Misyungu 27:1-27
27 Mkalilapililaga ni yindu yachimtende malaŵi,Pakuŵa ngamkumanyilila mwayichiŵela yindu malaŵigo.
2 Mkalilapililaga ni pakamwa penu, nambo mkunde kuti mundu jwine* amlapilile mmwejo.Ŵandu ŵane* amlapilileje ngaŵaga ngomo syenu.
3 Liganga lili lyakusitopa mnope soni mchenga uli wakusitopa,Nambo yakusawusya yakusayitandikasya mundu jwali chisilu yikusaŵa yakusitopa mnope kupunda yosopeyi.
4 Ukali ukusatendekasya ngasa soni kutumbila kukusajonanga mpela mesi gakusefuchilaNambo ana ŵani ŵampaka apilile ni jelasi?
5 Kuli kwambone kumjamuka mundu mwangasisa maloŵe, kulekangana ni kumnonyela nambo ni ngamlosya chinonyelocho.
6 Maŵanga gakwika ligongo lya mjenu jwakulupichika gali gamboneKulekangana ni mamoni gejinji gachinonyelo* gakutyochela kwa mdani.
7 Mundu jwajikwite akusakana kulya uchi wawuli m’masyega,Nambo mundu jwasala atamose yindu yakuŵaŵa akusayipikana kulyolyopela.
8 Mpela chijuni chachisokonechele* kwakutalika ni kwakuli chisusi chakweNi mwaŵelelesoni mundu jwasokonechele kwakutalikangana ni nyumba jakwe.
9 Mawuta soni yakununjilisya yikusasangalasya mtima.Ni mwayikusaŵelasoni ni mjenu jwambone jwakusamjamuka mwangapita mumbali.
10 Mkasimumjasa mjenu kapena mjawo jwa baba ŵenu,Soni mkajinjilaga m’nyumba ja jwachibale jwenu pa lisiku lyamsimene ni yakusawusya.Mjenu jwamkutama najo pakuŵandika ali jwakusosekwa kupunda jwachibale jwenu jwali kwakutalika.
11 Mwanangu mŵe ŵalunda, soni mtendekasye mtima wangu kuŵa wakusangalala,Ni chakulinga chakuti namjanje jwele jwakusanyosya une.
12 Jwakalamuka pachiweni chakogoya akusajuŵa,Nambo jwangamanyilila yindu akusagamba kupelenganya mwamti akusasimana ni yakusawusya.
13 Mumsumuleje mundu chakuwala naga asasile kuti champelechele mlendo chikole.Mumsumuleje chikole naga jwalakwe ŵasasile kuti chachimtendela yeleyi jwamkongwe jwachilendo.*
14 Naga mundu jwine akumpa upile mlongomjakwe mwagumila mnope kumasikusiku,Mlongomjakwejo mpaka ayiwone yeleyi mpela kuti gali matembelelo.
15 Jwamkongwe jwamkamwa ali mpela msakasa wangawukuleka kusulula palisiku lya wula.
16 Mundu jwampaka amkombole jwamkongwe jwelejo nikuti mpaka ajikombolesoni kujilekasya mbungoSoni mpaka akombole kugakamula mawuta ni mkono wakwe wamlyo.
17 Chisyano chikusanola chisyano chijakwe,Ni mwayiŵelelesoni kuti mundu akusanola mundu mjakwe.
18 Mundu jwakusachisamalila chitela cha mkuju chachilya yisogosi yakwe,Soni mundu jwakusiŵasamalila ambuje ŵakwe chachipochela uchimbichimbi.
19 Mpela mwayikusaŵela kuti mesi gakusalosya chiwulili cha ngope ja mundu,Myoyosoni mtima wa mundu ukusalosya mwauŵelele mtima wa mjakwe.
20 Malembe soni malo gachonasiko* gangajikutagaNi mwayiŵelelesoni ni meso ga mundu gele gangajikutaga ata panandi.
21 Silifa akusajenjela mumpika wakwe wakwenjela soni golide akusajenjela mu ng’anjo ja motoMyoyosoni mundu akusalinjidwa ni maloŵe gakumlapilila gapochele.*
22 Chisilu atamose kuchitwa ni mwisiMpela mwatukusatendela pakutwa mbeju mu lituliUchisilu wakwewo nganiwuŵa utyosile.
23 Mkusosekwa mmanyilileje chenene kawoneche ka yilango yenu.
Msisamalileje chenene* ngondolo syenu,
24 Pakuŵa chipanje nganichiŵa chitemi mpaka kalakala,Atamose chisoti chauchimbichimbi nganichiŵa chitemi kumibado josope.
25 Manyasi gakubiliŵitila gakusajumula, soni gasambano gakusasipuka,Mwamti yakumela ya m’matumbi akusayisonganganya kuti yiŵe yakulya ya yilango.
26 Ngondolo syamwana soni syelume sikusampatikasya ubweya wakupanganyila yakuwala,Soni mpaka msumisye mbusi syelume ni kupata mbiya syakusumila mgunda.
27 Soni chimchikola mkaka wa mbusi wakwanila kulya,Wakwanila kulisya liŵasa lyenu lyosope, soni wakwanila kwalisya ŵakutumichila ŵenu ŵachakongwe.
Maloŵe Gamwiŵanda
^ Mu Chihebeli ŵatiga, “mlendo.”
^ Mu Chihebeli ŵatiga, “mlendo.”
^ Kagopolele kanesoni, “gangatyochela pasi pa mtima, gagamba kulikanganichisya.”
^ Kapena kuti “chijuni chachikutila kutyochela kwachili chisusi chakwe.”
^ Kapena kuti “mundu jwachilendo.”
^ Kapena kuti “abadoni.”
^ Kapena kuti “mundu akusalosya mwaŵelele pamlapilile.”
^ Kapena kuti “Mŵicheje mtima wenu pangondolo syenu; msiloleleje chenene.”
