Masalimo 78:1-72
-
Chisamalilo cha Mlungu soni kusoŵa chikulupi kwa Ayisalayeli
Nyimbo ja Asafu. Masikili.*
78 Jemanja ŵandu ŵangu, mpikane malamusi* gangu.Mtejele mawiwi genu kuti mpikane maloŵe ga pakamwa pangu.
2 Chinjiwugula pakamwa pangu ni kuŵecheta mu yiwanichisyo.*
Chinjiŵecheta yindu yakalakala yakusisika.*
3 Yindu yatwapikene soni kuyimanyilila,Yaŵatulondechesye m’weji achinangolo ŵetu,
4 Ngasituyisisila yisukulu yawo.Tuchiwusalila m’bado* wawukwikawoYindu yekulungwa yatesile Yehofa soni yindu yatesile jwalakwe yakulosya machili gakwe,Nditu, yindu yakusimonjesya yatesile jwalakwejo.
5 Pasikati pa ŵanache ŵa Yakobo, jwalakwe aŵisile yakwakumbusyaSoni mu Isalayeli aŵisile malamusi.Jwalakwe ŵalamwile achinangolo ŵetuKuti ŵasalileje ŵanache ŵawo yindu yeleyi,
6 Ni chakulinga chakuti nombenawo m’bado wakuyichisya,Wawuli ŵanache ŵachachipagwa msogolo, chamanyilile yindu yeleyi.
Kaneko nombenawo chiŵasalile ŵanache ŵawo.
7 Pambesi pakwe jemanjajo chachimdalilaga Mlungu.
Jemanjajo ngasaliŵalila masengo ga MlunguNambo chachipikanilaga malamusi gakwe.
8 Pelepo jemanjajo ngasaŵa mpela achinangolo ŵawo,Ŵaŵaliji m’bado wamakani soni wakwimuchila,M’bado wele mtima wawo waliji wangatamilichika*Soni wele umi wawo waliji wangakulupichika kwa Mlungu.
9 Ŵandu ŵa mu mbumba* ja Efulayimu ŵajigele maukunje kuti akapute ngondo,Nambo ŵatisile palisiku lyakuputa ngondo.
10 Jemanjajo nganasunga chilanga chiŵatesile ni MlunguSoni ŵakanile kukuya chilamusi chakwe.
11 Jemanjajo ŵaliŵalilesoni yindu yaŵatesile Mlungu,Masengo gakwe gakusimonjesya gaŵalosisye jemanjajo.
12 Jwalakwe ŵatesile yindu yakusimonjesya pameso pa achinangolo ŵawoM’chilambo cha Iguputo, ku Sowani.
13 Ŵajigaŵenye nyasa kuti jemanjajo apite pejumu,Soni ŵagajimiche mesi mpela mapupa.
14 Musi ŵalongolelaga jemanjajo ni liwundeSoni chilo chosope ŵalongolelaga jemanjajo ni moto.
15 Jwalakwe ŵakasile malwala m’chipululu,Ni kwamwesya mesi jemanjajo mpaka kwakwanila, mpela kuti gakutyochela m’nyasa jakusokoka.
16 Jwalakwe ŵakopwesye mesi gejinji kutyochela pa lwalaSoni ŵatendekasisye kuti mesigo gajendeje mpela sulo.
17 Nambo jemanjajo ŵapitilisye kulemwaPakumjimuchila Jwakwinani Mnopejo m’chipululu.
18 Jemanjajo ŵamsisyaga* Mlungu m’mitima jawoMwakumlamula jwalakwejo kuti ŵape yakulya yaŵayisachililaga.
19 Myoyo ŵatandite kusisyana ni Mlungu,Mwakuŵecheta kuti, “Ana Mlungu mpaka atupeje yakulya m’chipululu muno.”
20 Nambotu jwalakwejo ni juŵaputile lwala.Palwalapo ni pakopweche mesi, mwamti mesigo gatesile sulo.
Atamose yaliji myoyo, ŵawusisye kuti, “Ana jwalakwejo mpaka atupesoni yakulya,Kapena kwapa nyama ŵandu ŵakwe?”
