Numeli 35:1-34
35 Yehofa ŵapitilisye kuŵecheta ni Mose m’chipululu cha Mowabu chachili mwakulolegana ni msinda wa Yeliko wawuli ku lisi line lya Lusulo lwa Yolodani. Jwalakwe ŵatite,
2 “Mwasalile Ayisalayeli kuti akusosekwa kwapa Alefi misinda jakuti akatameje kutyochela pa malo gachakapochele Ayisalayeliwo mpela chipanje chawo, nambosoni akape Alefiwo malo gakusyungulila misindajo gakuti akalichisyeje yilango.
3 Alefiwo akatameje m’misindajo, nambo yilango yawo pampepe ni yinyama yawo yine yosope soni yindu yiliyose yachakakamulichisyeje masengo pakusamalila yilangoyo yikaŵeje kumalo gawo gakulichisya yilango.
4 Pa msinda uliwose wachimkape Alefiwo mkapimeje mbali syosope sya msindawo. Mkapimeje kutyochela pa lutenje lwa msindawo lutando chiŵandika mamita 450.*
5 Kutyochela pampelelepo, mkapimeje lutando chiŵandika mamita 900* kumbali jakungopokolyuŵa, lutando chiŵandika mamita 900 kumbali jakummwela, lutando chiŵandika mamita 900 kumbali jakungapililolyuŵa soni lutando chiŵandika mamita 900 kumbali jakumpoto. Mkatende yeleyi kusyungulila msinda uliwose, mwamti msindawo ukaŵeje pakatikati. Gelega ni gagachiŵa malo gawo gakuti akalichisyeje yilango.
6 “Misinda jakuti mkape Alefiwo jikaŵe misinda 6 jakuti mundu jwawuleje mjakwe akatilileje, nambosoni mkape misinda jine jakwana 42.
7 Misinda josope jachimkape Alefiwo jikakwane 48. Mkape misinda jeleji pampepe ni malo gakwe gakulichisya yilango.
8 Misinda jakuti mkape jemanjajo jikatyocheleje pamalo gapochele Ayisalayeli. Kutyochela ku mbumba* jachijikapochele misinda jejinji, mkajigalesoni misinda jejinji, soni kutyochela ku mbumba jachijikapochele misinda jamnono, mkajigalesoni misinda jamnono. Mbumba jilijose jikapeje Alefi misinda mwakamulana ni ukulu wa malo gajipochele mbumbajo.”
9 Yehofa ŵapitilisye kuŵecheta ni Mose kuti,
10 “Mŵechetane ni Ayisalayeli. Mwasalile jemanjajo kuti, ‘Sambano mkomboka Lusulo lwa Yolodani kwinjila m’chilambo cha Kanani.
11 Pachimkajinjile m’chilambocho mkalisagulile misinda jakuti jikaŵeje malo gakutilila mundu jwawuleje mjakwe mwangosi. Misindajo jikaŵe pamalo pakuti mundu jwawuleje mjakwe mwangosijo akatilileje mwangasawusya.
12 Misinda jeleji jikaŵeje malo genu gakutilila ni chakulinga chakuti mundu jwakusaka kuwuchisya chiwa cha mundu jwawulajidwejo akampata.* Yeleyi yikaŵeje myoyo kuti mundu jwawuleje mjakwejo akawulajidwa mkanaŵe kwimbidwa magambo pameso pa ŵandu.
13 Gelega ni masengo ga misinda 6 jachimkape Alefijo.
14 Jemanja chimchilisagulila misinda jitatu ku lisi alino lya Lusulo lwa Yolodani kuti jiŵe malo gakutilila soni misinda jitatu pesi lusulolu m’chilambo cha Kanani.
15 Mundu jwalijose jwawuleje mjakwe mwangosi, chinga Myisalayeli kapena mundu jwamtundu wine jwakutama pasikati penu, atilileje ku umo mwa misinda 6 jeleji.
16 “‘Nambo naga mundu amputile mjakwe ni chisyano mwamti mundujo ni kuwa, mundu jwatesile yeleyi akwete magambo gakuwulaga. Mundu jwawuleje mjakwejo awulajidweje nditu.
17 Naga mundu amputile mjakwe ni liganga mwamti mjakwejo ni kuwa, mundu jwatesile yeleyi akwete magambo gakuwulaga. Mundu jwawuleje mjakwejo awulajidweje nditu.
18 Naga mundu amputile mjakwe ni chitela mwamti mjakwejo ni kuwa, mundu jwatesile yeleyi akwete magambo gakuwulaga. Mundu jwawuleje mjakwejo awulajidweje nditu.
19 “‘Mundu jwakuwuchisya chiwa cha mundu jwawulajidwejo ni jwakusosekwa kumwulaga mundu jwawuleje mjakwejo. Jwalakwe amwulajeje mundu jwawuleje mjakwejo palipose pachamsimanepo.
