Yesaya 41:1-29
41 “Jemanja ŵandu ŵamkutama m’yilumba, mtame jii pameso pa une kuti mumbikanile.Jemanja mitundu ja ŵandu, mpatesoni machili.
Myiche kwa une, ni mŵechete.+
Kwende tusimane pampepe kuti namlamule.*
2 Ana ŵani ŵatendekasisye kuti jwinejwakwe anyakuche kutyochela kungopokolyuŵa,+Kumŵilanga kuti aŵandichile sajo* sya Jwalakwejo,* ni chakulinga chakuti alosye chilungamo?Ana ŵani ŵakujipeleka mitundu ja ŵandu mmyala mwa jwalakwejo,Soni kumtendekasya kuti agagomeche mamwenye?+
Ana ŵani ŵakwaputa jemanjajo ni upanga* wakwe mpela luwundu,Soni ŵakwabalalikanganya jemanjajo ni ukunje wakwe mpela mipesi jajikuwululuka ni mbungo?
3 Jwalakwe akusiŵatoposya jemanjajo ni kupitaga mwangasawusyaNi sajo syakwe m’matala gakuti jwalakwejo nganapiteje chitandilile.
4 Ana ŵani ŵatesile yeleyi?Ana kutandila pandanda pene ŵani ŵaŵele ali mkujiŵilanga mibado?*
Ndili une Yehofa, jwandili Jwandanda.+Soni mpaka m’bado wakumalisya uli uyiche, chinjiŵape mwambelelemu.”+
5 Ŵandu ŵakutama m’yilumba akuyiwona yayikutendekwayi soni akutenda woga.
Wosope ŵakutama kumbesi kwa chilambo chapasi atandite kutetemela.
Jemanjajo asongangene pampepe ni kwika.
6 Jwalijose akusamkamuchisya mjakwe.Mwamti akusamsalila mlongomjakwe kuti, “Mlimbe mtima.”
7 Myoyo mundu jwalunda lwakupanganya yindu ni makono jwamlimbikasisye mundu jwakupanganya yindu ni yisyano.+Mundu jwakongola yisyano ni hamalaŴamlimbikasisye mundu jwakusyana yisyano pachipala.
Jwalakwe pakuŵecheta ya masengo gakochelela gakamwile mjakwejo akuti, “Gali chenene.”
Kaneko akuchikomelela chindu chapanganyisyecho ni misomali kuti chikagwa.
8 “Nambo mmwe Isalayeli mli jwakutumichila jwangu,+Mmwe Yakobo, jwanamsagwile,+Mwanache jwa mjangu Abulahamu,+
9 Elo, mmwe ŵanamjigele kutyochela kumbesi kwa chilambo chapasi,+Soni ŵanamŵilasile kutyochela kumadela gakutalika ga pachilambo chapasi.
Une namsalile mmwejo kuti, ‘Mmwe mli jwakutumichila jwangu.+Une namsagwile mmwejo, nganinamkana iyayi.+
10 Mkatenda woga, pakuŵa une ndili ni mmwejo.+
Mkalagasika nganisyo, pakuŵa une ndili Mlungu jwenu.+
Une chinjimlimbisya mmwejo, nditu, chinjimkamuchisya.+Nditu une chinjimkamula mmwejo ni mkono wangu wamlyo wachilungamo.’
11 Mpikane! Wosope ŵakumtumbilila mmwejo chinjatesya sooni, soni chinjatyochesya uchimbichimbi.+
Ŵandu ŵakumenyana ni mmwejo chinjapyajila mwamti ngasawonekasoni.+
12 Chimchasosasosa ŵandu ŵakusalimbana ni mmwejo, nambo ngasimwapata.Ŵandu ŵakuputana ngondo ni mmwejo chachiŵa mpela chindu chakuti nganichipagweje chitandilile, nditu yichiŵa mpela kwaliji kwangali jemanjajo.+
13 Pakuŵa une, Yehofa Mlungu jwenu, ngamwile mkono wenu wamlyo.Une ni jwangumsalila mmwejo kuti, ‘Mkatenda woga, chinamkamuchisye.’+
14 Mkatenda woga, mmwe Yakobo ŵamli mpela nyongolosi.*+Jemanja Ayisalayeli, une chinjimkamuchisya,” aŵechete yeleyi Yehofa Jwakumwombola jwenu,+ Jwamswela jwa Isalayeli.
15 “Mlole! Une namtesile mmwejo kuŵa chida chakuputila mbeju,+Elo, chida chasambano chakutema mnope.
Chimchigapondaponda matumbi ni kugakasanya,Soni chimchigatenda matumbi gamwanamwana kuŵa mpela masapi.
16 Mmwejo chimchapeta jemanjajo mpela tiligu,Mwamti mbungo jichajigala jemanjajo.Mbungo jamachili jichabalalikanganya jemanjajo.
Jemanja chimchisangalala mwa Yehofa,+Soni chimchipochela mwa Jwamswela jwa Isalayeli.”+
17 “Ŵandu ŵakusoŵa chikamuchisyo soni ŵakulaga, akusachilila mesi, nambo mesigo pangali.
