Yobu 41:1-34
-
Mlungu akulondesya ya kusimonjesya kwa ngwena (1-34)
41 “Ana mmwejo mpaka mjiloposye ngwena* ni chisopo chakulopochesya somba?Ana kapena mpaka mjitaŵe kukamwa kwakwe ni lukonji?
2 Ana mpaka mpitisye lukonji mu mbula mwakwe?Soni ana mpaka mpowole chipundi chakwe ni chisopo?
3 Ana mpaka jimchondelele mmwejo kwa maulendo gejinji?Ana kapena mpaka jiŵechetane ni mmwejo mwakuwusimana mtima?
4 Ana mpaka jitende chilanga ni mmwejo,Ni chakulinga chakuti mmwejo mjitende jelejo kuŵa kapolo jwenu kwa umi wakwe wosope?
5 Ana mpaka mng’ande najo mpela kuti mkung’anda ni chijuni?Ana kapena mpaka mjitaŵe ni kalukonji ni chakulinga chakuti tuŵanache twenu twachikongwe tung’andeje najo?
6 Ana ŵakutenda malonda mpaka ajichenganye ni chindu chinechakwe?
Ana mpaka ajigaŵanyegaŵanye ni kujisumisya kwa ŵamalonda?
7 Ana mpaka mtote lipende lyakwe ni yisopo yejinjiKapena kutota mtwe wakwe ni mipamba jakuwulajila somba?
8 Mgambe kulinga kujisajika ligasa lyenu.Ngasimliŵalila ngondo jachimsimane najo pelepo mwamti ngasimtandilasoni.
9 Nganisyo syenu syakuti mjigomeche mpaka sijawule pachabe.
Mpaka mtende woga mnope* atamose gamba kujilolape.
10 Pangali jwampaka alinje kujitanda.
Sambano ŵani ŵampaka alinje kwimikana ni une?
11 Ana ŵani ŵaŵambele une chindu chinechakwe ni kwembecheyaga kuti nawuchisye?
Pakuŵatu chilichose chachili pachilambo chili changu.
12 Nganimba ndemi jii ngaŵecheta yakwamba ngongolo syakwe,Yakwamba machili gakwe soni ya chilu chakwe chegumbidwe chenene.
13 Ana ŵani ŵampaka agwagule lipende lyakwe lyekandapale?
Ŵani ŵampaka ajinjile pakamwa pakwe pewugule?
14 Ŵani ŵampaka alinje kuwugula matanga ga pakamwa pakwe?
Meno gakwe gagasyungulile mkamwa mwakwe mosope gali gakutesya woga mnope.
15 Pamgongo pakwe pana miselamisela ja maŵambaMaŵambago gali gelumbikane mwakutitigana.
16 Maŵambago gatemi mwakwinjililana cheneneMwamti atamose mpweya ukusasoŵa pakwinjilila.
17 Maŵambago gamambatikene.Gali gekamulane pampepe soni ngaŵa mkugalekanganya.
18 Kuyechemula kwakwe kukusang’anima,Soni meso gakwe gali mpela kuŵala kwa kumasikusiku.
19 Kumesya kwa njasi kukusakopoka mkamwa mwakwe.Kukusaŵa mpela kutatasika kwa moto.
20 Lyosi likusakopoka mumbula mwakwe,Mukusaŵaga mpela mu ufuni mwatasilemo yiswani yakolechesya moto.
21 Mpweya wakwe ukusakolesya makala,Soni lilamba lya moto likusakopoka mkamwa mwakwe.
22 Mu lukosi mwakwe mwana machili gejinji,Soni wosope ŵasimene najo akusatenda woga mnope.
23 Minowu jakwe jakamulene mwakulimbangana mnope.Jili jakulimbangana mpela kuti ŵajipanganyichisye papopo mwamti jangasejela.
24 Mtima wakwe uli wakulimbangana mnope mpela liganga,Elo, uli wakulimbangana mpela liganga lyakusyajila.
25 Pajigambile kwimuka, atamose ŵandu ŵamachili akusatenda woga.Jikusajogoya mnope atamose pajigambile kutenganya mchila wakwe.
26 Pangali mundu jwampaka akombole kujiwulasya ni upanga,*Nganaŵa akombwele kujiwulasya atamose ni lipanga, momba* kapena mpamba.
27 Chisyano jikusachiwona mpela linyasi,Soni chisyano chakopa jikusachiwona mpela litabwa lyepukuswe.
28 Mpamba wangajitendekasya kutila,Soni liganga lya mu chinawo* jikusaliwona mpela mpesi.
29 Jikusachiwona chimbonga mpela kuti chili mpesi,Soni jikusaseka lipanga palikwika.
30 Kulutumbo kwa ngwenajo kuli kwakutema mpela tumalupale twakutema.Pajilitandaliche m’matope jikusaŵa mpela chakuputila mbeju.
31 Jikusatendekasya mesi kutokota mpela kuti gali mumpika.Jikusakologanya nyasa mpela mpika wakutelechela mawuta gakununjila.
32 Pajipitile jikusatendekasya mesi kutenda chiwulo,
Mwamti mundu mpaka aganisye kuti mesigo gana wuli.
33 Pachilambo chapasi pangalisoni chakulandana najo,Ŵajipanganyisye m’litala lyakuti jikatendaga woga.
34 Jikusalola mwangali woga chinyama chilichose chakulikwesya.
Jili mwenye jwa yinyama yosope yakogoya yakwitinji yayili yamachili.”
Maloŵe Gamwiŵanda
^ Mu Chihebeli ŵatiga, “Lefiyatani.”
^ Kapena kuti “mpaka mgwile pasi.”
^ Upanga ukusawoneka mpela chipula chekulungwa chakutema kosekose.
^ Ŵane akusati “chomba.”
^ Chinawo chikusakamula masengo mpela legeni.
