Masengo ga Ŵandumetume 26:1-32
26 Myoyo Agilipa ŵamsalile Paulo kuti, “Sambano mpaka mŵechete mbali jenu.” Pelepo Paulo ŵakwesisye mkono wakwe ni kutanda kuŵecheta mbali jakwe kuti:
2 “Mwenye Agilipa, lelojino nguliwona kuti jwana upile kuŵecheta mbali jangu pameso pawo pakwamba yindu yosope yakunjimba magambo Ayuda.
3 Pakuŵa wawojo akusamanyilila chenene miyambo josope ja Ayuda nambosoni ngani syakusanonyela kangana. Myoyo ngwaŵenda kuti ambikanile mwakuwusimana mtima.
4 “Yanatendaga kutandila ndili mwanache, pandaŵi jinatamaga ni ŵandu ŵa mtundu wangu soni panaliji ku Yelusalemu, yili yakumanyika kwa Ayuda wosope
5 ŵaŵamanyililaga une. Naga jemanjajo akusaka, mpaka andendele umboni kuti une naliji Mfalisi. Sambanotu Afalisi akusakuya malamusi mwakusamala mnope kupunda Ayuda ŵane.
6 Nambo lelo une ngwimbidwa magambo ligongo lyakuti ngwembecheya yindu yele Mlungu ŵayisasile kwa achinangolo ŵetu.
7 Nombenasyo mbumba 12 sya Yisalayeli kwele m’wejo twatyochele, syalimbichilaga kumtumichila jwalakwejo musi ni chilo, pakwembecheya kutendekwa kwa yindu yeleyi. Nambotu Mwenye, une Ayuda akunjimba magambo ligongo lya chembecheyo chelechi.
8 “Ligongo chichi jemanja akuganisya kuti yili yangakomboleka Mlungu kwajimusya ŵawe?
9 Nambotu une nasimichisye mumtima mwangu kutenda yiliyose pakulimbana ni lina lya Yesu jwa ku Nasaleti.
10 Yeleyitu ni yanatesile kwene ku Yelusalemu, mwamti nawugalilaga m’nyumba ja ukayidi ŵaswela ŵajinji, pakuŵa ŵakulolela ŵakutaga mbopesi ŵambele machili gakutendela yeleyi. Soni jemanjaji paŵaliji mkuwulajidwa, une najitichisyaga.
11 Une nalagasyaga jemanjajo m’masunagoge mosope pakusaka kwakanganichisya kuti aleche yakusakulupilila. Soni ligongo lyakuti natumbilile mnope jemanjajo, naliji mkwalagasya mpaka nayiche ku misinda jine.
12 “Sambano pandaŵi jine, najawulaga ku Damasiko ligongo ŵakulolela ŵakutaga mbopesi ŵambele machili ni kunduma kuti ngatende yeleyi kweleko.
13 Wawo Mwenye, musi tuli pamsewu, nagambile kukuwona kuŵala kutyochela kwinani kwakupunda kuŵala kwa lyuŵa kuli kusyungulile une soni ŵandu ŵanaliji nawo.
14 Kaneko wosope patwagwile pasi, napikene maloŵe mu Chihebeli gakuti, ‘Saulo, Saulo, ligongo chichi mkundagasya une? Mmwetu mkulipweteka mwasyene pakulimbana ni une, mpela chinyama chachikuputa ndodo jesongoche ja mundu jwakuchilongolela.’
15 Nambo une natite, ‘Ambuje, ana wawojo ali ŵani?’ Pelepo ŵanjanjile kuti, ‘Une ndili Yesu jwele mmwejo mkumlagasya.
16 Mjimuche, unetu mbonechele kwa mmwejo kuti namsagule kuti mŵe jwakutumichila soni jwakutendela umboni yindu yamyiweniyi nambosoni yindu yachinamlosye yakwamba une.
