Ngani sya Yohane 2:1-25
2 Pali papite masiku gaŵili kwapali chisangalalo cha ukwati mu msinda wa Kana ku Galileya, soni mamagwe Yesu ŵaliji kukoko.
2 Nombenajo Yesu ni ŵakulijiganya ŵakwe ŵaŵilanjidwe ku chisangalalo cha ukwaticho.
3 Sambano finyo pajwasigele panandi kumala, mamagwe Yesu ŵayiche ni kumsalila kuti, “Finyotu jwamalile ŵanduŵa.”
4 Nambo Yesu ŵajanjile kuti, “Mama, nambi yeleyo yikutukwaya uli m’weji? Ndaŵi jangu nganijikwane.”
5 Myoyo mamagwewo ŵasalile ŵandu ŵaŵaliji mkutumichila kweleko kuti, “Mtende yiliyose yachamsalile.”
6 Sambano chapapopo papali milulo* 6 ja mesi jakupanganyidwa ni maganga, mwakamulana ni malamusi ga Ayuda gakusala ya kuliswejesya.+ Lulo lulilose lwagumbalaga ni milulo jakulinjila jiŵili kapena jitatu.*
7 Yesu ŵasalile ŵakutumichila ŵala kuti, “Ataje mesi m’miluloji mpaka jigumbale.” Pelepo jemanjajo ŵatasile mesigo mpaka kukamwa.
8 Kaneko ŵasalile jemanjajo kuti, “Sambano mteche panandi ni mkampe jwakulolela chisangalalo cha ukwatiwu.” Myoyo jemanjajo ŵatesile yeleyi.
9 Jwakulolela chisangalalo cha ukwatiwo ŵapasisye mesi gaŵagachenjile kuŵa finyo gala. Jwalakwejo nganamanyilila kujwatyochele finyojo, nambo ŵakutumichila ŵaŵatechile mesigo ŵayimanyi. Myoyo jwakulolela chisangalalo cha ukwati jula ŵamŵilasile msyene ulombelawo
10 ni ŵamsalile kuti, “Mundu jwalijose akusakoposya chandanda finyo jwambone, kaneko ŵandu pakolelwe jwalakwe akusakoposyaga finyo wamba. Nambo mmwejo mgambileje kusungape finyo jwamboneju mpaka apano.”
11 Yesu ŵatesile yeleyi mu msinda wa Kana ku Galileya. Chelechitu chaliji chakusimonjesya chakwe chandanda. Mwakutenda yeleyi jwalakwe jwalosisye machili gakwe,+ soni ŵakulijiganya ŵakwe ŵamkulupilile.
12 Payamasile yeleyi jwalakwejo ŵapite ku Kapelenawo+ pampepe ni mamagwe soni achalongo achimjakwe+ nambosoni ŵakulijiganya ŵakwe. Nambo kweleko nganaja kutama masiku gejinji.
13 Sambano lisiku lya Pasika+ ja Ayuda palyaŵandichile, Yesu jwapite ku Yelusalemu.
14 Kweleko ŵasimene ŵandu ku nyumba ja Mlungu ali mkusumisya ng’ombe, ngondolo soni njuŵa.+ Ŵasimenesoni ŵandu ŵakuchenga mbiya ali atemitemi m’mipando jawo.
15 Myoyo jwalakwe ŵalinganyisye chikoti changonji ni kutanda kusitopolela pasa ngondolo soni ng’ombe sila pampepe ni wosope ŵaŵaliji mkusumisya. Ŵajasilesoni makobili ga ŵakuchenga mbiya ŵala soni kugudubusya matebulo gawo.+
16 Kaneko ŵasalile ŵakusumisya njuŵa ŵala kuti, “Mkoposye yindu yeleyi amuno! Mleche kujitenda nyumba ja Atati ŵangu mpela nyumba jakutendela malonda!”*+
17 Pelepo ŵakulijiganya ŵakwe ŵakumbuchile yayalembedwe m’Malemba yakuti, “Kulipeleka pa nyumba jawo kuchiŵa mpela moto wakolela mumtima mwangu.”+
18 Sambano Ayuda ŵamwusisye jwalakwejo kuti, “Ana chimtulosye chimanyisyo chamtuli+ chakusimichisya kuti mkwete ulamusi wakutendela yeleyi?”
19 Yesu ŵajanjile jemanjajo kuti, “Mgwisye nyumba ja Mlunguji, nambo m’masiku gatatu chinajijimusyesoni.”+
20 Pelepo Ayudawo ŵatite, “Nyumba ja Mlunguji jataŵidwe kwa yaka 46, sambano mmwejo ni mkuti chimchijitaŵa m’masiku gatatu?”
21 Nambotu Yesu pakusala ya nyumba ja Mlunguji ŵaliji mkugopolela ya chilu chakwe.+
22 Sambano Yesu paŵajimwiche ku chiwa, ŵakulijiganya ŵakwe ŵakumbuchile kuti ndaŵi ni katema jwalakwejo ŵaliji mkusala ya yeleyi.+ Myoyo ŵakulijiganya ŵakweŵa ŵakulupilile malemba soni yosope yaŵasalile Yesu.
23 Sambano jwalakwejo paŵaliji ku Yelusalemu ŵatesile yakusimonjesya yejinji pa chisangalalo cha Pasika. Ŵandu paŵayiweni yeleyi, ŵajinji ŵakulupilile mu lina lyakwe.
24 Nambo Yesu nganiŵakulupilila mnope jemanjajo ligongo ŵamanyililaga chenene ŵandu wosopewo.
25 Jwalakwe ŵamanyililagasoni yayili mumtima mwa mundu jwalijose, myoyo nganasosekwaga kwembecheya kuti jwine amsalile yayili mumtima mwa mundu.+
Maloŵe Gamwiŵanda
^ Ŵane akusati “malulo; wulo.”
^ Lulo lulilose lwakulinjila lwaŵaga malita 22. Alole Yakumbesi B14.
^ Kapena kuti “msika.”
