Masengo ga Ŵandumetume 12:1-25
12 Pandaŵi jeleji mwenye Helodi ŵatandite kwalagasya ŵandu ŵane mumpingo.
2 Jwalakwe ŵamwuleje Yakobo mlongo mjakwe jwa Yohane ni upanga.*
3 Paŵayiweni kuti yatesileyo yasangalesye Ayuda, jwalakwe ŵamtaŵilesoni Petulo. (Yeleyi yatendekwe m’masiku ga Chisangalalo cha Mikate* Jangali Chakusasaŵisya.)
4 Myoyo ŵamkamwile ni kumponya m’nyumba ja ukayidi, ni ŵalinganyisye yakuti magulu mcheche ga asilikali gachenganeje pakumlondela. Gulu jilijose jakwete asilikali mcheche. Chakulinga cha Helodi chaliji chakuti amkoposye ni kumlosya kwa ŵandu* panyuma pa Pasika.
5 Nambo Petulo paŵaliji mu nyumba ja ukayidi, mpingo waliji mkumpopelela kwa Mlungu ni mtima wosope.
6 Sambano Helodi paŵasigele panandi kumkoposya jwalakwe, chilo chelecho Petulo ŵaliji mkugona ali amtaŵilile ni maunyolo gaŵili kwa asilikali ŵaŵili. Papalisoni asilikali ŵakulondela pamlango ŵele ŵalolelaga nyumba ja ukayidijo.
7 Nambo mwakusimonjesya, lilayika lya Yehofa lyajimi m’nyumba ja ukayidijo mwamti m’nyumbamo mwaŵasile mnope. Lilayikalyo lyamkwayiye Petulo mumbalati ni kumjimusya. Kaneko lyamsalile kuti, “Mjime mwachitemachitema!” Pelepo maunyolo gaŵamtaŵile m’makono mwakwe gagwile pasi.
8 Lilayikalyo lyamsalile jwalakwejo kuti, “M’wale yakuwala yenu soni sapato syenu.” Jwalakwe ŵatesile myoyo. Kaneko lyamsalilesoni kuti, “M’walesoni mkanjo wenu ni munguyeje.”
9 Jwalakwe ŵakopweche pasa ni kulikuyaga lilayikalyo, nambo nganamanyilila kuti yalyatendaga lilayikalyo yaliji yisyesyene, mwamti jwaganisyaga kuti syaliji sagamisi.
10 Paŵapelengenye malo gandanda soni gaŵili ga asilikali ŵakulondela, ŵayiche pa mlango wa litanga lya chisyano. Mlangowo waliji wakopochela m’nyumba ja ukayidi, kwinjila mumsinda. Pelepo litangalyo lyawugwiche lisyene. Paŵakopweche pasa, lilayikalyo lyajesile najo msewu umpepe, kaneko lyatyosile.
11 Sambano Petulo paŵayimanyi chenene yayaliji mkumtendechela, ŵatite, “Sambano nayimanyi nditu kuti Yehofa ŵatumisye lilayika lyakwe kukungulupusya mmyala mwa Helodi, soni ku yindu yele Ayuda ŵajembecheyaga kuti yindendechele.”
12 Panyuma pakumanyilila yeleyi, jwalakwe ŵapite kunyumba ja Maliya, mamagwe Yohane jwakolanjidwasoni kuti Maliko. Kweleko ŵakulijiganya ŵajinji ŵasongene pampepe ni kupopelaga.
13 Jwalakwe paŵapoposisye pamlango wekulungwa,* msikana jwamasengo, lina lyakwe Loda, jwayiche kuti amlole jwakupoposya.
14 Paŵapikene maloŵe ga Petulo, jwalakwe ŵasangalele mnope mwamti nganawugula litangalyo, nambo jwawutuchile mkati ni kuja kusala kuti Petulo ali pamlango wekulungwa.
15 Jemanjajo ŵamjanjile jwalakwejo kuti, “Mkulambusyatu mmwe.” Nambo jwalakwe ŵapitilisye kusimichisya kuti akusala yisyene. Kaneko jemanjajo ŵatandite kuŵecheta kuti, “Komboleka kuŵa lilayika lyakwe lyelelyo.”
16 Nambo Petulo nganaleka kupoposya pamlangopo. Jemanjajo paŵawugwile litangalyo ŵam’weni jwalakwejo mwamti ŵasimonjile mnope.
17 Nambo jwalakwe ŵajimiche mkono wakwe ni kwasalila kuti ajile jii! Ni ŵatandite kwasalila yaŵatesile Yehofa pakumkoposya m’nyumba ja ukayidi. Kaneko ŵasalile jemanjajo kuti, “Mkasale yeleyi kwa Yakobo ni kwa abale ŵane.” Pelepo jwalakwe ŵakopweche ni kwawula kumalo kwine.
18 Pakwachele, asilikali ŵala ŵasokonechele mnope nganisyo pangamanyilila chachimtendechele Petulo.
19 Helodi ŵatandite kumsosasosa Petulo, nambo paŵalepele kumpata, ŵapaniche asilikaliwo ni yiwusyo, kaneko ŵapeleche lilamusi lyakuti jemanjajo apochele chilango.* Kaneko Helodi ŵatyosile ku Yudeya ni kwawula ku Kaisaleya kwele ŵatemi kwandaŵi nditu.
20 Sambano Helodi ŵatumbilile mnope ŵandu ŵa ku Tulo ni ku Sidoni. Myoyo jemanjajo ŵayiche kwa jwalakwe mwakamulana, ni ŵamnyenjelele Bulasito juŵaliji jwakulolela yindu ya panyumba ja mwenye kuti ŵaŵendele mtendele. Jemanjaji ŵatesile yeleyi ligongo yilambo yawo yapataga yakulya kutyochela m’chilambo cha mwenyewo.
21 Palisiku line ŵandu paŵasongangene, Helodi ŵawete chakuwala chakwe chaumwenye ni kutama pamalo gakwimbila magambo kaneko ŵatandite kuŵecheta ni ŵanduwo.
22 Sambano ŵandu ŵaŵasongene pelepowo ŵatandite kumlapilila kuti, “Kweleko kuli kuŵecheta kwa mlungu, ngaŵaga kwa mundu!”
23 Ndaŵi jijojo lilayika lya Yehofa lyamkang’andile jwalakwejo ni ulwele ligongo nganapeleka uchimbichimbi kwa Mlungu. Papopo mbisu syamlile ni kuwa.
24 Nambo maloŵe ga Yehofa gapitilisye kuwanda mwamti ŵandu ŵajinji ŵaŵele ŵakulupilila.
25 Sambano Balanaba ni Saulo paŵapeleche chikamuchisyo ku Yelusalemu, ŵawujile ku Antiyokeya. Kweleko ŵamjigele Yohane jwakolanjidwasoni kuti Maliko.
Maloŵe Gamwiŵanda
^ Upanga ukusawoneka mpela chipula chekulungwa chakutema kosekose.
^ Mikate jakala ŵajipanganyaga ni utandi wa tiligu kapena balele.
^ Kapena kuti, “kumjimba magambo pameso pa ŵandu.”
^ Kapena kuti, “pageti.”
^ Ŵane akusati “chamuko.”
