Ngani Syambone Syaŵalembile Yohane 21:1-25
21 Panyuma pa yeleyi, Yesu jwawonechelesoni kwa ŵakulijiganya ŵala ku Nyasa ja Tibeliya. Kuwonechela kwakwe kwaliji kwamti myi.
2 Papali Simoni Petulo, Tomasi (jwakolanjidwasoni kuti Didimo), Nataniyele jwakutyochela mu msinda wa Kana, ku Galileya, ŵanache ŵa Sebedayo, nambosoni ŵakulijiganya ŵane ŵaŵili.
3 Simoni Petulo ŵasalile achimjakwewo kuti, “Une ngwawula kukuwulaga somba.” Jemanjajo ŵamjanjile kuti, “M’wejisoni chitujawule nawo.” Myoyo jemanjajo ŵanyakwiche ni kukwela liboti, nambo chilo chelecho nganapata chilichose.
4 Chakumasikusiku, Yesu ŵajimi mungulugulu nyasa, nambo ŵakulijiganyawo nganammanyililaga kuti ali Yesu.
5 Pelepo Yesu ŵawusisye jemanjajo kuti, “Achimjangu, ana mkwete chakulya chilichose?” Jemanjajo ŵajanjile kuti, “Nganitukola.”
6 Jwalakwe ŵasalile jemanjajo kuti, “Mponye likoka lyenulyo chakumlyo kwa libotilyo mwamti chimpate somba.” Jemanjajo paŵaponyisye likokalyo, ŵalepele kuliwutila mwiboti ligongo lya winji wa somba.
7 Kaneko jwakulijiganya jwele Yesu ŵamnonyelaga mnope jula ŵamsalile Petulo kuti, “Ali Ambujetu ŵele!” Sambano Simoni Petulo paŵapikene kuti ali Ambuje, ŵajigele mkanjo wakwe ni kuwala, ligongo pandaŵiji ŵaliji ali awete chakuwala chamkatipe,* kaneko ŵaliponyisye m’mesimo.
8 Nambo ŵakulijiganya ŵane ŵala ŵayiche paliboti, ali mkuwuta likoka lyegumbale somba, pakuŵa nganaŵa pakutalikangana ni mkuli. Jemanjaji ŵaliji palutando lwa mamita chiŵandika 90 basi.
9 Paŵayiche pamkuli, ŵasiweni somba sili pamoto wamakala nambosoni paliji pana mkate*.
10 Yesu ŵasalile jemanjajo kuti, “Ambe akuno sine mwa somba syakamwilesyo.”
11 Myoyo Simoni Petulo ŵakwesile mwibotimo ni kuwutila pamkuli likoka lila. Likokalyo lyaliji lyegumbale ni somba syekulungwakulungwa syakwana 153. Nambo atamose kuti sombasyo syaliji syejinji, likokalyo nganilipapuka.
12 Kaneko Yesu ŵasalile jemanjajo kuti, “Ayiche alye.” Pandaŵiji pangali jwakulijiganya atamose jumo juŵalimbile mtima kumwusya jwalakwejo kuti ali ŵani, pakuŵa wosopewo ŵamanyilile kuti ali Ambuje.
13 Pelepo Yesu ŵajigele mkate ni somba ni kwapa jemanjajo.
14 Keleka kaliji katatu Yesu kuwonechela kwa ŵakulijiganyawo pandaŵi jaŵajimwiche ku chiwa.
15 Paŵamalisisye kulyako, Yesu ŵamwusisye Simoni Petulo kuti, “Simoni mwanache jwa Yohane, ana mkusimunonyela une kupunda ayi?” Jwalakwejo ŵajanjile kuti, “Elo Ambuje, wawojosoni akumanyilila kuti ngusinanonyela.” Pelepo ŵamsalile kuti, “Mlisyeje tuŵanache twangu twa ngondolo.”
16 Yesu ŵamwusisyesoni kaŵili kuti, “Simoni mwanache jwa Yohane, ana mkusimunonyela une?” Jwalakwejo ŵajanjile kuti, “Elo Ambuje, wawojosoni akumanyilila kuti ngusinanonyela.” Yesu ŵamsalile kuti, “Msamalileje tuŵanache twangu twa ngondolo.”
17 Yesu ŵamwusisyesoni katatu kuti, “Simoni mwanache jwa Yohane, ana mkusimunonyela une?” Pelepo Petulo chamkamwile mnope chanasa ligongo lyakuti ŵamwusisyesoni katatu kuti, “Ana mkusimunonyela une?” Myoyo jwalakwejo ŵajanjile kuti, “Ambuje, wawojo akusamanyilila yindu yosope, soni akumanyilila kuti ngusinanonyela.” Yesu ŵamsalile kuti, “Mlisyeje tuŵanache twangu twa ngondolo.
18 Nditu ngumsalichisya mmwejo kuti, pamwaliji mnyamata mwakombolaga kuwala jika soni mwajawulaga kulikose kwamkusaka. Nambo pachimchikalambala, chimchitambasukulaga makono genu kuti mundu jwine am’weche soni chachimjigalilaga kwele ngamkukusaka.”
19 Yesu ŵaŵechete yeleyi pakulosya mtundu wa chiwa chele Petulo chachisimana nacho, chelesoni chichitendekasya Mlungu kuchimbichika. Kaneko ŵamsalile Petulo kuti, “Mpitilisye kunguya une.”
20 Sambano Petulo ŵagalawiche ni kumwona jwakulijiganya jwele Yesu ŵamnonyelaga mnope jula ali mkwakuya. Jwakulijiganya jweleju ni ajula juŵagalawuchile Ambuje pachakulya chaligulo ni kwawusya kuti, “Ambuje, ana akwamba ŵani juchiŵapeleche wawojo?”
21 Myoyo Petulo paŵam’weni jwalakwejo, ŵamwusisye Yesu kuti, “Ambuje, nambi uli aju?”
22 Yesu ŵamjanjile jwalakwejo kuti, “Naga ngusaka kuti jwelejo aŵepe chiŵela umi mpaka pachinjiyika, ana yeleyo yikumkwaya uli mmwejo? Mmwejo mgambeje kunguya une.”
23 Myoyo maloŵe gelega gawandile pasikati pa abale kuti jwakulijiganya jweleju ngasawa. Nambope, Yesu nganasala kuti jwalakwejo ngasawa, nambo ŵatite, “Naga ngusaka kuti jwelejo aŵepe chiŵela umi mpaka pachinjiyika, ana yeleyo yikumkwaya uli mmwejo?”
24 Jwakulijiganya jweleju ni jwakutendela umboni ya yindu yeleyi soni ni juŵayilembile, soni tukumanyilila kuti umboni wakwewu uli wakuwona.
25 Kusala yisyene, Yesu ŵatesile yindu yine yejinji, yele yikaŵe kuti yalembedwe yosope yene, nguganisya kuti chilambo ngamkanichikola malo gakwanila kusunjila mipukutu josopejo.
Maloŵe Gamwiŵanda
^ Maloŵe gakwe gandanda, “ali makonope.”
^ Mikate jakala ŵajipanganyaga ni utandi wa tiligu kapena balele.