17 Une chinjimkulupusya mmyala mwa ŵandu aŵa soni mmyala mwa ŵandu ŵamitundu jine. Chinamtumisye kwa ŵandu ŵeleŵa
18 kuti mkawugule meso gawo, ni chakulinga chakuti akopoche m’chipi ni kwinjila m’kuŵala, soni kuti atyoche mu ulamusi wa Satana ni kwinjila mu ulamusi wa Mlungu. Yakuyichisya yakwe, Mlungujo chachakululuchila yakulemwa yawo, soni chachaswejesya ni kwapa mboto,* mpela muŵatendele ni ŵandu ŵane ŵakulupichika.’
19 “Myoyo, wawo Mwenye Agilipa, une nganisaka kukana yaŵalamwile Yesu paŵawonechele kwa une kutyochela kwinani.
20 Mmalomwakwe napite kukulalichila yakuti ŵandu agalawuche mtima soni agalawuchile kwa Mlungu mwakutenda yindu yakulosya kugalawuka mtima. Chandanda, napite kwa ŵandu ŵa ku Damasiko soni kaneko kwa ŵandu ŵakutama ku Yelusalemu, nambosoni napite ku madela gosope ga ku Yudeya ni kwa ŵandu ŵamitundu jine.
21 Ni ligongo lyakwe Ayuda ŵangamwile ku nyumba ja Mlungu soni ŵasakaga kumbulaga.
22 Nambope, ligongo lyakuti Mlungu akungamuchisya, ngupitilisyape mpaka lelo kulalichila ngani syambone kwa ŵandu wamba soni kwa ŵandu ŵakuchimbichika. Yanguŵecheta une yili yele peyo yaŵalembile ŵakulochesya soni Mose kuti yichitendekwa.
23 Ŵalembile kuti Klistu chachilagasidwa mpaka kuwa, soni mpela jwandanda kwimuka ku chiwa, chachilalichila ya lilanguka kwa ŵandu aŵa soni kwa ŵandu ŵamitundu jine.”
24 Paulo paŵaliji mkuŵecheta yeleyi pakulichenjela, Fesito ŵaŵechete mwakwesya maloŵe kuti, “Mmwetu Paulo mtwe wenu ngawukukamula! Kulijiganya mnope kumsokonasisye mtwe!”
25 Nambo Paulo ŵatite, “Wawo ŵakuchimbichika Che Fesito, unetu nganisokonechela mtwe. Yanguŵechetayi yili yisyesyene soni nguyiŵecheta ndili mkuganisya chenene.
26 Kusala yisyene, wawo mwenye ŵanguŵecheta nawo mwagopoka akumanyilila chenene yindu yeleyi. Soni ndili jwakusimichisya kuti pangali chindu chimo mwa yindu yeleyi chele wawojo ngakuchimanyilila, pakuŵa pangali ata chimo chachatendekwe mwakusisika.
27 Mwenye Agilipa, ana wawojo akusakulupilila yakulemba ya ŵakulochesya? Ngumanyilila kuti akusayikulupilila.”
28 Nambo Agilipa ŵamsalile Paulo kuti, “M’kandaŵi kamnono, mmwejotu mpaka mungope ni kuŵa Mklistu.”
29 Pelepo Paulo ŵatite, “Une ngupopela kwa Mlungu kuti kanga m’kandaŵi kamnono kapena ndaŵi jelewu, wawojo soni ŵandu wosope ŵakumbikanila lelo aŵe mpela une kulekapo maunyolo pega.”
30 Papopo mwenyewo ŵajimi. Nambosoni jwakulamulila Fesito, Belenise pampepe ni ŵandu ŵane ŵaŵatemi ni jemanjajo nombenawo ŵajimi.
31 Nambo jemanjaji paŵatyokaga, ŵatandite kuŵechetana kuti, “Mundu jweleju nganatenda chilichose chakwenela kumwulaga kapena kumŵika m’nyumba ja ukayidi.”
32 Kaneko Agilipa ŵamsalile Fesito kuti, “Mundu jweleju yikaŵe kuti nganaŵenda kuti akawonechele kwa Kaisala, tukamgopwele.”
Maloŵe Gamwiŵanda
^ Ŵane akusati “mbote; chakupochela.”
