Ngani Syambone Syaŵalembile Yohane 8:12-59

  • Atati akusamtendela umboni Yesu (12-30)

    • Yesu ali “lilanguka lya chilambo” (12)

  • Ŵanache ŵa Abulahamu (31-41)

    • Chimchigopoledwa ni yayili yisyesyene (32)

  • Ŵanache ŵa Satana (42-47)

  • Yakwamba Yesu soni Abulahamu (48-59)

8  12  Sambano Yesu ŵapitilisye kuŵecheta ni jemanjajo kuti, “Une ndili lilanguka lya chilambo. Jwalijose jwakunguya une ngasajenda mu chipi ata panandi, nambo chachipochela lilanguka lyakupeleka umi.” 13  Myoyo Afalisi ŵamsalile jwalakwejo kuti, “Mmwejo mkusalitendela umboni jika, nambo umboni wenuwo nganuŵa wakuwona.” 14  Yesu ŵajanjile kuti, “Atamose kuti ngulitendela umboni jika nambo umboni wanguwo uli wakuwona, ligongo ngumanyilila kwanatyochele soni kwangwawula. Nambo jemanja ngamkumanyilila kwanatyochele soni kwangwawula. 15  Jemanja mkusamlamula mundu pakujigalila kawoneche kakwe, nambo une jwangamlamula mundu jwalijose. 16  Nambo yikaŵe kuti ngulamula, kulamula kwangu kukaliji kwa chilungamo, ligongo nganimba jika, nambo Atati ŵaŵandumilewo ni ŵali ni une. 17  Nambosoni m’Chilamusi chenu ŵalembile kuti, ‘Umboni wa ŵandu ŵaŵili uli wakuwona.’ 18  Uneji ngusalitendela umboni jika, soni Atati ŵaŵandumile une akusandendela umboni.” 19  Kaneko jemanjajo ŵamwusisye jwalakwejo kuti, “Ana Atati ŵenuwo ali kwapi?” Yesu ŵajanjile kuti, “Jemanja ngamkumanyilila une soni Atati ŵangu. Yikaŵe kuti mkumanyilila une nikuti mkamanyililesoni Atati ŵangu.” 20  Yesu ŵaŵechete yeleyi paŵaliji mkwiganya ku nyumba ja Mlungu. Jwalakwe ŵajimi kumalo kwele kwaliji yakuponyamo mbiya. Nambo pangali mundu juŵamkamwile jwalakwejo ligongo ndaŵi jakwe jaliji mkanijikwane. 21  Myoyo jwalakwe ŵasalilesoni jemanjajo kuti, “Une ngwawula, soni atamose kuti jemanja chimchisosasosa une, nambo chimchiwa mli ŵakulemwape. Sonitu kwangwawula uneko, jemanja ngaŵa mkwika.” 22  Kaneko Ayuda ŵatandite kuŵecheta kuti, “Ana ligongo chichi jweleju akusala kuti, ‘Kwangwawula uneko, jemanja ngaŵa mkwika’? Ana kapena akusaka kuliwulaga?” 23  Nambo Yesu ŵapitilisye kwasalila jemanjajo kuti, “Jemanja mli ŵakutyochela pasi pano, nambo une ndili jwakutyochela kwinani. Jemanja mli ŵakutyochela pa chilambochi, nambo une nganimba jwakutyochela pa chilambochi. 24  Ni ligongo lyakwe namsalile kala jemanja kuti, chimchiwa mli ŵakulemwape. Pakuŵa naga ngamkukulupilila kuti une ndili jwele juŵamsasile kuti chachiyika, chimchiwa mli ŵakulemwa myoyo.” 25  Myoyo jemanjajo ŵatandite kumwusya kuti, “Ana mmwejo mli ŵani?” Yesu ŵajanjile jemanjajo kuti, “Ana ligongo chichi ngwasa ndaŵi jangu kuŵecheta ni jemanja? 