Misyungu 25:1-28
25 Ajisoni jili misyungu ja Solomoni, jiŵajikopele achalume ŵa Hesekiya mwenye jwa ku Yuda:
2 Kusunga ngani syachimsisi uli uchimbichimbi wakutyochela kwa Mlungu,Soni uchimbichimbi wa mamwenye ugonile pakuwungunya chenene ngani.
3 Mpela mwayiŵelele kuti kwinani kuli kwakutalika soni mkati mwa chilambo chapasi muli mwakusokoka,Yikusaŵasoni yakusawusya kuwungunya mtima wa mamwenye.
4 Mtyosye yangasosekwa mu silifa,Pambesi pakwe silifajo chachiŵa jwambone mnope.
5 Mumtyosye mundu jwakusakala pameso pa mwenye,Mwamti mpando waumwenyewo uchitamilichika ligongo lya chilungamo.
6 Mkalisoselaga uchimbichimbi pameso pa mwenye,Soni mkatamaga pasikati pa ŵandu ŵakumanyika,
7 Pakuŵa kuli chenene kuti mwenyewo amsalile jika kuti, “Myiche mtame apa,”
Kulekangana ni kuti amtesye sooni pameso pa mundu jwakuchimbichika.
8 Mkawutuchilaga kwawusya ngani ku luŵala lwa magambo,Nambi mpaka mtende uli naga panyuma pakwe mlongomjenujo alosisye kuti mmwejo ni ŵamli ŵakulemwa?
9 Mmasyeje ngani ni mlongomjenujo,Nambo mkasalaga kwa ŵane ngani syachimsisi syamsalilidwe,*
10 Kuti mundu jwampikanile mmwejo akamtesya sooni panyuma pakweSoni kuti mkawandisya ngani jakusakala* janganimŵa mkombwele kujimasya.
11 Maloŵe gakuŵechetedwa pandaŵi jamboneGali mpela maapulo mu mbale jasilifa.
12 Maloŵe gakwamuka ga mundu jwalundaGakusaŵa mpela ndolo syagolide soni yakusalalichisya ya golide jwambone mnope kwa mundu jwakugapikana.
13 Jwamtenga jwakulupichika kwa mundu juŵamtumileAkusaŵa mpela mesi gakusisima palisiku lyagowola,Pakuŵa jwalakwe akusasisimisya mtima wa ambuje ŵakwe.
14 Mundu jwakusalikwesya ligongo lya mtuka wele nganaŵe kupelekaAli mpela mawunde gangayikasya wula.
15 Kuwusimana mtima mpaka kumtendekasye mundu jwaudindo kukutendela yawukusaka.Maloŵe gambone mpaka gatemangule liwupa.
16 Naga mpatile uchi mgambe kulya wampaka mjikute,Ligongo naga mkulya wejinji mpaka mtapiche.
17 Mkapitagapitaga kunyumba ja mlongomjenu,Kogopela kuti mlongomjenujo mpaka apele namwe ni kutanda kumŵenga.
18 Mundu jwakwete umboni waunami wakulimbana ni mlongomjakweAli mpela chibonga, upanga* soni lipanga lyakutema.
19 Kumkulupilila mundu jwangadalilichika pandaŵi ja yakusawusyaYili mpela lino lyebeduche soni lusajo lwelemale.
20 Jwakusamjimbila nyimbo mundu jwakwete chanasa mumtimaAli mpela mundu jwakusawula yakuwala yakwe pandaŵi jakukusisimaSoni ali mpela soda pamumtasile finyo jwakujulujusya.
21 Naga mdani jwenu* jimkwete sala, mumpe yakulya alye.Naga jimkwete njota mumpe mesi amwe.
22 Naga mkutenda yeleyi chimchiŵa kuti kumwunjichila makala gamoto pa mtwe pakwe,*Mwamti Yehofa chachimpa upile mmwejo.
23 Mbepo ja kumpoto jikusayikasya wula jejinji,Soni lulumi lwakuŵecheta yamiseche lukusatendekasya ngope kuwoneka jaukali.
24 Kuli chenene kutama pakona pa msakasaKulekangana ni kutama m’nyumba yimpepe ni jwamkongwe jwamkamwa.
25 Utenga wambone wakutyochela kuchilambo chakwakutalikaUkusaŵa mpela mesi gakusisima kwa mundu jwapesile.
26 Mundu jwakulungama jwakusakunda kuti mundu jwakusakala amsokonasyeAli mpela ngalande jamatope soni ali mpela chisima chejonasiche.
27 Kulya uchi wejinji nganikuŵa kwambone,Kusakasoni uchimbichimbi wa mundu jwine nganikuŵa kwambone.
28 Mundu jwakusalepela kulamulila ukali wakwe,Ali mpela msinda wele lutenje lwakwe lwagumwiche.
Maloŵe Gamwiŵanda
^ Kapena kuti “ngani syachimsisi sya ŵane.”
^ Kapena kuti “ngani jakupeka jampaka jijonanje mbili ja ŵane.”
^ Upanga ukusawoneka mpela chipula chekulungwa chakutema kosekose.
^ Mu Chihebeli ŵatiga, “mundu jwakusamŵenga mmwejo.”
^ Pelepa akugopolela kuwutendekasya mtima wa mundujo kuti ujoloŵe soni kumkamuchisya kuti atendeje yindu yambone.
