofa Mlungu jwa Isalayeli, myoyo ngatukusosekwa kwawulaga jemanjaji.
20 Sambano chitutende ayi. Chitwaleche jemanjaji ngawulaga, ni chakulinga chakuti Mlungu akatutumbilila ligongo lya yindu yatulumbile kwa jemanjaji.”+
21 Achakulungwakulungwawo ŵaŵechetesoni kuti, “Kwende twaleche tukawulaga, nambo mmalomwakwe jemanjaji aŵe ŵakwalokotela sasu Ayisalayeli wosope soni ŵakwatechela mesi.” Yeleyi ni yaŵakamulene achakulungwakulungwawo.
22 Sambano Yoswa ŵaŵilasile ŵandu ŵala ni kwawusya kuti, “Ligongo chichi jemanja mwatulambwisye pakutusalila kuti, ‘M’weji tutyochele kwakutalika mnope,’ chitamilecho mli mkutama mwakuŵandikana mnope ni m’weji?+
23 Kutandila lelo chimŵe ŵatembeleledwe,*+ soni chimŵe achikapolo ŵetu mpaka kalakala, mwamti chimŵe ŵakulokotela sasu soni ŵakutechela mesi pa nyumba ja Mlungu.”
24 Jemanjajo ŵamjanjile Yoswa kuti, “M’weji achikapolo ŵawo ŵatusalile mwakupikanika chenene yakuti Yehofa Mlungu jwawo ŵamlamwile Mose jwakutumichila jwakwe kuti ŵape jemanja chilambo chosopechi soni kuti ŵawulaje ŵandu wosope ŵakutama mwelemo.+ Myoyo twatesile yeleyi ligongo twamjogopaga jemanja+ kuti chimtuwulaje.+
25 Sambano tuli mmyala mwawo. Atutende yiliyose yakuyiwona kuŵa yambone soni yakuŵajilwa.”
26 Yeleyi ni yaŵatesile Yoswa kwa jemanjajo. Jwalakwe ŵakulupwisye jemanjajo mmyala mwa Ayisalayeli, mwamti nganiŵawulaga.
27 Nambo palisikuli Yoswa ŵaŵisile jemanjaji kuŵa ŵakwalokotela sasu soni ŵakwatechela mesi Ayisalayeli.+ Ŵaŵisilesoni kuŵa ŵakulokotela sasu soni ŵakuteka mesi ga pamalo gakupelechela mbopesi ga Yehofa kulikose kwachachisagula Mlungu kuti kuŵe maloga.+ Yeleyi ni yakutendape jemanjaji mpaka lelo.+
Maloŵe Gamwiŵanda
^ Jeleji jili Nyasa ja Mediterranean.
^ Ŵane akusati “makawu.”
^ Mikate jakala ŵajipanganyaga ni utandi wa tiligu kapena balele.
^ Ahifi waliji mtundu wa ŵandu ŵaŵatamaga mumsinda wa Gibiyoni.
^ Kapena kuti “achikapolo.”
^ Pelepa akwamba lisi lya kungopokolyuŵa kwa lusulo lwa Yolodani.
^ Ŵane akusati “ŵalweseche.”
