Yobu 12:1-25
12 Yobu ni ŵajanjile kuti:
2 “Yisyene jemanja mli ŵandu ŵakumanyilila yindu,Soni lunda luchimala pampepe ni jemanja.
3 Nambo unesoni ndili jwakupikanichisya yindu.
Une nganimba jwakusigalila pakulandanya ni jemanja.
Ana ŵani ŵangakumanyilila yeleyi?
4 Une mbele chindu chakusekasya kwa achimjangu,Mbele mpela mundu jwakuŵenda kwa Mlungu kuti amjanje.
Mundu jwakulungama soni jwangali chakulemwa aŵele chindu chakusekasya.
5 Ŵandu ŵele yindu yikwajendela chenene akusiŵanyosya ŵandu ŵakusimana ni yakusawusya,Akuganisyaga kuti yakusawusyayo yikwagwila ŵandu ŵele sajo syawo nganisitamilichika.*
6 Matenti ga yigaŵenga gali pamtendele,Soni ŵandu ŵakusamtanda melepe Mlungu pangali chachikwajogoya,Ŵandu ŵele Mlungu jwawo ali mmyala mwawo.
7 Chonde ayiwusye yinyama chiyape lunda jemanja,Ayiwusyesoni yijuni yamwinani, chiyasalile jemanja.
8 Alolechesye* chilambo chapasi, chichape jemanja lunda.Alolechesye somba sya m’nyasa chisyasalile.
9 Pa yindu yosopeyi ni ŵani ŵangakumanyililaKuti ligasa lya Yehofa ni lyalitesile yeleyi?
10 Umi wachakupanganyikwa chilichose uli mmyala mwakweSoni mmyala mwakwe mwana umi wa mundu jwalijose.
11 Ana ngati liwiwi likusapasya maloŵeMpela yalukusati lulumi pakupasya yakulya?
12 Ana ngati paja lunda lukusaŵa ni ŵandu ŵachikulile,Soni ŵandu ŵatemi kwa ndaŵi jelewu, ngati ni ŵakusapikanichisyaga yindu?
13 Mlungu akwete lunda soni machili.Akusakola chakulinga soni akusapikanichisya yindu.
14 Jwalakwe pagumulenye chinechakwe pangali jwampaka ataŵesoni.Jwalakwe pawugele chindu pangali mundu jwampaka achiwugule.
15 Jwalakwe pagalekasisye mesi kukopoka chilichose chikusajumula.Jwalakwe pagawugwile mesigo, pachilambo pakusagumbala mesi gejinji.
16 Jwalakwe akwete machili soni lunda lwakamuchisya.Mundu jwasokonechele soni jwakwatendekasya ŵane kusokonechela ali mmyala mwakwe.
17 Jwalakwe akusiŵatendekasya ŵandu ŵakusapeleka chamuko kwenda ŵangali sapato,*Soni akusiŵatendekasya ŵakwelusya kuŵa ŵakuloŵela.
18 Jwalakwe akusagopolanya ngonji syele mamwenye ŵataŵilile ŵandu,Jwalakwe akusataŵa lamba m’chiwunu mwa mamwenyego kuti aŵe achikapolo.
19 Jwalakwe akusiŵatendekasya ŵakutaga mbopesi kwenda ali ŵangali sapato,Soni jwalakwe akusiŵatyosya pampando ŵakulamulila ŵamachili.
20 Jwalakwe akusiŵatendekasya ŵandu ŵakupeleka malangiso gakudalilichika kusoŵa chakuŵechetaJwalakwe akusatyosya kuganisya chenene kwa ŵandu ŵachikulile.*
21 Jwalakwe akusiŵatesya sooni ŵandu ŵakuchimbichika,Soni akusiŵatendekasya ŵandu ŵamachili kuŵa ŵangali machili.*
22 Jwalakwe akusayisala yindu yakusokoka yayili m’chipi,Soni jwalakwe akusatendekasya kuti chipi chekulungwa chiŵe lilanguka.
23 Jwalakwe akusajitendekasya mitundu kuŵa jamachili ni chakulinga chakuti ajijonanje.Akusajitendekasya mitundu kuŵa jekulungwa ni chakulinga chakuti ajijawusye ku ukapolo.
24 Jwalakwe akusatyosya kupikanichisya kwa ŵakulongolela ŵa ŵanduSoni jwalakwe akusiŵatendekasya jemanjaji kwendajenda m’chipululu mwanganimukola matala.
25 Jemanjaji akusapapasyaga m’chipi mwele mwangali lilanguka.Akusiŵatendekasyaga jemanjaji kwendajenda mpela ŵandu ŵakolelwe.
Maloŵe Gamwiŵanda
^ Kapena kuti “sikutelesya.”
^ Kagopolele kanesoni, “aŵechete ni chilambo chapasi.”
^ Kapena kuti “ali ŵawusile chilichose.”
^ Kapena kuti “achakulungwa.”
^ Mu Chihebeli ŵatiga, “Akusatendekasya kuti lamba jwa ŵandu ŵamachili jugopoche.”
