Yobu 9:1-35
9 Kaneko Yobu ŵajanjile kuti:
2 “Nditu ngumanyilila kuti yeleyi ni mwayiŵelele.
Nambo ana mundu mpaka aliwoneje chamtuli kuŵa jwakulungama pameso pa Mlungu?
3 Naga mundu jwine akusaka kusisyana ni jwalakwe,Mundu jwelejo nganaŵa akombwele kumjanga Mlungujo atamose chiwusyo chimo pa yiwusyo 1,000.
4 Jwalakwe akwete mtima walunda soni akwete machili gekulungwa.
Ŵani ŵampaka asisyane ni jwalakwejo ni kusimanikwa kuti nganawulala?
5 Jwalakwe akusagatukusya* matumbi jwalijose ali ngakumanyilila.Jwalakwe akusagagalawusya matumbigo ni ukali wakwe.
6 Jwalakwe akusachitenganya chilambo ni kuchityosya pamalo gakwe,Mwamti yipilala ya chilambocho yikusatenganyika.
7 Jwalakwe akusalilamula lyuŵa kuti likaŵalaSoni akusasiŵa kuŵala kwa ndondwa.
8 Jwalakwe msyene akusakutambasukula kwinani,Soni jwalakwe akusajenda penani pa matumbela gekulungwa ga m’nyasa,
9 Jwalakwe jwapanganyisye gulu ja ndondwa ja Asi, ja Kesili soni ja Kima,Soni jwapanganyisye magulu ga ndondwa sya kummwela.
10 Jwalakwe akusatenda yindu yekulungwa soni yangakomboleka kuyiwungunya,Akusatenda yindu yakusimonjesya yayili yangaŵalanjika.
11 Jwalakwe akusapita chiŵandika une, nambo ngangusinamwona.Jwalakwe akusapita pandili une, nambo ngangusamanyilila.
12 Jwalakwe pasumwile chindu chinechakwe, ŵani ŵampaka alimbane najo?
Ana ŵani ŵampaka amwusye jwalakwejo kuti, ‘Ana wawo akutenda chichi?’
13 Mlungu ngasaleka kulosya kutumbila kwakwe.Atamose ŵakumkamuchisya Lahabi* chachimtindiŵalila jwalakwe.
14 Nikuti pangumjanga jwalakweNgusosekwa kusagula chenene maloŵe gakuti mbechete pangusisyana najo.
15 Atamose yili yakuti nguŵecheta yisyene, nganimba ngombwele kumjanga jwalakwe.
Mpaka ngambe kumŵenda jwakwelusya* jwangujo kuti andendele chanasa.
16 Naga ndili namŵilasile jwalakwe, ana mpaka anjanje?
Ngangukulupilila kuti jwalakwe mpaka apikane maloŵe gangu.
17 Pakuŵa jwalakwe akusambuta une ni mbungo jamachiliSoni akusagatupiya maŵanga gangu pali pangali ligongo lililyose.
18 Jwalakwe ngakundeka une kuti mbumule.Jwalakwe agamba kunjonjechesya une yindu yakupweteka.
19 Pakwamba ya machili, jwalakwe ali jwakulimbangana mnope.
Pakwamba ya chilungamo, jwalakwe akusaŵecheta kuti, ‘Ana ŵani ŵampaka anjimbe une magambo?’
20 Atamose yili yakuti nguŵecheta yisyene, pakamwa pangu penepo mpaka panjamuche une.Atamose yili mkuti ngupitilisya kuŵa jwakulupichika,* jwalakwe chachisimana une kuti ndili jwakulemwa.
21 Atamose yili mkuti ngupitilisya kuŵa jwakulupichika,* ngangumanyilila yampaka yindendechele.Umi wanguwu nganguwusakasoni.*
22 Yosopeyi pangali kulekangana kulikose. Ni ligongo lyakwe nguŵecheta kuti,‘Jwalakwe akusajonanga ŵandu ŵangalemwa* ni ŵakusakala.’
23 Naga ŵandu ali awile mwakusisimusya ni mesi gakusefuchilaJwalakwe mpaka ŵaseche ŵandu ŵangalemwa pakulaga.
24 Chilambo chipelechedwe mmyala mwa ŵandu ŵakusakalaSoni jwalakwe akusasiŵa meso* ga ŵandu ŵakwelusya.
Naga nganaŵa jwalakwejo, ni mpaka aŵe ŵanisoni?
25 Masiku gangu gakuwutuka mnope kumpunda mundu jwakuwutuka.Gakutila mkanigaŵe kulola yindu yambone.
26 Gagamba kwawula mpela maboti gakupanganya ni matete.Gakuwutuka mpela ngwasi jajikusaka kukamula chindu chakuti jilye.
27 Naga nguŵecheta kuti, ‘Chindiŵalile yakudandawula yangu,Nikuti chinjenje kawoneche ka ngope jangu kuti jiŵe jakusangalala.’
28 Une chinjiŵape jwawoga ligongo lya yakupweteka yangu yosope,Nambo ngumanyilila kuti jemanja chimchimbonape kuti ndili jwakulemwa.
29 Chinjisimanikwa kuti ndili jwakulemwa.
Sano ni lajileje chichi?
30 Atamose ndili njosile m’mesi getakate mnope,Soni kunaŵa mmyala mwangu ni mesi gachidulo,
31 Pelepo wawo chachimbonya une mu lisimbo lyamatope,Ni chakulinga chakuti atamose yakuwala yangu nayiwone kunyalaya.
32 Pakuŵa jwalakwe nganaŵa mundu mpela une kuti mpaka namjanje,Nganaŵa mundu kuti mpaka njawule najo ku luŵala lwamagambo.
33 Pangali mundu jwampaka atutamiche pasi,*Pangali jwampaka aŵe jwakwelusya jwetu.
34 Yikaŵe kuti jwalakwe alesile kumbuta une,Soni kuleka kunjogoya une ni yindu yakutesya woga,
35 Nikuti une ngaŵechete najo mwangali woga.Pakuŵatu une jwangajogopa kuŵecheta.
Maloŵe Gamwiŵanda
^ Kapena kuti “akusagatyosya.”
^ Komboleka kuti pelepa akwamba chilombo chakogoya cha m’nyasa.
^ Kagopolele kanesoni, “jwakwimbana najo magambo.”
^ Kagopolele kanesoni, “Atamose yili mkuti ndili jwangalemwa.”
^ Kagopolele kanesoni, “Atamose yili mkuti ndili jwangalemwa.”
^ Kapena kuti “Umi wanguwu nguwuwona kuti uli wangali mate.”
^ Kapena kuti “ŵakulupichika.”
^ Mu Chihebeli ŵatiga, “ngope sya ŵandu ŵakwelusya.”
^ Kapena kuti “Pangali jwampaka atukamulanye.”