21 Yehofa paŵapikene yeleyi, ŵatumbile mnope.Jwalakwe ŵamtumichisye moto Yakobo,Soni ukali wakwe wakolela moto wamgwilile Isalayeli.
22 Yaliji myoyo ligongo lyakuti jemanjajo nganamkulupilila Mlungu.Jemanjajo nganakulupilila kuti jwalakwe mpaka akombole kwakulupusya.
23 Myoyo jwalakwe ŵagalamwile mawunde gakwinani,Mwamti kwinaniko kwawugwiche.
24 Jwalakwe ŵagwichisyaga mana kuti alyeje jemanjajo,Ŵapele jemanjajo tiligu jwakwinani.
25 Ŵandu ŵalyaga yakulya ya ŵamachili.*Jwalakwe ŵapaga jemanjajo yakulya yakwakwanila.
26 Jwalakwe ŵatendekasisye kuti kwinani kupuje mbungo jakutyochela kungopokolyuŵa,Soni ni machili gakwe ŵatendekasisye kuti mbungo jakummwela jipuje.
27 Mwamti jwalakwe ŵagwisisye nyama mpela luwundu,Nditu, kwagwile yijuni yejinji mpela mchenga wa mumbali mwa nyasa.
28 Jwalakwe ŵagwisisye yijuniyo pasikati pa ŵandu ŵakwe ŵaŵakunjile matenti,Mwamti yaliji palipose kusyungulila matenti gawo gosope.
29 Jemanjajo ŵalile nyamajo mwakutunduka.Mlungu ŵapele yindu yaŵayikumbilaga.
30 Nambo lukowo lwanyamalo mkaniluŵe kwamalila,Nyamajo jili chiŵela mkamwa mwawo,
31 Ukali wa Mlungu wagwilile jemanjajo.
Jwalakwe ŵawuleje ŵandu ŵamachili pasikati pawo.Soni ŵawuleje anyamata pasikati pa Ayisalayeli.
32 Atamose kuti yeleyi yatendechele nambope ŵapitilisye kumlemwechesya jwalakwejoMwamti nganakulupilila kuti jwalakwe akusatenda yindu yakusimonjesya.
33 Myoyo jwalakwe ŵagajipiye masiku ga umi wawo kuti gamale mpela mpweya wapumwile mundu,Soni ŵatendekasisye kuti yaka ya umi wawo yimale mwakusisimuchisya ni yipwetesi.
34 Nambo ndaŵi jilijose paŵawuleje ŵane pasikati pawo, jemanjajo ŵamsosagasosaga jwalakwe.Jemanjajo ŵawujilaga kwa Mlungu ni kutanda kumdalila,
35 Ligongo jemanjajo ŵakumbuchilaga kuti Mlungu ni jwali Lwala lwawoNambosoni kuti Mlungu Jwakwinani Mnope ni jwali jwakwawombola jwawo.*
36 Nambo jemanjajo ŵamlambwisye jwalakwe ni pakamwa pawoSoni ŵaŵechetaga yaunami ni lulumi lwawo.
37 Jemajajo nganamdalilaga jwalakwejo ni mtima wawo wosope.Soni nganaŵa ŵakulupichika ku chilanga chakwe.
38 Nambo jwalakwe ŵatendelaga chanasa.Ŵakululuchilaga* yakulemwa yawo mwamti nganiŵajonanga.
Mmalo mwakulosya ukali wakwe wosope,Ndaŵi syejinji jwalakwe nganiŵatumbililaga.
39 Pakuŵa jwalakwe ŵakumbuchilaga kuti jemanjajo ali ŵandu ŵa chilu chanyama,Ali mpela mbungo jakupita jangawujilasoni.*
40 Ndaŵi syejinji jemanjajo ŵamjimuchilaga jwalakwejo m’chipululuMwamti jemanjajo ŵamkuŵasyaga jwalakwejo m’chipululu.
41 Mwakuwilisyawilisya, jemanjajo ŵamlingaga Mlungu,Soni ŵamtendekasyaga Jwamswela jwa Isalayeli kuti aŵeje jwakudandawula mnope.*
42 Jemanjajo ŵaliŵalile machili gakwe,*Machili gaŵalosisye jwalakwe palisiku lyaŵakulupwisye* kwa adani* ŵawo.
43 Ŵaliŵalile yimanyisyo yaŵatesile jwalakwejo m’chilambo cha IguputoSoni yakusimonjesya yaŵatesile mu dela ja Sowani.
