Masengo ga Ŵandumetume 18:1-28
18 Kaneko Paulo ŵatyosile ku Atene ni kwawula ku Kolinto.
2 Kweleko ŵamsimene Myuda jwine lina lyakwe Akula, juŵapagwile ku Ponto. Jwalakwe pampepe ni ŵamkwakwe Pulisikila ŵaliji ali agambile kwika kwene kutyochela ku Italiya, ligongo Kilaudiyo ŵalamwile yakuti Ayuda atyoche ku Loma. Myoyo Paulo ŵapite ku liŵasali.
3 Ligongo lyakuti wosopeŵa ŵakamulaga masengo gakulandana gakupanganya matenti, jwalakwe ŵatemi kunyumba ja jemanjajo ni kukamulilaga pampepe masengogo.
4 Pa lisiku lililyose lya sabata, jwalakwe ŵaŵechetaga ngani* mu sunagoge, soni jwaliji mkuŵecheta mwakwayika pamtima Ayuda ni Agiliki ni chakulinga chakuti akulupilile maloŵe gakwe.
5 Sambano Sila ni Timoteyo paŵayiche kutyochela ku Makedoniya, Paulo ŵalipeleche mnope pakulalichila maloŵe ga Mlungu. Jwalakwe ŵaliji mkwalalichila Ayuda soni kwalosya maumboni gakusimichisya kuti Yesu ali Klistu.
6 Nambo jemanjajo ŵaliji mkulimbana ni jwalakwejo soni kumŵechetela yachipongwe. Myoyo jwalakwe ŵakung’undile yakuwala yakwe kaneko ŵasalile jemanjajo kuti, “Naga ngasimkulupuka, yenu yeleyo. Une nganingola magambo ga myasi jenu. Myoyo kutandila apano ngwawula kwa ŵandu ŵamitundu jine.”
7 Pelepo Paulo ŵatyosile kweleko* ni kwawula kunyumba ja mundu jwine jwakogopa Mlungu lina lyakwe Titiyo Yusito. Munduju nyumba jakwe jaliji mwakuŵandikana ni sunagoge.
8 Nambope Kilisipo, juŵaliji jwakulongolela mu sunagogemo, jwakulupilile mwa Ambuje pampepe ni ŵamwiŵasa mwakwe wosope. Soni ŵandu ŵajinji ŵa ku Kolintoko paŵapikene ngani syambone ŵakulupilile ni kubatisidwa.
9 Sambano chilo, Ambuje ŵawonechele kwa Paulo ni kumsalila kuti, “Mkatenda woga, nambo mpitilisye kulalichila soni mkaleka,
10 ligongo mumsinda amuno ngwete ŵandu ŵajinji ŵakuti nasonganganye. Une ndili ni mmwejo soni pangali mundu jwachachilimbana namwe kuti amwulasye.”
11 Myoyo jwalakwe ŵatemipe kukoko kwa chaka ni myesi 6 ali mkwajiganya ŵandu maloŵe ga Mlungu.
12 Sambano Galiyo paŵaliji bwanamkubwa* jwa ku Akaya, Ayuda ŵakamulene yakuti amjimuchile Paulo. Myoyo ŵamkamwile ni kwawula najo pamalo gakwimbila magambo.
13 Jemanjajo ŵatite, “Mundu aju akwajiganya ŵandu kuti amtindiŵalileje Mlungu m’litala lyakutindana ni malamusi getu.”
14 Nambo Paulo paŵasakaga kuŵecheta, Galiyo ŵasalile Ayudawo kuti, “Jemanja Ayuda, yikaŵe kuti mundu jweleju atesile chakulemwecheka kapena chakusakala chekulungwa, une ngaliji jwakoseka kumpikanila.
15 Nambo pakuŵa mkukangana ligongo lya maloŵe, mena soni malamusi genu, yeleyo chimmalane nayo mwachimsyene. Une ngangusaka kuŵa jwakulamula pa yindu yeleyo.”
16 Paŵamalisisye kuŵecheta yeleyi, ŵatopwele jemanjajo pamalopo.
17 Nambo jemanjajo ŵamkamwile Sositene juŵaliji jwakulongolela mu sunagoge, ni kutanda kumputa pasogolo pa malo gakwimbila magambogo. Nambope Galiyo ŵagambile kutama ngatenda chilichose.
18 Sambano Paulo paŵatemi kwa masiku nditu, ŵalanjile abale kweleko, kaneko ŵakwesile liboti ni kwawula ku Siliya pampepe ni Pulisikila ni Akula. Mkananyakuche ku Kenkeleya, Paulo ŵasenjile wumbo syakwe pakulosya kuti ŵatesile chilanga ni Mlungu.
19 Sambano paŵayiche ku Efeso, jwalakwe ŵalesile achimjakwe ni kwawula ku sunagoge. Kweleko ŵatandite kwajiganya Ayuda soni kwakamuchisya kupikanichisya Malemba.
20 Jemanjajo ŵamchondelele kuti atamepe kwa ndaŵi jelewu, nambo jwalakwejo ŵakanile.
21 Kaneko jwalakwe pakwalanga ŵanduwo, ŵasalile kuti, “Naga Yehofa akusaka, tuchiwoneganasoni.” Myoyo ŵakwesile liboti ku Efeso
22 ni kwawula ku Kaisaleya. Paŵayiche kweleko, ŵapite* kukuwulola mpingo kaneko ŵapite ku Antiyokeya.
23 Paŵatemi kweleko kwakandaŵi kamnono, ŵawutanditesoni ulendo wakwawula m’malo gakulekanganalekangana m’chilambo cha Galatiya soni cha Fulugiya. Ulendowu waliji wakuja kukwalimbikasya ŵakulijiganya wosope.
24 Sambano ku Efeso kwayiche Myuda jwine lina lyakwe Apolo, jwakupagwila ku Alekisandiliya. Mundu jweleju jwaliji jwakupakombola kuŵecheta mwalunda soni jwagamanyililaga chenene Malemba.
25 Munduju ŵajiganyidwe litala lya Yehofa. Mwakulongoleledwa ni msimu weswela, jwalakwe jwaliji jwakulipeleka mnope pakulalichila soni kwiganya yakwamba Yesu. Nambope jwamanyililaga ubatiso wa Yohane basi.
26 Jwalakwe ŵatandite kwiganya mu sunagoge mwakulimba mtima. Myoyo Pulisikila ni Akula paŵampikene ali mkuŵecheta, ŵamjigalile pambali ni kumlondechesya litala lya Mlungu mwakulondola.
27 Pakuŵa Apolo ŵasakaga kwawula ku Akaya, abale ŵalembele chikalata ŵakulijiganya ŵa kweleko kwaŵenda kuti ampochele chenene. Myoyo paŵayiche kweleko, jwalakwe ŵakamuchisye ŵandu ŵaŵaŵele ŵakulupilila ligongo lya umbone mtima wekulungwa wa Mlungu.
28 Ni mtima wosope, jwalakwe ŵaliji mkwalosya Ayuda pameso pa ŵandu kuti nganisyo syawo syaliji syakulemwecheka. Ŵatendaga yeleyi pakwasimichisya kutyochela m’Malemba kuti Yesu ali Klistu.
Maloŵe Gamwiŵanda
^ Kapena kuti, “jwalakwe ŵakambilanaga ni ŵandu.”
^ Pelepa akwamba ku sunagoge.
^ Bwanamkubwa jwaliji mundu jwakuŵichidwa ni boma kuti aloleleje chigawo chinechakwe.
^ Yikuwoneka kuti kuŵapiteko kwaliji ku Yelusalemu.
