Misyungu 21:1-31
21 Mtima wa mwenye uli mpela sulo syamesi mmyala mwa Yehofa.
Jwalakwe akusawulongolela kulikose kwakusaka.
2 Yakutenda yosope ya mundu yikusaŵa yambone kwa jwalakwejo,Nambo Yehofa ni jwakusawungunya mitima.*
3 Kutenda yindu yakuŵajilwa soni yachilungamoKukusamsangalasya mnope Yehofa kupunda mbopesi.
4 Meso gakulikwesya soni mtima wakunyada yayili ulemwaYili nyali ja ŵandu ŵakusakala.
5 Yakulinga ya mundu jwakulimbichila yikusatendekwa,Nambo ŵandu wosope ŵakusatenda yindu mwakupupuluma akusaŵa ŵakulaga.
6 Chipanje chakupata ligongo lyakulambusyaChili mpela lipundugulu lyalikusatyoka mwachitema, nambosoni chili mpela chitega chakuwulaga.*
7 Yindu yachiwawa yakusatenda ŵandu ŵakusakala yichajonanga jemanjajo,Pakuŵa jemanjaji akusakana kutenda yindu yachilungamo.
8 Litala lya mundu jwakulemwa likusaŵa lyepindichepindiche,Nambo yakutenda ya mundu jwamswejele yikusaŵa yambone.
9 Yili chenene kutama pakona ja msakasaKulekangana ni kutama m’nyumba yimpepe ni jwamkongwe jwamkamwa.
10 Mundu jwakusakala akusasachilila kutenda yakusakala.Jwalakwe jwangamlosya chinonyelo mlongomjakwe.
11 Mundu jwakunyosya papochele chilango,* mundu jwangamanyilila yindu akusapata lunda.Soni jwalunda palijiganyisye yindu yejinji akusaŵa jwakumanyilila yindu.
12 Mlungu jwali jwakulungama akusamanyilila yayikutendekwa m’nyumba ja mundu jwakusakala.Jwalakwe akusiŵatendekasya ŵakusakala kusimana ni yakusawusya.
13 Jwalijose jwangakusapikanila kulila kwa ŵandu ŵakutulukaNombenajo chachiŵilanga nambo pangali jwachachimjanga.
14 Mtuka wakupeleka mwakusisa ukusanandiya ukali,Soni kuwonga kwakuwonjela kumbali kukusanandiya ukali wekulungwa.
15 Jwakulungama patesile yindu yachilungamo akusaŵa jwakusangalala,Nambo kwa ŵandu ŵakusakala kutenda yachilungamo kukusaŵa kwakogoya.
16 Mundu jwalesile litala lya lundaChachipumula yimpepe ni ŵandu ŵaŵawile.
17 Mundu jwakusanonyela kusangalala* chachiŵa jwakulaga.Soni jwakusanonyela finyo ni mawuta ngasasichila.
18 Jwakusakala chachipelechedwa pakumwombola mundu jwakulungama,Soni mundu jwa mtima wachinyengo chachijigalidwa mmalo mwa mundu jwakulungama.
19 Kuli chenene kutama m’chipululuKulekangana ni kutama yimpepe ni jwamkongwe jwamkamwa soni jwakupesya.
20 Chipanje chamtengo wapenani soni mawuta yikusasimanikwa m’nyumba ja mundu jwalunda,Nambo mundu jwakuloŵela akusajonanga yindu yakwete.
21 Mundu jwakulingalinga kuŵa jwakulungama soni kola chinonyelo chakulupichikaChachipata umi, chilungamo, soni uchimbichimbi.
22 Mundu jwalunda mpaka akwele* msinda wa ŵandu ŵamachiliSoni mpaka agajonanje machili gakugadalila jemanjajo.
23 Mundu jwakusapalolela chenene pakamwa pakwe soni lulumi lwakweAkusaliŵambasya ku yakusawusya.
24 Mundu jwakulikwesya, jwakusalilosya ni yindu yakwete soni jwakulilapililaNi jwamkusamkolanga kuti akusatenda yindu mwakunyada soni mwangasamala ni yindu yachasimane nayo.
25 Yindu yakusayisachilila mundu jwaulesi yichimwulaga,Pakuŵa makono gakwe gakusakana kukamula masengo.
26 Lisiku lyosope jwalakwe akusakumbila yindu mwakutunduka,Nambo mundu jwakulungama akusaŵa jwakupeleka jwangawumilaga.
27 Mbopesi ja mundu jwakusakala jili jakunyalaya.
Ni kuli uli pakujipeleka mbopesijo ni yakulinga yachabe.
28 Mboni jaunami jichijonanjidwa,Nambo umboni wakupelechedwa ni mundu jwakupikanila mwakusamala uchiŵa wakamuchisya.
29 Mundu jwakusakala akusagamba kulilosya mpela kuti ali jwakulimba mtima,Nambo jwakulungama akusasagula litala lyakuŵajilwa kuti ajende.
30 Pangali lunda kumanyilila yindu kapena malangiso gampaka gasisyane ni Yehofa.
31 Hachi akusajikosechelekasya lisiku lya ngondo,Nambo chikulupusyo chikusatyochela kwa Yehofa.
