Masalimo 89:1-52
Nyimbo ja Etani jwa m’liŵasa lya Sela. Masikili.*
89 Chinjijimba mpaka kalakala yakwamba yakusatenda Yehofa pakulosya chinonyelo chakwe chakulupichika.
Ni pakamwa pangu, chinjijimanyisya mibado* josope jakwika msogolo yakwamba kukulupichika kwawo.
2 Pakuŵa une mbechete kuti, “Chinonyelo chawo chakulupichika chichitamilichika mpaka kalakala,Soni kukulupichika kwawo akutamilikasisye mwakulimbangana kwinani.”
3 Wawojo ŵatite, “Une ndesile chilanga ni jwakusagulidwa jwangu.Pakwamba ya Daudi mtumiki jwangu, une lumbile ayi:
4 ‘Chinjitendekasya kuti mwanache jwenu* atame mpaka kalakala,Soni chinjitamilikasya mwakulimbangana mpando wenu waumwenye ku mibado josope.’” (Selah)
5 Wawo Yehofa, kwinani kukusikwachimbichisya wawojo ligongo lya yindu yakusimonjesya yakusatenda.Elo, ŵaswelawo akusasongana pampepe kuti ŵachimbichisye wawojo ligongo lyakulupichika kwawo.
6 Pakuŵa kwinani kwangalisoni jwine jwampaka alandane ni Yehofa.
Soni pasikati pa ŵanache ŵa Mlungu pangalisoni jwine jwakulandana ni Yehofa.
7 Gulu ja ŵaswelawo* jikusamjogopa soni kumchimbichisya Mlungu.Jwalakwe ali jwamkulungwa soni wosope ŵamsyungulile akusamjogopa.
8 Wawo Yehofa Mlungu jwa magulu ga ngondo,Ana ŵani ŵakwete machili mpela wawojo, wawo Ya?
Wawojo ali ŵakulupichika pa yindu yosope.
9 Wawojo akusajilamulila nyasa jajikalipe.Pajitesile matumbela gekulungwa, wawojo akusajitendekasya bata.
10 Wawojo ŵamjonasile Lahabi,* mwamti ŵaŵele mpela mundu jwawulajidwe.
Ni mkono wawo wamachili, ŵabalalikangenye adani* ŵawo.
11 Kwinani soni chilambo chapasi yili yawo.Chilambo chapasi soni yosope yayili mwelemo, wawojo ni ŵaŵayipanganyisye.
12 Wawojo ŵapanganyisye kumpoto soni kummwela.Litumbi lya Taboli soni lya Helimoni likusachimbichisya lina lyawo mwakusangalala.
13 Mkono wawo uli wamachili.Ligasa lyawo lili lyamachili.Soni mkono wawo wamlyo awukwesisye mwinani.
14 Wawojo akusalamulila mwagoloka soni mwachilungamo.*Wawojo akusalosya chinonyelo chakulupichika soni ali ŵakudalilichika.
15 Ŵakusangalala ali ŵandu ŵakusiŵachimbichisya wawojo pakwimba nyimbo mwakusangalala.
Wawo Yehofa, jemanjajo akusajenda mu kuŵala kwa ngope jawo.
16 Jemanjaji akusasangalala lisiku lililyose ligongo lya lina lyawo.Soni ligongo lya yindu yachilungamo yakusatenda wawojo, jemanjaji akusachimbichika.
17 Pakuŵa uchimbichimbi wa machili ga jemanjajo ukusatyochela kwa wawojo.Soni ligongo lyakuti wawojo akusatujitichisya machili getu gakusakula.*
18 Pakuŵa chakuchijila chetu chikusatyochela kwa Yehofa,Soni mwenye jwetu ali jwakutyochela kwa Jwamswela jwa Isalayeli.
19 Pandaŵi jelejo, wawojo ŵalosisye soni kwasalila ŵakutumichila ŵawo kuti:
“Une nampele machili mundu jwine jwakwe jwamachili.Namkwesisye jwakusagulidwa jwangu pasikati pa ŵandu.
20 Une namsagwile Daudi jwakutumichila jwangu.Namsagwile jwalakwejo mwakumtaga mawuta gangu gapadela.
21 Ni ligasa lyangu chinjimlimbisya jwalakwejo,Soni ni mkono wangu chinjimtendekasya kuti aŵe jwakulimbangana.
22 Pangali mdani juchachiŵilasya msongo kutyochela kwa jwalakwejo.Soni pangali mundu jwalijose jwangalungama juchachimlagasya jwalakwejo.
23 Chinjakasanya adani ŵakwe pameso pakwe,Soni chinjawulaga wosope ŵakusaŵengana ni jwalakwejo.
24 Chinjiŵa jwakudalilichika kwa jwalakwejo soni chinjimlosya chinonyelo chakulupichika,Soni machili gakwe gachikula* ligongo lya lina lyangu.
25 Mkono wakwe chinjiwuŵika pa nyasa.*Soni mkono wakwe wamlyo chinjiwuŵika pa sulo.
26 Jwalakwe chachimbilanga une kuti, ‘Wawojo ali Baba ŵangu,Mlungu jwangu soni Lwala lwangu lwakungulupusya.’
27 Une chinjimŵika jwalakwejo kuŵa mwanache jwandanda kupagwa,Mwamti chachiŵa jwamkulungwa kugapunda mamwenye gosope gapachilambo chapasi.
28 Chinjipitilisya kumlosya chinonyelo changu chakulupichika mpaka kalakala,Soni chilanga chanatesile ni jwalakwejo ngasichilepela kukwanilichikwa.
