Yobu 19:1-29
19 Sambano Yobu jwajanjile kuti:
2 “Ana jemanja chimpitilisye kuwulagasya umi wangu mpaka chakachi?Ana chimpitilisye kumbweteka ni maloŵe genu mpaka chakachi?
3 Kwa maulendo gakwana 10 gelega, jemanja mŵele mli mkunjamuka* une,Sonitu jemanja ngamkutenda sooni pamkundendela une yangasa.
4 Naga yili yisyene kuti pana chindemwisye,Sambano yakulemwa yanguyo jemanja yikumkwaya chamtuli?
5 Naga jemanja mkulimbichila kulikwesya pameso pa une,Ni kusala kuti nguŵajilwa kusimana ni yakusawusyayi,
6 Mmanyilile kuti Mlungu ni jwasokonasisye une,Soni jwalakwe ni jwandendekasisye une kuti ndanjile mu lwawu lwakwe.
7 Unetu mbele ndili mkulila kuti, ‘Akumbweteka akuno!’ nambo pangali ŵakunjanga,Mbele ndili mkugumila kuti ŵane angamuchisye, nambo pangali jwakundendela yachilungamo.
8 Jwalakwe awugele litala lyangu ni lipupa lyamaganga, mwamti nganimba ngombwele kupita.Jwalakwe asiŵile litala lyangu ni chipi.
9 Jwalakwe ambusile uchimbichimbi wanguSoni ambusile chisoti chauchimbichimbi mumtwe mwangu.
10 Jwalakwe akuwujonanga umi wangu mpaka kuwumalisya,Jwalakwe akusachuŵa chembecheyo changu mpela mwakusati pakuchuŵa chitela.
11 Ukali wakwe ukusakolela pa une,Soni jwalakwe akusambona mpela mdani jwakwe.
12 Magulu gakwe gangondo gakusasongana pampepe ni kusyungulila une,Soni akusataŵa matenti gawo mwakusyungulila tenti jangu.
13 Jwalakwe ŵatopwele achalongo achimjangu ŵasyesyene ni kwaŵika kwakutalikangana ni une,Soni ŵandu ŵakumanyilila une, andesile une.
14 Achimjangu ŵapamtima* andesile une,Soni ŵandu ŵanamanyililaga chenene andiŵalile.
15 Achalendo ŵa m’nyumba jangu soni achikapolo ŵangu ŵachakongwe akusambona mpela mundu jwele ngakummanyilila,Jemanjaji akusambona une mpela mlendo.
16 Ngusamŵilanga jwamasengo jwangu, nambo ngakusanjanga;Ni pakamwa pangu ngusamŵenda kuti andendele chanasa.
17 Mpweya wangu uŵele chindu chakunyalaya kwa ŵamkwangu,Soni une mbele chindu chakununga kwa achalongo achimjangu.*
18 Atamose ŵanache akunyosya une,Panjimwiche, jemanjaji akusatanda kuseka.
19 Achimjangu wosope ŵapamtima akumbenga,Soni ŵandu wosope ŵele une nanonyelaga anjimuchile.
20 Une sigele mawupawupape,Mwamti ngulupwiche ni mnowu wa meno gangupe basi.*
21 Mulosye une chanasa jemanja achimjangu, mulosye chanasa chonde,Pakuŵa ligasa lya Mlungu lingwayiye une.
22 Ligongo chichi mkundagasya une mpela mwakutendela Mlungu?Ligongo chichi ngamkuleka kunjimuchila?
23 Yikaŵele chenene maloŵe gangu gakalembedwe,Yikaŵele chenene gakalembedwe m’buku.
24 Yikaŵele chenene maloŵego akagalembile palwala mwakutenda kugoba,Akagalembile ni chisyano ni kochelela ni mtofu.
25 Pakuŵa une ngumanyilila kuti jwakuwombola ali chiŵela umi.Pandaŵi jine jwalakwe chachiyika ni kwima pachilambo chapasi.
26 Panyuma pakuti mnowu wangu awujonasile,Pele mnowuwo wuli chiŵela m’chilu mwangu, chinjimwona Mlungu.
27 Mlungu jweleju chinjimwona namsyene,Meso gangu gachimwona jwalakwe, ngaŵa meso ga jwine.
Nambo mkati mwa mtima wanguwu ngupikana kupweteka.
28 Ligongo jemanja mkuŵecheta kuti, ‘Ana tukumlagasya chamtuli jwalakwejo?’
Pakuŵa une ni jwandandikasisye yakusawusyayi.
29 Jemanja mkusosekwa kuwujogopa upanga,*Pakuŵa upanga ukusapeleka chilango* ligongo lya yakulemwa;Jemanja mkusosekwa kumanyilila kuti kwana jwakwelusya.”
Maloŵe Gamwiŵanda
^ Kapena kuti “mkunyosya.”
^ Kapena kuti “ŵachibale ŵangu.”
^ Mu Chihebeli ŵatiga, “ŵanache ŵa m’chitumbo changu,” kugopolela kuti chitumbo chachambeleche une (chitumbo cha mama ŵangu)
^ Kapena kuti “mwamti nasigele panandi kuwa.”
^ Upanga ukusawoneka mpela chipula chekulungwa chakutema kosekose.
^ Ku Mozambique akusati “chamuko.”
