Yobu 30:1-31
30 “Sambano achalume ŵa yaka yamnono kulekangana ni une,Akuseka une,Achalumeŵa ali ŵele achibaba ŵawo ngakanileKuti atame yimpepe ni mbwa syakulondela ngondolo syangu.
2 Ana machili ga makono gawo galiji gana masengo gamtuli pa une?
Machili ga jemanjaji sambano gamasile.
3 Jemanjaji apesile ligongo lya usawuchi soni sala.Jemanjaji akulya pamalo pejumu,Pamalo pele pakuwoneka mpela masame soni pejonasiche.
4 Jemanjaji akusapulula masamba gakupikanika njete kutyochela m’mawukutu.Yakulya yawo yili mchiga wa chitela chakuwoneka mpela lisache.
5 Jemanjaji ŵatopwele m’musi.Soni ŵandu akwagumilila mpela yakusati pakumgumilila jwawiyi.
6 Jemanjaji akusatama malo gakuseleleka ga m’yitiŵi.*Soni akusatama m’masimbo ni m’malwala.
7 Jemanjaji akusalila ali m’mawukutu,Soni akusawunjikana pa mawukutu ga yakumela yamiŵa.
8 Jemanjaji ŵatopwele m’chilambo,Pakuŵa ali ŵanache ŵa ŵandu ŵangali lunda soni ŵangali lina.
9 Nambo sambano jemanjaji akusanyosya atamose mu nyimbo syawo.Mbele chindu chakunyoseka kwa jemanjajo.
10 Jemanjaji akumbenga une soni akusandalichila.Ŵangaganisya kaŵili pakusaka kusunila mata kungope.
11 Ligongo lyakuti Mlungu asumwile yida yangu soni andendekasisye kuti mbe mundu jwakutuluka,Jemanjaji pambweni une ŵangatenda yindu yakunjimbichisya.
12 Kumkono wangu wamlyo, jemanjaji akusaŵa mpela gulu ja ŵachiswamba ni kunjimuchila une.Jemanjaji akusandendekasya une kuti nguluche mwinaniSoni akusambichila une yindu yakuwulasya palitala lyangu.
13 Jemanjaji akusajonanga matala gangusapitaSoni akusayitendekasya yakusawusya yangu kuti yikule,Mwamti pangali jwakusiŵalekasya* jemanjaji.
14 Jemanjaji akusayika mpela kuti ajinjilile pamalo pekulungwa papagumwiche lutenje.Jemanjaji akusagungumuchila pamalo gagali gejonasiche kala.
15 Yindu yakogoya yinganganiche.Uchimbichimbi wangu ugulwiche mpela mbungo,Soni chikulupusyo changu chimasile mpela mawunde.
16 Sambano umi wangu ukutyoka,Soni masiku gakulagasika gangakamile une.
17 Chilo ngusapikana kupweteka mnope m’mawupa gangu.*Ululu wekulungwa mnope ngawukuleka kundagasya.
18 Chakuwala changu chiwutiche mwamachili mnope mwamti chikwinyiche.*Chakuwala changucho chikundaŵa palukosi mpela kolala jakanganika.
19 Mlungu ambonyisye une m’matope,Mwamti ndili mpela luwundu soni liwu.
20 Ngusinalilila wawojo kuti angamuchisye nambo wawo ngakunjanga une.Ngusajima nambo wawo akusagambaga kundola.
21 Wawojo anjimuchile une mwangasa,Anjimuchile une ni machili gosope ga mkono wawo.
22 Wawo akunyakula une ni kungulusya mwinani ni mbungo.Kaneko akusangulusyagulusya une mu mbungo jamachili.
23 Pakuŵa une ngumanyilila kuti wawojo chachimbeleka une ku chiwa,Chachimbeleka ku nyumba jele ŵandu wosope ŵali ni umi chachijawula.
24 Pangali jwampaka amwulasye mundu jwammalemale pakulilila chikamuchisyo mundaŵi jakusimana ni yakusawusya.
25 Ana uneji nganinalilila ŵandu ŵele ŵagwilile mu yakusawusya?
Ana une nganinatendela chanasa ŵandu ŵakulaga?
26 Atamose kuti najembecheyaga yindu yambone, nambo yakusakala yangwilile.Unetu najembecheyaga lilanguka, nambo chipi chayiche.
27 M’matumbo mwangu ngamukuleka kuguluma*.Masiku ga yakusawusya gasimene une.
28 Ngwenda ndili jwachanasa soni lyuŵa ngalikuŵala.
Pandili pagulu ja ŵandu ngusajima ni kuŵenda chikamuchisyo.
29 Une mbele mlongomjakwe jwa makuleSoni mbele mjakwe jwa ŵanache ŵachakongwe ŵa ndiŵatiŵa.
30 Lipende lyangu liŵilile soni likugwaguka.Mawupa gangu gakocha moto ligongo lya chitukuta.*
31 Chakwimbila changu changonji chikukamula masengo pandaŵi ja kulilape basi,Soni chitolilo changu chikukamula masengo pandaŵi ja kulila.
Maloŵe Gamwiŵanda
^ Yitiŵi yakusala pelepa yaliji yana sulo.
^ Kagopolele kanesoni “pangali ŵakusiŵakamuchisya jemanjaji.”
^ Mu Chihebeli ŵatiga, “Chilo mawupa gangu gakusapowoledwa.”
^ Kagopolele kanesoni “ngwinyiche ligongo lya yakusawusya.”
^ Kapena kuti “kutongola.”
^ Kagopolele kanesoni, “ligongo lya kukasanya pachilu.”
