Ngani Syambone Syaŵalembile Mateyu 8:1-34
8 Yesu paŵatulwiche mwitumbimo, gulu jekulungwa ja ŵandu jamkuyisye.
2 Kaneko jwayiche mundu jwamatana ni kumtindiŵalila, ni jwaŵechete kuti, “Ambuje, naga akusaka, mpaka aswejesye.”
3 Myoyo Yesu ŵatambasukwile mkono wakwe ni kumkamula mundujo, ni ŵamsalile kuti, “Elo ngusaka! Mŵe ŵaswela.” Ndaŵi jijojo ulwele wamatanawo wamasile.
4 Kaneko Yesu ŵamsalile kuti, “Mlolechesye kuti mkasimumsalila jwalijose, nambo mjawule, mkalilosye kwa ŵakutaga mbopesi, soni mkapeleche mbopesi jaŵalamwile Mose kuti uŵe umboni kwa jemanjajo.”
5 Paŵagambile kwinjila mu msinda wa Kapelenawo, jwamkulungwa jwa asilikali jwayiche kwa jwalakwe, ni kumchondelela
6 kuti, “Ambuje, jwakutumichila jwangu ali chigonele m’nyumba, akulwala ulwele wakuwa yiŵalo mwamti akulepela kwenda.”
7 Jwalakwe ŵamjanjile kuti, “Pachimbiche kweleko, chingamposye.”*
8 Jwamkulungwa jwa asilikalijo jwatite, “Ambuje, une nganimba mundu jwakuŵajilwa kuti wawo ayiche kunyumba jangu, nambo agambe kuŵecheta maloŵe, ni jwakutumichila jwangu chalame.
9 Pakuŵa unesoni ndili mundu jwaulamusi, soni ngwete asilikali ŵangusinalolela. Panamsalile jwine kuti, ‘Mjawule ako!’ akusajawulaga, soni panamsalile jwine kuti, ‘Myiche!’ akusayikaga, nambosoni panamsalile kapolo jwangu kuti, ‘Mtende ayi!’ akusatendaga.”
10 Yesu paŵapikene yeleyi, jwasimonjile mnope ni ŵasalile ŵandu ŵaŵamkuyaga kuti, “Kusala yisyene, mwa ŵandu wosope mu Yisalayeli nganinamsimaneje mundu jwachikulupi chekulungwa mpela chelechi.
11 Nambo une ngumsalila kuti ŵajinji ŵakutyochela kungopokolyuŵa ni kundiŵililolyuŵa chachiyika ni chachitama pa tebulo kuti alye ni Abulahamu, Isaki soni Yakobo mu Uchimwene wakwinani.
12 Nambo ŵanache ŵa Uchimwene chachaponya kusa kuchipi. Kweleko ni kuchachilila soni kulumanya meno.”
13 Kaneko Yesu ŵamsalile jwamkulungwa jwa asilikalijo kuti, “Jawulagani kumangwenu. Pakuŵa mlosisye chikulupi, yimkusakayo yitendekwe.” Ndaŵi jijojo jwakutumichila jula jwalamile.
14 Sambano Yesu paŵajinjile m’nyumba ja Petulo, ŵasimene akwegwe ŵawo Petulo ali chigonele, chilu chili chikolele moto.
15 Myoyo ŵakamwile mkono wawo, ni ŵaŵele chenene, kaneko ŵajimwiche ni kutanda kwalinganyila yakulya.
16 Nambo chakumagulo, ŵandu ŵayiche nawo kwa jwalakwejo ŵandu ŵajinji ŵaŵakwete yiŵanda, mwamti jwalakwe jwakopwesye yiŵandayo ni maloŵepe soni jwaposisye wosope ŵaŵaliji mkulwala,
17 pakwanilisya yaŵaŵechete Mlungu kupitila mwa jwakulochesya Yesaya kuti, “Jwalakwe ŵatyosisye yilwele yetu soni ŵajigele yakupweteka yetu.”
18 Yesu paŵayiweni kuti gulu ja ŵandu jimsyungulile mnope, ŵasalile ŵakulijiganya ŵakwe kuti ajombochele lisi line lya nyasa yimpepe ni jwalakwejo.
19 Kaneko mlembi jwine jwayiche pa jwalakwejo ni kumsalila kuti, “Mwalimu, une chinakuyeje kulikose kuchajawuleje.”
20 Nambo Yesu ŵamjanjile kuti, “Makule gakwete mbanga syakwe soni yijuni yikwete yisusi, nambo Mwanache jwa mundu nganakola atamose pagoneka mtwe wakwe.”
21 Kaneko jwine mwa ŵakulijiganya ŵakwe jwatite, “Ambuje, angunde njawule kaje ngasiche malilo ga baba ŵangu.”
22 Yesu ŵamsalile jwalakwejo kuti, “Mpitilisye kunguya une, soni mwaleche ŵawe kuti ŵasicheje ŵawe achimjawo.”
23 Kaneko Yesu ni ŵakulijiganya ŵakwe ŵakwesile liboti.
24 Sambano panyasapo patandite chimbungo chamachili, mwamti mesi gatandite kwinjila mwibotimo, nambo Yesu ŵaliji mlugono.
25 Jemanjajo ŵapite kukumjimusya mwakuŵecheta kuti, “Ambuje, atukulupusye, chituwetu m’we!”
26 Nambo jwalakwe ŵasalile jemanjajo kuti, “Ligongo chichi mkutenda woga chamti myiyi, jemanja ŵachikulupi chapanandimwe?” Kaneko ŵajimwiche ni kujilekasya mbungo soni nyasajo, mwamti kwatesile bata.
27 Myoyo ŵanduwo ŵasimonjile mnope, ni ŵatite, “Ana mundu jweleju ali jwamtuli? Atamose mbungo ni nyasa eti yikumpikanila.”
28 Paŵayiche lisi line lya nyasa, mu chigawo* cha Agadala, ŵasimene ni achalume ŵaŵili ŵaŵakwete yiŵanda ali mkutyochela kumalembe. Achalumeŵa ŵaliji ŵakogoya mnope, mwamti pangali mundu juŵalimbaga mtima kupita msewu welewo.
29 Kaneko achalumeŵa ŵagumisile kuti, “Ana akusaka chichi kwa m’weji, wawo Mwanache jwa Mlungu? Ana ayiche kukutupa chilango* ndaŵi jakwe mkanijikwane?”
30 Nambo chapakutalichila ni paŵaliji jemanjaji, paliji pana maguluŵe gejinji gagaliji mkulya.
31 Myoyo yiŵandayo yatandite kumchondelela jwalakwejo kuti, “Naga akusaka kutukoposya, atutumisye m’maguluŵego.”
32 Jwalakwe ŵayisalile kuti, “Jawulani!” Myoyo yakopweche ni kuja kwinjila m’maguluŵego, kaneko maguluŵe gosopego gawutwiche kutyochela pachikwesya ni kuliponya m’nyasa mwamti gawilile m’mesimo.
33 Nambo ŵaŵalisyaga maguluŵego ŵatisile, soni paŵajinjile mumsinda, ŵasasile chilichose, kupwatikapo ngani jakwamba achalume ŵaŵakwete yiŵanda ŵala.
34 Kaneko ŵandu wosope ŵa mumsindamo ŵayiche kukuwonegana ni Yesu, mwamti paŵam’weni jwalakwejo, ŵamŵendile kuti atyoche mu chigawo chawocho.
Maloŵe Gamwiŵanda
^ Kapena kuti, “chingamlamisye.”
^ Ku Mozambique akusati “província.”
^ Ŵane akusati “chamuko.”
