Misyungu 26:1-28
26 Mpela mwayikusaŵela kuti mesi gekamulane* gangasosekwa kugwa mu chawu soni wula jangasosekwa kugwa mundaŵi jagowola,Ni mwayikusaŵelasoni ni uchimbichimbi kuti wangamtama mundu jwali chisilu.+
2 Mpela mwayikusaŵela kuti pakusaŵa ligongo lyakuchitendekasya chijuni kutila soni chiŵaleŵale kuguluka,Ni mwayiŵelelesoni kuti matembelelo* gangayika pali pangali magongo.*
3 Chikoti chili chakukwapulila hachi, ngonji sili syakutaŵila kukamwa kwa bulu,+Soni ndodo jili jakukwapulila kumgongo kwa yisilu.+
4 Mkachijangaga chisilu mwakamulana ni kuloŵela kwakwe,Kuti mmwejo mkaŵa mpela jwalakwejo.
5 Mumjanjeje mundu jwali chisilu mwakumlosya kuti ali jwakuloŵela,Ni chakulinga chakuti akaganisya kuti ali jwalunda.+
6 Mundu jwakusachikulupilila chisilu ni kuchipa masengoAli mpela mundu jwalemesye sajo* syakwe ni kulipweteka msyene.
7 Msyungu wakutyochela pakamwa pa ŵandu ŵakuloŵela,Uli mpela ngongolo syakutundajila sya mundu jwamlemale.+
8 Kupeleka uchimbichimbi kwa mundu jwakuloŵela,Kuli mpela kutaŵilila liganga pa chinawo.*+
9 Msyungu wakutyochela pakamwa pa ŵandu ŵakuloŵela,Uli mpela chakumela cha miŵa chachili mmyala mwa mundu jwamkolelwe.
10 Mundu jwakusachilemba ganyu chisilu kapena mundu jwagamba kupita,Ali mpela mundu jwakuponya mipamba jwakusagamba kuliponyela mpamba ni kuwulasya nawo mundu.*
11 Chisilu chikusawilisya kutenda yindu yakuloŵela,Mpela mbwa jajikusalyasoni yindu yajitapiche.+
12 Ana mum’weni mundu jwakusaganisya kuti ali jwalunda?+
Mundu jwali jwakuloŵela akusakola chembecheyo chekulungwa kumpunda mundu jwelejo.
13 Mundu jwaulesi akusati, “Kumsewu kwana lisimba lyamachili,Pa luŵala lwa msinda pana lisimba!”+
14 Mundu jwaulesi akusagamba kuligalawusyagalawusya pa bedi pakwe,+Mpela mwalikusatendela litanga pakwendajenda malo gamo pakuliwugula ni kuliwugala.
15 Mundu jwaulesi akusaŵika mkono wakwe mu mbale ja yakulya,Nambo akusaŵa jwakupela mnope kuti anyakule mkono wakwewo ni kuwujawusya pakamwa.+
16 Mundu jwaulesi akusaganisya kuti ali jwalundaKupunda ŵandu 7 ŵajanjile yalunda.
17 Mundu jwakwamba kupita, jwakusatumbila* ni ukangani wele ngawukumkwaya,Ali mpela mundu jwakamwile mawiwi ga mbwa.+
18 Mpela mwakusatendela jwamasoka jwakusaponya mipamba jakolela moto soni mipamba jakuwulaga
19 Ni mwaŵelelesoni mundu jwakusamloŵesya mlongomjakwe panyuma pakwe ni kuŵechetaga kuti, “Ngambileje kunguluka.”+
20 Naga pangali sasu, moto ukusasima,Nagasoni pangali mundu jwamabosa, ukangani ukusamala.+
21 Makala gakusatendekasya moto kuti upitilisye kukolela soni sasu sikusatendekasya moto kuti ukolele,Ni mwakusatendelasoni mundu jwanjojo pakulimbikasya ukangani.+
22 Maloŵe ga mundu jwaunami gakusaŵa mpela yakulya yakunong’a.*Yakulyayo yikusajawula mmatumbo mwachitema.+
23 Maloŵe gachinonyelo gakutyochela kwa mundu jwamtima wakusakalaGali mpela silifa jwamkutile pa lupale.+
24 Mundu jwakusiŵaŵenga ŵane akusasiŵa uŵenganiwo ni pakamwa pakwe,Nambo mumtima mwakwe muli mugumbele yachinyengo.
25 Atamose ali mkuŵecheta mwakulosya umbone mtima, mkamkulupililaga jwalakwejo,Pakuŵa mumtima mwakwe mwana yindu yakwana 7 yayili yakunyalaya.*
26 Atamose kuti chinyengo chikusasiŵa uŵengani wakwewo,Nambo yakusakala yakwe yichiwonechela pameso pa ŵandu ŵajinji.
27 Jwakusasola lisimbo chachigwila msyene pejo,Soni mundu jwalijose jwakusayingalamula liganga, lichimnyikata msyene.+
28 Lulumi lwaunami lukusaŵengana ni mundu jwamlambwisyejo,Soni pakamwa pakuŵecheta yachinyengo pakusayikasya chonasiko.+
Maloŵe Gamwiŵanda
^ Kapena kuti “sinowo; ayesi.”
^ Ŵane akusati “malweso.”
^ Kagopolele kanesoni, “Ni mwayikusaŵelasoni kuti matembelelo gangali ligongo gangakwanilichikwa.”
^ Ŵane akusati “makawu.”
^ Chinawo chikusakamula masengo mpela legeni. Alole mbali jakuti, Kugopolela kwa Maloŵe.
^ Kapena kuti “jwakusagamba kumwulasya jwalijose.”
^ Kagopolele kanesoni, “jwakusajinjilila.”
^ Kapena kuti “yakulya yayikusasosekwa kuyimila mwakupupuluma.”
^ Kapena kuti “Pakuŵa mtima wakwe uli wakunyalaya mnope.”
