Nehemiya 8:1-18
8 Kaneko ŵandu wosope ŵasongene mwakamulana, ku luŵala lwekulungwa lwalwaliji kusogolo kwa Geti ja ku Mesi. Jemanjaji, ŵamsalile Esala juŵaliji jwakopela Chilamusi* kuti ayiche najo buku ja Chilamusi cha Mose chele Yehofa ŵapele Ayisalayeli.
2 Myoyo Esalajo juŵalijisoni jwakutaga mbopesi jwayiche najo buku ja Chilamusijo kwa ŵanduwo. Pa guluji paliji pana achalume, achakongwe soni jwalijose jwakakombwele kupikanichisya yayikuŵechetedwa. Yeleyi yatendekwe palisiku lyandanda lya mwesi wa 7.
3 Jwalakwe jwaŵalasile mwakwesya maloŵe yayaliji m’bukuji m’luŵala lwekulungwa lwalwaliji kusogolo kwa Geti ja ku Mesi. Ŵajiŵalasile bukuji kutandila kundaŵi mpaka musi pameso pa achalume, achakongwe soni pameso pa ŵandu wosope ŵakakombwele kupikanichisya yayikuŵechetedwa, mwamti ŵanduwo ŵapikanile mwakusamala yaŵaŵalangaga m’buku ja Chilamusijo.
4 Esala jwakukopela Chilamusi* jula, jwajimi pasanja jamatabwa jiŵajilinganyisye ligongo lya yakutendekwayi. Kumkono wakwe wamlyo kwajimi Matitiya, Sema, Anaiya, Uliya, Hilikiya soni Maseya. Kumkono wakwe wamchiji kwajimi Pedaya, Misayeli, Malikiya, Hasumu, Hasi-badana, Sekaliya soni Mesulamu.
5 Esala jwawugwile bukujo ŵandu wosope ali mkulola pakuŵa jwalakwe ŵajimi penani kwapunda ŵandu wosopewo. Jwalakwe paŵawugulaga bukujo ŵandu wosopewo ŵajimi.
6 Kaneko Esala ŵamchimbichisye Yehofa Mlungu jusyesyene jwali Mlungu jwamkulungwa. Pelepo ŵandu wosopewo ŵajanjile kuti, “Ame!* Ame!, ni kukwesya makono gawo mwinani. Kaneko ŵanduwo ŵatindiŵele ni kwinama pameso pa Yehofa mpaka ngope syawo pasi.
7 Nambosoni Yesuwa, Bani, Selebiya, Yamini, Akubu, Sabetayi, Hodiya, Maseya, Kelita, Asaliya, Yosabadi, Hanani soni Pelaya ŵaŵaliji Alefi ŵalondechesyaga ŵanduwo Chilamusicho. Ŵatendaga yeleyi ŵanduwo ali chimile.
8 Jemanjaji ŵapitilisye kuŵalanga mwakwesya maloŵe m’bukujo. Ŵaŵalangaga Chilamusi cha Mlungu jusyesyene ni kulondesyaga mwakupikanika chenene soni ŵagopolelaga ŵandu Chilamusicho. Yeleyi yakamuchisye ŵanduwo kuti apikanichisye yayaŵalanjidwagayo.
9 Nehemiya juŵaliji bwanamkubwa* pandaŵijo, Esala juŵaliji jwakutaga mbopesi soni jwakukopela Chilamusi* nambosoni Alefi ŵaŵasalilaga ŵandu yakutenda, ŵasalile ŵandu wosopewo kuti, “Lelo lili lisiku lyapadela kwa Yehofa Mlungu jwawo. Myoyo ngakusosekwa kudandawula soni kulila.” Ŵaŵechete yeleyi ligongo lyakuti ŵandu wosopewo ŵaliji ali mkulila paŵapikene maloŵe ga m’Chilamusicho.