26  Ngwete yindu yejinji yakuti mbechete yakwamba jemanja soni yejinji yakuti nalamule. Kusala yisyene, Jwele juŵandumile unejo ali jwakuwona, soni une ngusaŵecheta ku chilambo yelepeyo yanayipikene kutyochela kwa jwalakwejo.” 27  Jemanjajo nganamanyililaga kuti jwalakwe ŵaŵechetaga yakwamba Atati ŵakwe. 28  Kaneko Yesu ŵatite, “Jemanja patimchimkwesya Mwanache jwa mundu pa chitela, ni patimchimanyilila kuti unejo ndili ŵani. Chimchimanyililasoni kuti ngangusatenda yindu mwajika, nambo ngusajiganya yindu yeleyi mpela muŵanjiganyichisye Atati. 29  Nambosoni Jwele juŵandumile unejo ali ni une, soni jwalakwe nganandeka jika, ligongo ndaŵi syosope ngusatenda yindu yakumsangalasya jwalakwejo.” 30  Jwalakwe paŵaŵechetaga yindu yeleyi ŵandu ŵajinji ŵamkulupilile. 31  Sambano Yesu ŵasalile Ayuda ŵaŵamkulupililewo kuti, “Naga jemanja mkupitilisya kusunga maloŵe gangu, nikuti mli ŵakulijiganya ŵangu ŵasyesyene. 32  Jemanja chimchimanyilila yisyesyene, soni yisyesyeneyo yichimgopola.” 33  Nambo ŵane ŵamjanjile jwalakwejo kuti, “M’weji tuli ŵanache ŵa Abulahamu soni nganituŵeje achikapolo kwa mundu jwalijose. Nambi uli mmwejo mkuŵecheta kuti, ‘Jemanja chimchigopoledwa’?” 34  Yesu ŵajanjile jemanjajo kuti, “Nditu ngumsalichisya kuti, jwalijose jwakutenda yakulemwa ali kapolo jwa ulemwa. 35  Nambosoni, kapolo jwangatama m’nyumba ja ambujegwe mpaka kalakala, nambo mwanache ni jwakusatama mpaka kalakala. 36  Myoyo naga Mwanache akumgopola jemanja, chimchiŵa ŵagopoka yisyesyene. 37  Une ngumanyilila kuti jemanja mli ŵanache ŵa Abulahamu. Nambo mkusaka kumbulaga ligongo ngamkusaka kwitichisya yangusajiganya une. 38  Une ngusaŵecheta yindu yanayiweni ndili ni Atati ŵangu, nambo jemanja mkusatenda yindu yamwapikene kutyochela kwa atati ŵenu.” 39  Jemanjajo ŵamjanjile jwalakwejo kuti, “M’wetu atati ŵetu ali Abulahamu.” Nambo Yesu ŵasalile kuti, “Yikaŵe kuti jemanja mli ŵanache ŵa Abulahamu, mkatesile masengo gaŵatendaga Abulahamujo. 40  Nambo sambano jemanja mkusaka kumbulaga une, mundu jwakuti namsalile yisyesyene yanayipikene kwa Mlungu. Nambotu Abulahamu nganatenda yeleyi. 41  Jemanja mkutenda masengo ga atati ŵenu.” Jemanjajo ŵamsalile jwalakwejo kuti, “M’wetu nganituŵa ŵanache ŵapetinji, tukwete Atati ŵamo, ŵali Mlungu.” 42  Nambo Yesu ŵajanjile jemanjajo kuti, “Yikaŵe kuti Mlungu ali Atati ŵenu, jemanja mkanonyele une. Pakuŵa natyochele kwa Mlungu ni ligongo lyakwe ndili apano. Nganiyika mwakusaka kwangu, nambo jwalakwejo ni juŵandumile une. 43  Jemanja ngamkusapikanila yangusajiganya, ni ligongo lyakwe nganimŵa mpikanichisye maloŵe gangu. 