44 Ŵaliŵalilesoni yaŵatite jwalakwe pakugachenga mesi ga mungalande syakutyochela mu Lusulo lwa Nailo ni kuŵa myasiNi chakulinga chakuti ŵandu akamwa mwesi kutyochela mungalandesyo.
45 Jwalakwe ŵatumisye membe kuti syalumenje jemanjajoSoni ŵatumisye yiwula* kuti yalagasyeje jemanjajo.
46 Mbeju syawo ŵasipeleche ku sombe syakonanga.Nditu, yindu yaŵapatile pamasengo gawo ŵayipeleche ku sombe syaguluka.
47 Jwalakwe ŵajonasile yitela yawo ya mipeleya* ni matalilaSoni yitela yawo ya mkuju ni maganga ga matalila.
48 Jwalakwe ŵajonasile abulu ŵawo ni matalilaSoni ŵajonasile yilango yawo ni njasi.
49 Jwalakwe ŵalosisye ŵanduwo ukali wakwe.Ŵapile mnope mtima soni ŵatumbilile mnope nambosoni ŵalosisye yipwetesi.Gulu ja malayika jayikasyaga yakusawusya pa jemanjajo.
50 Jwalakwe ŵalinganyisye litala lya ukali wakwe.
Nganiŵakulupusya jemanjajo ku chiwa.Nambosoni jwalakwe ŵapeleche jemanjajo* ku mlili wa yilwele.
51 Pambesi pakwe ŵawuleje ŵanache wosope ŵandanda kupagwa m’chilambo cha Iguputo,Nditu, pakutandila pa machili gawo gakuŵeleka m’matenti ga Hamu.
52 Panyuma pakwe ŵakopwesye ŵandu ŵakwe m’chilambo cha IguputoNi kwalongolelaga jemanjajo mpela gulu ja ngondolo m’chipululu.
53 Jwalakwe ŵalongolelaga jemanjajo chenene,Mwamti nganajogopaga chilichose.Nyasa jawunichile adani ŵawo.
54 Pambesi pakwe ŵayiche nawo jemanjajo m’chilambo chakwe cheswela,M’chilambo achino chamatumbi chaŵachisumwile ni mkono wakwe wamlyo.
55 Jwalakwe ŵatopwele ŵandu ŵamitundu jine pameso pawo.Jwalakwe ŵagaŵenye chilambocho kuti chiŵe chipanje chawo mwakwalinjila ni lukonji.Kaneko jwalakwe ŵasitamiche mbumba sya Isalayeli m’simangwawo.
56 Nambo jemanjajo ŵapitilisye kusisyana ni* Mlungu Jwakwinani Mnope soni ŵamjimuchilaga jwalakwe.Jemanjajo nganasaka kupikanila yindu yaŵakumbusyaga jwalakwe.
57 Nambosoni jemanjajo ŵachenjile ni kuŵa ŵandu ŵachinyengo mpela muŵaŵelele achinangolo ŵawo.
Jemanjajo ŵaliji ŵangadalilichika mpela ukunje wangakunjika chenene.
58 Ŵapitilisye kumlemwechesya jwalakwejo pamalo gakwela gakutindiŵalila milungu jaunami,Mwamti ŵamtumbilikasisye* mnope jwalakwe ni milungu jawo jakusepa.
59 Mlungu paŵayiweni yeleyi ŵapile mnope mtima.Myoyo jwalakwe ŵakanile Ayisalayeli.
60 Pambesi pakwe, jwalakwe ŵachilesile chitenti chakwe ku Silo,Chitenti chaŵaliji ali mkutama jwalakwejo chachaliji pasikati pa ŵandu.