20 Naga mundu amtutile mjakwe ligongo lyakuti ŵaŵenganaga najo mwamti mjakwejo ni kuwa, kapena naga mundu amponyisye mjakwe chindu ni nganisyo syakusakala* mwamti mjakwejo ni kuwa,
21 kapenasoni naga mundu amputile mjakwe ni mkono wakwe ligongo lyakuti ŵaŵenganaga najo mwamti mjakwejo ni kuwa, mundu jwatesile yeleyi awulajidweje nditu. Jwalakwe akwete magambo gakuwulaga. Mundu jwakuwuchisya chiwa cha mundu jwawulajidwejo amwulajeje mundu jwamwuleje mjakwejo palipose pachamsimanepo.
22 “‘Nambo naga mundujo ŵamtutile mjakwejo mwangosi soni nganaŵenganaga najo, kapena naga ŵamponyisye mjakwejo chindu ali ŵangali nganisyo syakusala,*
23 kapenasoni naga mundu, mwangosi amponyisye liganga mjakwe nambo yili yakuti nganamwonaga, mjakwejo ni kuwa, kapena atendekasisye kuti liganga limgwile mjakwejo mwamti mjakwejo ni kuwa nambo yili yakuti mundujo nganaŵenganaga najo soni nganasakaga kumwulasya,
24 pelepo ŵandu awelusyeje magambo pasikati pa mundu jwawuleje mjakwejo ni mundu jwakuwuchisya chiwa cha mundu jwawulajidwejo pakuya yanamlamwileyi.
25 Ŵandu ŵakwelusyawo amkulupusyeje mundu jwamwuleje mjakwejo mmyala mwa mundu jwakuwuchisya chiwa cha mundu jwawulajidwejo. Kaneko mundujo awujileje ku msinda wakutilila kuŵatilile kula. Jwalakwe akatameje kweleko mpaka ali awile jwamkulungwa jwa ŵakutaga mbopesi juŵamsagwile mwakumtaga mawuta gapadela.
26 “‘Nambo naga mundu jwawuleje mjakwejo akopweche mumsinda wakwe wakutilila
27 ni jwakuwuchisya chiwa cha mundu juŵamwuleje jula amsimene jwalakwejo kusa kwa msinda wakwe wakutililawo, mwamti akumwulaga jwalakwejo, pelepo mundu jwakuwuchisya chiwa cha mundu jwawulajidwe jula ngasakola magambo galigose ga myasi.
28 Yeleyi yili myoyo ligongo lyakuti jwalakwe nganasosekwaga kukopoka mumsinda wakwe wakutilila mpaka jwamkulungwa jwa ŵakutaga mbopesi ali awile. Nambo jwamkulungwa jwa ŵakutaga mbopesi pawile, mundu juŵamwuleje mjakwe jula mpaka awujile kumangwakwe.
29 Mkakuyeje yindu yanamlamwileyi pamkwelusya magambo mpela gelega ku mibado* jenu josope mpaka kalakala kulikose kwachimkatamejeko.
30 “‘Mundu jwalijose jwawuleje mjakwe nombenajo awulajidweje naga pana maumboni. Nambo mkamwulagaga mundu naga pana umboni wa mundu jumpepe.
31 Mkasimumwombola mundu jwamwuleje mjakwe jwakwenela kuwulajidwa, mumwulajeje nditu mundu jwelejo.
32 Nambosoni mkamwombolaga mundu jwatilile mumsinda wakwe wakutilila pakusaka kuti awujile kumangwakwe, jwamkulungwa jwa ŵakutaga mbopesi mkanaŵe kuwa.
33 “‘Mkaja kuchisakasya ni myasi chilambo chachimkatamejecho, pakuŵa myasi jikusasakasya chilambo. Pangali chilichose champaka chiswejesye chilambocho ku myasi ja mundu jwawulajidwejo, akaŵe mundu jwamwuleje mjakwejo nombenajo awulajidwe.
34 Mkachisakasya chilambo chachimtameje chele unesoni chindameje. Pakuŵa une, Yehofa, ngutama pasikati pa jemanja Ayisalayeli.’”
Maloŵe Gamwiŵanda
^ Mu Chihebeli ŵatiga, “makono 1,000.” Alole Yakumbesi B14.
^ Mu Chihebeli ŵatiga, “makono 2,000.” Alole Yakumbesi B14.
^ Mundamo ja Ayuda msyenembumba ŵaŵaga mtati, mwakulekangana ni ndamo ja Ayawo jele msyenembumba akusaŵaga mjomba.
^ Mu Chihebeli ŵatiga, “ni chakulinga chakuti mundu jwakuwuchisya myasi akampata.”
^ Mu Chihebeli ŵatiga, “chindu mwakumjuŵilila.”
^ Mu Chihebeli ŵatiga, “chindu mwakumjuŵilila.”
^ Ku Mozambique akusati “geração.”