Lulumi lwawo lujumwile ligongo lya njota.+
Une Yehofa chinjakamuchisya jemanjajo.+
Une Mlungu jwa Isalayeli ngasinaleka jemanjajo.+
18 Une chinjitendekasya kuti sulo sijende m’matumbi mwele mwangali yakumela yiliyose+Soni kuti m’yitiŵi mukopoche mesi.+
Chinjichichenga chipululu kuti chiŵe litanda lya mesi lyakola yakumelaSoni chilambo changali mesi kuti chiŵe malo gakola mesi gejinji.+
19 M’chipululu chinjipanda yitela ya mkungusa,Yitela ya akesha,* yitela ya maluŵa, soni yitela ya payini.+
M’chipululu chinjipanda yitela ya janipa,Pampepe ni yitela ya ashi* soni yitela ya sayipulesi.*+
20 Chinjitenda yeleyi kuti ŵandu wosope ayiwone soni amanyilile,Atejele mawiwi nambosoni apikanichisyeKuti mkono wa Yehofa ni wawutesile yeleyi,Soni kuti Jwamswela jwa Isalayeli ni jwapanganyisye yeleyi.”+
21 “Msale magambo genu,” akuŵecheta myoyo Yehofa.
“Mlondesye mbali jenu pamagamboga,” akuti myoyo Mwenye jwa Yakobo.
22 “Mpeleche umboni soni mtusalile yindu yayichitendekwa msogolo.
Mtusalile yakwamba yindu yayatendekwe munyuma,*Ni chakulinga chakuti tuyiganichisye ni kumanyilila yakuyichisya yakwe.
Kapena mtusalile yindu yayikwika msogolo.+
23 Mtusalile yayichitendekwa msogolo,Kuti tumanyilile naga jemanja mli milungu.+
Elo, mtende chinechakwe, chinga chambone kapena chakusakala,Kuti m’weji pachituchiwone chindu chachimtendecho tusimonje.+
24 Mpikane! Jemanjatu mli mpela chindu chakuti nganichipagweje chitandilile,Soni yamkombwele kutenda yili yangakamuchisya kose.+
Jwalijose jwasagwile kuŵa kumbali jenu ali jwakunyalaya.+
25 Une ndendekasisye kuti mundu jwinejwakwe anyakuche kutyochela kumpoto, mwamti chachiyika,+Elo, jwinejwakwe jwakutyochela kungopokolyuŵa+ juchachiŵilanga pa lina lyangu.
Jwalakwe chachapondaponda ŵakulamulila* mpela kuti jemanjajo ali lilongo,+Elo, mpela mwakusatendela jwagumba pakuponda lilongo lyenyoŵe.
26 Ana ŵani ŵaŵasasile yindu yeleyi kutyochela pandanda pene ni chakulinga chakuti m’weji tumanyilile?Kapena ana ŵani ŵaŵasasile yeleyi kutyochela mundaŵi ja munyumamu, ni chakulinga chakuti m’we tuŵechete kuti, ‘Yaŵaŵechete jwalakwe yili yisyene’?+
Nditu, pangali jwalijose juŵasasile yeleyi.
Pangali jwalijose juŵawandisye yakwamba yindu yeleyi.
Pangali mundu juŵapikene chilichose kutyochela kwa jemanja.”+
27 Une ni jwandanda kumsalila Siyoni kuti, “Mlole yindu yachiyitendekwe.”+
Soni ku Yelusalemu chinjitumisya mundu jwakuti akalalichile ngani syambone.+
28 Naliji mkwembecheya, nambo nganipasimanikwa jwalijose.Nganipasimanikwa mundu atamose jumo pasikati pa jemanjajo jwakupeleka malangiso.
Une naliji mkwawusya jemanjajo, nambo pangali juŵajangaga.
29 Mlole! Wosopeŵa agambile kuŵa yindu yangakamuchisya kose.*
Soni nganaŵa atesile masengo gane galigose.
Yiwanichisyo yawo yagumba yachisyano yigambile kuŵa mbungo soni nganiyiŵa yisyesyene.+
Maloŵe Gamwiŵanda
^ Kapena kuti “nam’welusye.”
^ Ŵane akusati “makawu.”
^ Pelepa akugopolela kumtumichila Jwalakwejo.
^ Upanga ukusawoneka mpela chipula chekulungwa chakutema kosekose.
^ Ŵane akusati “mipago.”
^ Pelepa akugopolela kuti Yakobo nganaŵa akombwele kulichenjela jika soni ali jwakutuluka.
^ Welewu uli mtundu wa chitela chinechakwe chakulimba soni chikusatenda maluŵa.
^ Chelechi chili chitela chekulungwa chachikusalewupa mpaka kwika mamita 15. Chitelachi chikusawoneka mpela liwu soni masamba gakwe ngagakusaŵa gakubiliŵita mnope.
^ Chelechi chili chitela chakuwoneka mpela chitela cha mkungusa.
^ Mu Chihebeli ŵatiga, “yapandanda.”
^ Kapena kuti “nduna.”
^ Kapena kuti “agambile kuŵa mpela chindu chakuti nganichipagweje chitandilile.”