61 Jwalakwe ŵakundile kuti chimanyisyo chakwimila machili gakwe chijawule ku ukapolo.Ŵakundile kuti uchimbichimbi wakwe uŵe mmyala mwa adani ŵakwe.
62 Jwalakwe ŵakundile kuti ŵandu ŵakwe awulajidwe ni upanga*Soni ŵatumbilile mnope ŵandu ŵakwewo, ŵali chipanje chakwe.
63 Moto watinisye anyamata ŵakwe,Soni asikana ŵakwe nganajimbilidwa nyimbo sya pa ukwati.*
64 Ŵakutaga mbopesi ŵakwe ŵawulajidwe ni upanga,Soni achiŵamkwawo nganalila malilo gawo.
65 Kaneko Yehofa ŵajimwiche mpela kuti akwimuka kulugono,Mpela mundu jwamachili jwakwimuka panyuma pakuti finyo jummalile mumtwe.
66 Pelepo jwalakwe ŵatopwele adani ŵakwe.Jwalakwe ŵatendekasisye jemanjajo kuti aŵe ŵakunyoseka mpaka kalakala.
67 Jwalakwe ŵajikanile tenti ja Yosefe.Jwalakwe nganajisagula mbumba ja Efulayimu.
68 Nambo ŵajisagwile mbumba ja Yuda,Jajili Litumbi lya Siyoni, lyakusalinonyela.
69 Jwalakwe ŵagatendekasisye malo gakwe geswela kuti gatamilichiche kwa ndaŵi jelewu mpela kwinani.*Nditu, mpela chilambo chapasi chaŵachipanganyisye kuti chitame mpaka kalakala.
70 Jwalakwe ŵamsagwile jwakutumichila jwakwe DaudiMwamti ŵamjigele jwalakwejo kutyochela ku machinga ga ngondolo,
71 Kwaŵaliji mkusamalila ngondolo syakonjesya.Ŵamŵisile jwalakwejo kuti aŵe m’busa jwakumsamalila Yakobo, jwakwimila ŵandu ŵakwe,Soni kuti ŵaloleleje Ayisalayeli ŵali chipanje chakwe.
72 Jwalakweju ŵaliji mkwalolela jemanjajo ni mtima wagoloka,Soni ŵatandite kwalongolela jemanjajo mwalunda.
Maloŵe Gamwiŵanda
^ Alole Kugopolela kwa Maloŵe Gane.
^ Kapena kuti, “malangiso.”
^ Mu Chihebeli ŵatiga, “mwambi.”
^ Mu Chihebeli ŵatiga, “Chinjiŵecheta ndagi syakalakala.”
^ Ŵane akusati “mpago.”
^ Mu Chihebeli ŵatiga, “waliji wangawulinganya.”
^ Alole Kugopolela kwa Maloŵe Gane.
^ Mu Chihebeli ŵatiga, “ŵamlingaga.”
^ Kapena kuti, “ya malayika.”
^ Kapena kuti, “jwakuwuchisya mmalo mwa jemanjajo.”
^ Mu Chihebeli ŵatiga, “Ŵawunichilaga.”
^ Kagopolele kanesoni, “Umi wawo ukusatyoka mwamti wangawujilasoni.”
^ Kapena kuti, “kuti yimpwetecheje mnope.”
^ Mu Chihebeli ŵatiga, “mkono wakwe.”
^ Mu Chihebeli ŵatiga, “lyaŵawombwele.”
^ Ŵane akusati “achimmagongo.”
^ Ŵane akusati “yola; malyola.”
^ Mipeleya wuli mtundu winewakwe wa yisogosi yakusayikamulichisya masengo pakupanganya finyo.
^ Mu Chihebeli ŵatiga, “ŵapeleche umi wawo.”
^ Kapena kuti, “ŵapitilisye kumlinga.”
^ Kapena kuti, “ŵamtendekasisye wiwu.”
^ Upanga ukusawoneka mpela chipula chekulungwa chakutema kosekose.
^ Mu Chihebeli ŵatiga, “Soni asikana ŵakwe nganiŵachimbichisya.”
^ Mu Chihebeli ŵatiga, “Jwalakwe ŵagataŵile malo gakwe geswela mpela kwinani.”
