Masalimo 96:1-13
96 Amjimbile Yehofa nyimbo jasambano.
Amjimbile Yehofa, jemanja wosope ŵakutama pachilambo chapasi.
2 Amjimbile Yehofa. Alichimbichisye lina lyakwe.
Lisiku lililyose alalichileje ngani syambone syakwamba chikulupusyo chakwe.
3 Awandisye yakwamba uchimbichimbi wakwe pasikati pa mitundu ja ŵandu,Soni yakwamba masengo gakwe gakusimonjesya pasikati pa ŵandu wosope.
4 Yehofa ali jwamkulungwa soni jwakwenela kumchimbichisya mnope.
Jwalakwejo ali jwakutesya woga mnope kujipunda milungu jine josope.
5 Milungu jine josope ja ŵandu ŵane jili milungu jangali mate,Nambo Yehofa ni Mlungu juŵapanganyisye kwinani.
6 Uchimbichimbi* ni kusalala yimsyungulile jwalakwejo.Pamalo gakwe geswela pana machili soni pali pakusalala.
7 Jemanja maŵasa ga ŵandu, mumpe Yehofa uchimbichimbi wakwe wakusaŵajilwa kupochela.Mumpe Yehofa uchimbichimbi wakusaŵajilwa kupochela ligongo lya ukulu wakwe soni machili gakwe.
8 Ampe Yehofa uchimbichimbi wakusaŵajilwa kupochela ligongo lya lina lyakwe.Myiche ni mtuka ni kwinjila nawo m’maluŵala gakwe.
9 Mumtindiŵalile Yehofa mli m’wete yakuwala yayili yeswela pameso pakwe.*Chilambo chosope chapasi chitetemele pameso pa jwalakwejo.
10 Alalichile pasikati pa mitundu ja ŵandu kuti, “Yehofa aŵele Mwenye!
Chilambo chapasi chatamilichiche, mwamti nganichiŵa chityosile pamalo gakwe.*
Jwalakwe chachawelusya ŵandu mwachilungamo.”
11 Kwinani kusangalale, soni chilambo chapasi chisangalale.Nyasa soni yindu yosope yayili mwelemo yilindime.
12 Migunda soni yindu yosope yayili mwelemo yisangalale.
Pandaŵi jijiji yitela yosope ya mungalango yigumile mwakusangalala.
13 Yisangalale pameso pa Yehofa, pakuŵa jwalakwejo akwika.*Jwalakwe akwika kukwelusya chilambo chapasi.
Jwalakwe chachichiwelusya chilambo chapasi mwachilungamoSoni chachawelusya ŵandu wosope mwakulupichika.
Maloŵe Gamwiŵanda
^ Kapena kuti, “Ukulu.”
^ Kagopolele kanesoni, “Mumtindiŵalile Yehofa ligongo lya kasalale kakwe soni kuti ali jwamswela.”
^ Kapena kuti, “nganichiŵa chitenganyiche.”
^ Kapena kuti, “ayiche.”