10 Ŵasalile jemanjajo kuti, “Ajawule akalye yakulya yambone* soni akamwe yakulyolyopela nambosoni akagaŵile yakulya ŵandu ŵanganakola yakulya, pakuŵa lelo lili lisiku lyapadela kwa Ambuje ŵetu. Myoyo akalitendela chanasa pakuŵa kusangalala kwakusapeleka Yehofa kuli malo gawo gakwachenjela.”*
11 Nambosoni, Alefi ŵatamikaga mitima pasi ŵandu wosopewo. Ŵasalilaga kuti, “Aleche kulila. Pakuŵa lelo lili lisiku lyapadela, myoyo akalitendela chanasa.”
12 Myoyo ŵandu wosopewo ŵanyakwiche kuja kulya ni kumwa, soni kuja kwagaŵila ŵane yakulya, nambosoni kuja kusangalala mnope. Yaliji myoyo, pakuŵa jemanjaji ŵapikanichisye maloŵe gaŵalondechesye.
13 Kaneko palisiku lyakuyichisya, ŵakulongolela ŵa maŵasa ga nyumba sya achinangolo ŵa ŵandu wosopewo, ŵakutaga mbopesi soni Alefi ŵasongangene kwa Esala jwakukopela Chilamusi* kuti apitilisye kupikanichisya maloŵe gagali mu Chilamusi.
14 Kaneko jemanjaji ŵapatile m’Chilamusimo kuti Yehofa kupitila mwa Mose ŵalamwile Ayisalayeli kuti atameje m’masakasa pandaŵi jakutenda chisangalalo m’mwesi wa 7.
15 Nambosoni ŵalamwile kuti jemanjaji alengesyeje ni kwamanyisya ŵandu m’misinda josope soni mu Yelusalemu mosope kuti, “Mnyakuche, mjawule ku chigawo* chamatumbi ni mkajigale kweleko nyambi syakola masamba sya yitela ya maolifi, nyambi sya yitela ya payini, nyambi sya yitela ya mtundu wine yakola maluŵa soni sya yitela ya kanjesa nambosoni nyambi syakola masamba sya yitela yine. Mkajigale yeleyi kuti mtaŵile masakasa mwakamulana ni yayilembedwe.”
16 Myoyo ŵanduwo ŵanyakwiche ni kuja kujigala nyambisi kuti ataŵile masakasa. Jwalijose ŵataŵile msakasa wakwe penani pa nyumba jakwe, m’maluŵala gawo, m’maluŵala ga pa nyumba ja Mlungu jusyesyene, m’luŵala lwekulungwa lwa ku Geti ja ku Mesi nambosoni m’luŵala lwekulungwa lwa ku Geti ja Efulayimu.
17 Myoyo gulu josope ja ŵandu jajawusile ku ukapolo jataŵile masakasa soni jatamaga m’masakasamo. Ayisalayeliŵa ŵasangalele mnope ligongo lyakuti nganatendeje yeleyi kutyochela m’masiku ga Yoswa mwanache jwa Nuni mpaka palisiku lyeleli.
18 Ŵaŵalangaga buku ja Chilamusi cha Mlungu. Ŵatesile yeleyi kutandila lisiku lyandanda mpaka lisiku lyakumalisya. Jemanjaji ŵatesile chisangalalo kwa masiku 7. Soni palisiku lya 8, ŵatesile msongano wapadela mwakamulana ni yachasalaga Chilamusi.
Maloŵe Gamwiŵanda
^ Kapena kuti “mlembi.”
^ Kapena kuti “mlembi.”
^ Kapena kuti “Yiŵe mmomo.”
^ Kapena kuti “Tilisata.” Lyeleli lili lina lya udindo lya Chipelesiya lya bwanamkubwa jwakulolela chigawo.
^ Kapena kuti “mlembi.”
^ Kapena kuti “yakunakana.”
^ Kapena kuti “chili machili gawo.”
^ Kapena kuti “mlembi.”
^ Ku Mozambique akusati “província.”