44  Jemanja mli ŵakutyochela kwa atati ŵenu Satana, soni mkusasachilila kutenda yakusaka ya atati ŵenuwo. Jwalakwejo aŵele ali mkuwulaga ŵandu kutandila pandanda, soni nganatamilichika mu yisyesyene, ligongo mwa jwalakwejo mwangali yisyesyene. Jwalakwejo pakuŵecheta yaunami akusaŵa ali mkuŵecheta ya mumtwe mwakwe, ligongo jwalakwe ali jwaunami soni msyene unami. 45  Nambo jemanja ngamkungulupilila une, ligongo lyakuti ngumsalila yisyesyene. 46  Ana ŵani ŵampaka asale kuti une ndili jwakulemwa? Naga ngusaŵecheta yisyesyene, nambi ligongo chichi jemanja ngamkungulupilila? 47  Mundu jwakutyochela kwa Mlungu akusapikanila maloŵe ga Mlungu. Ni ligongo lyakwe jemanja ngamkupikanila pakuŵa nganimŵa ŵakutyochela kwa Mlungu.” 48  Ayudawo ŵamjanjile jwalakwejo kuti, “Ana tukulemwa patukuŵecheta kuti, ‘Mmwejo mli Msamaliya soni kuti mkwete chiŵanda’?” 49  Yesu ŵajanjile kuti, “Unetu nganingola chiŵanda. Une ngwachimbichisya Atati ŵangu, nambo jemanja ngamkunjimbichisya. 50  Une jwangalisosela jika uchimbichimbi, nambo Mlungu ni jwakusasosela une uchimbichimbi soni jwalakwejo ali jwakulamula. 51  Nditu ngumsalichisya jemanja kuti, jwalijose jwakusunga maloŵe gangu ngasapasya chiwa ata panandi.” 52  Pelepo Ayudawo ŵamsalile jwalakwejo kuti, “Sambano tuyimanyi kuti mmwejo mkwete chiŵanda. Abulahamu nambosoni ŵakulochesya ŵawile kalakala, nambi uli mmwejo mkuŵecheta kuti, ‘Jwalijose jwakusunga maloŵe gangu ngasapasya chiwa ata panandi’? 53  Ana mmwejo mli jwamkulungwa kupunda atati ŵetu Abulahamu ŵaŵawilewo? Nombe nawo ŵakulochesya ŵawile. Sambano mmwejo mkuliwona mpela ŵani?” 54  Yesu ŵajanjile kuti, “Naga une ngulichimbichisya jika, nikuti uchimbichimbi wanguwo uli wangali mate. Atati ŵangu, ŵele jemanja mkuŵecheta kuti ali Mlungu jwenu, ni ŵakusanjimbichisya une. 55  Chitamilecho jemanja ngamkwamanyilila, nambo une ngwamanyilila. Nambosoni naga une nguŵecheta kuti ngangwamanyilila, nikuti chimbe jwaunami mpela jemanja. Nambo une ngwamanyilila soni ngusasunga maloŵe gawo. 56  Abulahamu jwasangalalaga mnope paŵajembecheyaga lisiku lyakwika kwangu. Jwalakwe jwaliweni lisikulyo munganisyo mwakwe soni jwasangalele.” 57  Kaneko Ayudawo ŵamsalile jwalakwejo kuti, “Mmwejo ata yaka 50 nganimkwanisye, ni mkusala kuti mwam’weni Abulahamu?” 58  Nambo Yesu ŵajanjile jemanjajo kuti, “Nditu ngumsalichisya kuti, Abulahamu mkanapagwe, une naliji ndili mbali.” 59  Pelepo jemanjajo ŵalokwete maganga kuti amponye jwalakwejo, nambo Yesu ŵajuŵile, kaneko ŵatyosile ku nyumba ja Mlunguko.

Maloŵe Gamwiŵanda