Masalimo 92:1-15
Nyimbo ja palisiku lya Sabata.
92 Kumyamichila Yehofa kuli kwambone,Soni kuli kwambone kwimba nyimbo syakulichimbichisya* lina lyawo, wawo Jwakwinani Mnope.
2 Kuli kwambone kuwandisya yakwamba chinonyelo chawo chakulupichika kundaŵi kulikose,Soni yakwamba kulupichika kwawo chilo chilichose.
3 Kuli kwambone kumjimbila jwalakwejo ni chida changonji 10 soni chida changonji sitatu,Nambosoni ni chida chine changonji chakulila chenene.
4 Pakuŵa wawojo andendekasisye kuti mbe jwakusangalala ligongo lya yitendo yawo, wawo Yehofa.Ligongo lya masengo ga makono gawo ngusajimba mwakusangalala.
5 Masengo gawo gali gekulungwa mnope, wawo Yehofa.
Nganisyo syawo sili syakusokoka mnope.
6 Mundu jwalijose jwangali lunda nganaŵa ayimanyilile yeleyi.Soni mundu jwalijose jwali jwakuloŵela nganaŵa ayipikanichisye ayi:
7 Ŵakusakala pakusipuka mpela likonde,*Soni ŵandu wosope ŵakutenda yakusakala yindu payikwajendela chenene,Yeleyi yikusatendekwa kuti ŵapyajile kuti akawonekasoni mpaka kalakala.
8 Nambo wawo Yehofa, ali ŵapenani mpaka kalakala.
9 Wawo Yehofa, ŵalole adani* ŵawo.Nditu adani ŵawo chachijonasika.Wosope ŵakutenda yakusakala chachibalalikangana.
10 Nambo wawojo chachinjonjechesya machili kuti gaŵe mpela ga* ng’ombe jamkambako ja mwitinji.Chinjitipitisya chilu changu ni mawuta gambone.
11 Meso gangu gachawona adani ŵangu ali agomechedwe.Mawiwi gangu gachipikana ya kugwa kwa ŵandu ŵakusakala ŵakusalimbana ni une.
12 Nambo ŵakulungama yindu yichajendela chenene mpela chitela cha kanjesa chachikukula chenene,Soni chachikula mnope mpela chitela cha mkungusa cha ku Lebanoni.
13 Jemanjaji ali mpela yitela yaŵayipandile m’nyumba ja Yehofa.Jemanjajo chachikula chenene m’maluŵala ga nyumba ja Mlungu jwetu.
14 Atamose ali akalambele* yindu yichipitilisya kwajendela chenene.Chachipitilisya kuŵa ŵamachili* soni ŵachilu chambone,
15 Soni chachipitilisya kuwandisya yakuti Yehofa ali jwagoloka.
Jwalakwe ali lwala lwangu mwamti jwangatenda yindu yangali chilungamo
Maloŵe Gamwiŵanda
^ Kapena kuti, “kwimba nyimbo ni yida yakwimbila syakwamba.”
^ Kapena kuti, “manyasi.”
^ Ŵane akusati “achimmagongo.”
^ Mu Chihebeli ŵatiga, “wawojo chachikwesya msengo wangu kuti uŵe mpela wa.”
^ Kapena kuti, “Atamose ali amesile wuli,”
^ Mu Chihebeli ŵatiga, “ŵakwimbala.”
