Misyungu 14:1-35
14 Jwamkongwe jwakwete lunda lusyesyene akusataŵa nyumba jakwe,+Nambo jwakuloŵela akusajigwisya ni magasa gakwe.
2 Mundu jwakusatenda yindu yachilungamo akusamjogopa Yehofa,Nambo mundu jwele matala gakwe gali gachinyengo* akusamnyosya jwalakwejo.
3 Maloŵe gakulikwesya ga mundu jwakuloŵela gali mpela chikoti chakupelechela chilango,*Nambo pakamwa pa mundu jwalunda pakusamchenjela msyenejo.
4 Naga pangali ng’ombe chakulila cha ng’ombe chikusaŵa chetakate,Nambo pakusaŵa yakulya yejinji naga pana ng’ombe jajikusalima.
5 Mboni jakulupichika jangalambusya,Nambo mboni jaunami jikusaŵecheta yaunami ndaŵi syosope.+
6 Mundu jwakunyosya akusalusosasosa lunda nambo jwangalupataga,Nambo kumanyilila yindu kukusayika mwangasawusya kwa mundu jwakusapikanichisya yindu.+
7 Mumtalichile mundu jwakuloŵela,Pakuŵa nganimŵa mpatile lunda kutyochela pakamwa pakwe.+
8 Lunda lukusamkamuchisya mundu jwakalamuka kupikanichisya litala lyakwenda,Nambo ŵakuloŵela, uchisilu wawo ukusiwaloŵesya.*+
9 Ŵandu ŵakuloŵela ŵangadandawulaga palemwisye,*+Nambo ŵandu ŵambone, akusasachilila kulinganya yalemwisye.
10 Mundu akusamanyilila jika kupweteka kwa mtima wakwe,Soni mundu jwine nganaŵa amanyilile mtima wa jwine pawukusangalala.
11 Nyumba ja ŵandu ŵakusakala jichijonanjidwa,+Nambo tenti ja mundu jwakulungama jichitama mpaka kalakala.
12 Pana litala lyalikusawoneka mpela lyakuŵajilwa kwa mundu,+Nambo pambesi pakwe litalalyo likusamlongolela ku chiwa.+
13 Mundu mpaka apikane kupweteka mumtima mwakwe atamose pakuseka,Soni kusangalala mpaka kugalawuche ni kuŵa kulila.
14 Mundu jwamtima wakusakala akusagowola yakuyichisya ya yindu yakusatenda,+Nambo mundu jwambone akusagowola yambone ligongo lya yindu yakusatenda.+
15 Mundu jwangamanyilila yindu akusakulupililaga maloŵe galigose,Nambo jwakalamuka akusaganichisya mwakwendela.+
16 Mundu jwakalamuka akusatenda yindu mwakusamala soni akusaŵambala yakusakala,Nambo jwakuloŵela akusatenda yindu mwangasamala soni mwakulidalila.
17 Mundu jwakusatumbila chitema akusatenda yindu mwakuloŵela,+Nambo mundu jwakusaganisya kaje mkanatende yindu, ŵandu akusamŵenga.
18 Ŵandu ŵangamanyilila yindu chachiŵa ŵakuloŵela,Nambo ŵakalamuka chachawecha kumanyilila yindu mpela chisoti chauchimbichimbi.+
19 Ŵandu ŵakusakala chachisosekwa kutindiŵala pameso pa ŵandu ŵambone,Soni ŵandu ŵakusakala chachitindiŵala pa mageti ga ŵandu ŵakulungama.
20 Mundu jwakulaga akusaŵenjedwa atamose ni achalongo achimjakwe,+Nambo mundu jwakusichila akusakola achimjakwe ŵajinji.+
21 Jwalijose jwakumnyosya mlongomjakwe ali jwakulemwa,Nambo jwalijose jwakusamlosya chanasa mundu jwakutuluka chachiŵa jwakusangalala.+
22 Ŵandu ŵakusalinganya yachiwembu chachisokonechela.
Nambo ŵandu ŵakusalingalinga kutenda yambone, ŵane chachalosya chinonyelo chakulupichika soni chachatendela yindu mwakulupichika.+
23 Kukamula masengo mwakulimbichila kukusampindulisya mundu,Nambo gambaga kuŵecheta kukusamtendekasya mundu kuŵa jwakulaga.+
24 Chisoti chauchimbichimbi cha ŵandu ŵalunda chili chipanje chawo,Nambo uchisilu wa ŵandu ŵakuloŵela ukusagambaga kupitilisya.+
25 Mboni jakusala yisyene jikusakulupusya umi,Nambo mboni jachinyengo jikusaŵecheta yaunami ndaŵi syosope.
26 Mundu jwakusamjogopa Yehofa akusamkulupilila mnope jwalakwe mu yosope yakutenda,+Mwamti ŵanache ŵa mundu jweleju chachipata malo gakuuŵa.+
27 Kumjogopa Yehofa kuli chisima cha umi,Kukusamkamuchisya mundu kuŵambala yitega yakuwulaga.
28 Ŵandu patupile mwenye akusachimbichika,+Nambo jwakulamulila jwangali ŵandu, ulamusi wakwe ukusamala.
29 Mundu jwangatumbila chitema ali jwakupikanichisya mnope yindu,+Nambo mundu jwangawusimana mtima akusalosya uchisilu wakwe wosope.+
30 Kuwusimana mtima kukusakamuchisya chilu kuŵa chambone,Nambo jelasi* jikusatendekasya mawupa kuwola.+
31 Mundu jwakusamjiŵila mwachinyengo mundu jwakutuluka akusaŵa ali mkumnyosya juŵampanganyisye,+Nambo mundu jwakusamlosya chanasa mundu jwakulaga akusaŵa ali mkumchimbichisya juŵampanganyisye.+
32 Mundu jwakusakala chachisimana ni yakusawusya ligongo lya yindu yakusakala yakusatenda,Nambo mundu jwakulungama chachipata malo gakuuŵa ligongo lya kulupichika kwakwe.+
33 Mundu jwakupikanichisya yindu jwangalilapilila kuti akwete lunda,+Nambo chisilu chikusagombelesya ya yindu yakumanyilila.
34 Chilungamo chikusawukwesya mtundu wa ŵandu,+Nambo ulemwa ukusiwatendekasya ŵandu kutenda sooni.
35 Mwenye akusasangalala ni jwakutumichila jwakusatenda yindu mwalunda,+Nambo jwalakwe akusamtumbilila jwakutumichila jwakusatenda yindu yakutesya sooni.+
