Yobu 16:1-22
16 Yobu ni ŵajanjile kuti:
2 “Pakwete pambikene yindu mpela yeleyi yejinji.
Jemanja wosope mli ŵakumyalasya ŵagamba konjechesya yakusawusya.
3 Ana maloŵe gawo gangalimbikasyaga chaleche kuŵecheta chakachi?*
Ana ni chichi chachikwatendekasya kwanga myiyi?
4 Unesoni yikakomboleche kuŵecheta mpela mwamkutendela jemanja.
Yikaŵe kuti jemanja akusimana ni yakusawusya yangusimana nayoyi,Yikakomboleche kuŵecheta maloŵe gakumjamuka jemanjaSoni ngampukunyile mtwe wangu.
5 Nambo mmalo mwakutenda yeleyi une ngamlimbikasisye ni maloŵe gakutyochela pakamwa pangu,Soni maloŵe gakumyalasya gakutyochela pakamwa pangu gakamtamiche mtima pasi jemanja.
6 Naga nguŵecheta, ululu wa yakupweteka yangu ngawukunandipa,Sano naga nguleka kuŵecheta, ana ululu wanguwo chiwunandipe chamtuli?
7 Jwalakwe andendekasisye une kupela mnope.Jwalakwe ajonasile ŵandu wosope ŵa m’nyumba jangu.*
8 Nambosoni wawo angamwile une soni ŵandu ayiweni yeleyi,Mwamti kuganda kwa chilu changuchi kukupeleka umboni wakusisya une.
9 Ukali wakwe umbapulenye une, soni jwalakwe akusasunjila chakulukosi.
Jwalakwe akulosya une ukali mwakulumanya meno gakwe.
Jwalakwe akungopochesya une meso mpela kuti ndili mdani jwakwe.
10 Ŵandu awugwile pakamwa pawo kuti alimbane ni une,Soni jemanjaji ambutile likofi mwakundesya sooni.Jemanjaji akusasongana ŵajinji kuti alimbane ni une.
11 Mlungu akusambeleka une kwa ŵachinyamata,Soni jwalakwe ambonyisye une mmyala mwa ŵandu ŵakusakala.
12 Naliji pamtendele, nambo jwalakwe jwangasenye une.Jwalakwe ŵangamwile kunyuma kwa lukosi lwangu ni kundimba.Jwalakwe asomile une ni mipamba jakwe.
13 Ŵandu ŵakwe ŵakuponya mipamba asyungulile une.Jwalakwe apowele mbyo syangu soni ngakundendela chanasa.Jwalakwe ajitusulile pasi ndulu jangu.
14 Jwalakwe akusambowola une mpela lipupa.Soni jwalakwe akusambutuchila une mpela jwakuputa ngondo.
15 Une ndotile yisaka kuti mbwale,Soni une silile uchimbichimbi* wangu mwitaka.
16 Ngope jangu jichejele ligongo lya kulila,Soni chipi chisyungulile meso gangu,
17 Atamose kuti makono gangu nganigatenda yachiwawa yiliyoseSoni lipopelo lyangu lili lyeswela.
18 Mmwe chilambo chapasi mkawunichila mmyasi jangu.
Soni mkakunda kuti kulila kwangu kupate malo gakupumulila.
19 Atamose apanopano mboni jangu jili kwinani.Jwakundendela une umboni ali penani.
20 Achimjangu akunyosya unePangupopela kwa Mlungu ndili mkugwisya misosi.
21 Mundu jwine aŵe jwakwelusya magambo ga pasikati pa une ni Mlungu,Awelusye mwampaka atendele pakwelusya magambo ga mundu ni mundu mjakwe.
22 Pakuŵa sigele ni yaka yamnono,Mwamti chinjijawula m’litala lyele ngasimbujilasoni.
Maloŵe Gamwiŵanda
^ Kapena kuti “Ana chaleche chakachi kutenda masegwega.”
^ Kapena kuti “ŵandu wosope ŵakutama ni une.”
^ Kapena kuti “machili.” Mu Chihebeli ŵatiga, “msengo.”