29 Chinjitendekasya kuti mwanache jwakwe* atame mpaka kalakala,Soni chinjitendekasya kuti mpando wakwe waumwenye utame mpaka kalakala mpela mwakuŵelele kwinani.
30 Naga ŵanache ŵakwe chachileka kukuya malamusi ganguSoni kuleka kutenda yindu mwakamulana ni yanalamwile,
31 Naga jemanjajo chachikasa malamusi ganguSoni kuleka kupikanila yanasalile,
32 Pelepo chinjaputa ni ndodo ligongo lya ungapikanila wawo*Soni chinjakwapula ligongo lyakulemwa kwawo.
33 Nambo une ngasindeka kumlosya jwalakwejo chinonyelo changu chakulupichikaKapena kulepela kukwanilisya chilanga changu.*
34 Une ngasingasa chilanga changuKapena kuchenga yanaŵechete ni pakamwa pangu.
35 Ligongo ndili jwamswela une lumbile kamo basi, mwamti ngasilumbilasoni kane.Elo, ngasinamlambusya Daudi.
36 Mwanache jwakwe* chachitama mpaka kalakala.Mpando wakwe waumwenye uchitama pameso pangu mpaka kalakala mpela mwaliŵelele lyuŵa.
37 Chinjiwutamilikasya mwakulimbangana mpaka kalakalaMpela mwawuŵelele mwesi wawuli mboni jakulupichika kwinani.” (Selah)
38 Nambo wawojo amjasile jwalakwejo soni amkanile.Amtumbilile mnope jwakusagulidwa jwawo.
39 Wawojo achikanile chilanga chaŵatesile ni jwakutumichila jwawo.Wawojo achinyosisye chisoti chakwe chaumwenye mwakuchiponya pasi.
40 Wawojo agumulenye lutenje lwakwe losope lwamaganga.*Yindu yosope yakumchenjela jwalakwejo wawojo ayigwisisye ni kuŵa liwunjili lyamaganga.
41 Wosope ŵakupita akumjiŵila jwalakwejo yindu yakwe.Ŵandu ŵakuŵandikana nawo akutamila kumnyosya jwalakwejo.
42 Wawojo ŵatendekasisye adani ŵakwe kuti apunde.*Atendekasisye kuti adani ŵakwe wosope asangalale.
43 Nambosoni wawojo atendekasisye kuti upanga* wakwe uŵe wangali masengo,Soni wawojo nganamkamuchisya jwalakwejo kuti awine pangondo.
44 Wawojo amasisye uchimbichimbi wakweSoni awuponyisye pasi mpando wakwe waumwenye.
45 Wawojo ajipiye masiku gawunyamata wakwe.Wawojo amtesisye sooni jwalakwejo. (Selah)
46 Wawo Yehofa, ana chalisise mpaka chakachi? Ana mpaka kalakala?
Ana ukali wawo chiwupitilisye kukolela mpela moto?
47 Akumbuchile kuti umi wangu uli wejipi.
Ana wawojo ŵapanganyisye ŵandu pali pangali chakulinga?
48 Ana pana mundu jwampaka apitilisye kutama ni umi ni ngachiwona chiwa?
Ana apali jwampaka alikulupusye ku machili ga chiwa?*
49 Wawo Yehofa, ana yindu yaŵatendaga yila pakulosya chinonyelo chawo chakulupichika yili kwapi?Ana ngati wawojo ligongo lyakulupichika kwawo ŵalumbile pakwamba yindu yeleyo kwa Daudi?
50 Wawo Yehofa, akumbuchile yakutenda ŵandu pakwanyosya ŵakutumichila ŵawo,Soni yanguti pakupilila kunyosya kwakutyochela kwa ŵandu ŵamitundu josope.
51 Akumbuchile yachipongwe yaŵechete adani ŵawo, wawo Yehofa.Akumbuchile yatite pakumnyosya jwakusagulidwa jwawo kulikose kwakwawula.
52 Nguŵenda kuti Yehofa achimbichikwe mpaka kalakala. Ame! Ame!
Maloŵe Gamwiŵanda
^ Alole Kugopolela kwa Maloŵe Gane.
^ Ŵane akusati “mipago.”
^ Mu Chihebeli ŵatiga, “mbeju jenu.”
^ Kapena kuti, “Msongano wa ŵaswelawo.”
^ Komboleka kuti pelepa akwamba chilambo cha Iguputo kapena jwakulamulila jwa chilambocho.
^ Ŵane akusati “achimmagongo.”
^ Mu Chihebeli ŵatiga, “Kugoloka soni chilungamo yili fendeshoni ja mpando wawo waumwenye.”
^ Mu Chihebeli ŵatiga, “msengo wetu ukusakwesyedwa mwinani.”
^ Mu Chihebeli ŵatiga, “msengo wakwe uchikwesyedwa mwinani.”
^ Kapena kuti, “Chinjimpa ulamusi pa nyasa.”
^ Mu Chihebeli ŵatiga, “mbeju jakwe.”
^ Kapena kuti, “ligongo lyakwimuchila kwawo.”
^ Mu Chihebeli ŵatiga, “Kapena kuŵa ŵaunami pa kukulupichika kwangu.”
^ Mu Chihebeli ŵatiga, “Mbeju jakwe.”
^ Kapena kuti, “agumulenye malo gakwe gakuuŵa gamaganga.”
^ Mu Chihebeli ŵatiga, “Wawojo akwesisye mkono wamlyo wa adani ŵakwe.”
^ Upanga ukusawoneka mpela chipula chekulungwa chakutema kosekose.
^ Kapena kuti, “ku Malembe.” Alole Kugopolela kwa Maloŵe Gane.
