Masalimo 77:1-20
Kwa jwakulongolela nyimbo. Ajimbe nyimboji pakuya kajimbe ka Yedutuni.* Nyimbo ja Asafu.
77 Ni maloŵe gangu chinjimlilila Mlungu.Chinjimlilila Mlungu mwamti jwalakwe chachimbikana.
2 Pandaŵi jasimene ni yipwetesi ngusamsosasosa Yehofa.
Chilo ngusakwesya makono gangu kwa jwalakwejo mwangalechesya.*
Pangali mundu jwakusakombola kumyalasya.
3 Pangumbuchile Mlungu, ngusatanda kuwuwula.Ngulagasika nganisyo soni machili gangu gamalile.
4 Wawojo ngakukunda kuti meso gangu gasisine.Ngutetemela mwamti nganimba ngombwele kuŵecheta.
5 Munganisyo mwangu ngukumbuchila yindu yayatendekwaga kalakala,Yindu yayatendekwaga yaka yejinji yipiteyo.
6 Chilo ngusakumbuchila nyimbo jangu.*Ngusaganichisya ya mumtima mwangu.Soni ngusawungunyawungunya munganisyo mwangu.
7 Ana Yehofa chachitujasa mpaka kalakala?
Ana jwalakwe ngasatulosyasoni umbone mtima wakwe?
8 Ana jwalakwe ngasatulosyasoni chinonyelo chakwe chakulupichika mpaka kalakala?
Ana pangali m’bado* uliwose wawuchikuwona kukwanilichikwa kwa yilanga yakwe yila?
9 Ana Mlungu aliŵalile kutulosya umbone mtima wakwe?Ana kapena chanasa chakwe chila chimasile ligongo lya ukali wakwe? (Selah)
10 Une ngutamila kuŵecheta kuti, “Yayikundagasya nganisyo* ni ayi:
Jwakwinani Mnopejo achenjile mwakusatendela yindu* ni m’weji.”
11 Chinjikumbuchila masengo ga Ya.Chinjikumbuchila yindu yakusimonjesya yaŵatesile wawojo kalakala.
12 Chinjiganichisya masengo gawo gosopeNambosoni yindu yatesile wawojo.
13 Wawo Mlungu, matala gawo gali geswela.
Wawo Mlungu, ana panasoni mlungu jwine jwali jwamkulungwa kwapunda wawojo?
14 Wawojo ali Mlungu jusyesyene jwakusatendaga yindu yakusimonjesya.
Wawojo alosisye machili gawo kwa ŵandu.
15 Ni machili gawo,* wawojo ŵakulupwisye* ŵandu ŵawo,Ŵali ŵanache ŵa Yakobo soni ŵanache ŵa Yosefe. (Selah)
16 Nyasa jaweni wawojo, wawo Mlungu.Nyasajo pajaweni wawojo jatenganyiche.
Soni nyasa jakusokoka jatesile matumbela.
17 Mawunde gagwisisye mesi gejinji.
Kulindima kwapikaniche kutyochela kwinani m’mawunde,Soni njasi syamesyaga palipose mpela kwenda kwa mipamba jawo.
18 Kulindima kwapikanikaga mpela kwenda kwa matayala ga ligaleta.*Kumesya kwa njasi kwatendekasyaga chilambo chapasi kuŵala.Chilambo chapasi chatetemele soni chatenganyiche mnope.
19 Wawojo ŵapanganyisye litala pa nyasa kuti apite.Wawojo ŵapitile pa mesi gejinji.Nambo mwasyapondaga sajo* syawo nganimuwoneka.
20 Wawojo ŵalongolele ŵandu ŵawo mpela gulu ja ngondolo.Mwamti wawojo ŵasamalilaga jemanjajo kupitila mwa* Mose soni Aloni.
Maloŵe Gamwiŵanda
^ Alole Kugopolela kwa Maloŵe Gane.
^ Mu Chihebeli ŵatiga, “nambo gangatenda mandilindili.”
^ Kapena kuti, “nyimbo jangu jakwimba ni chida cha ngonji.”
^ Ŵane akusati “mpago.”
^ Kapena kuti, “Yayikusoma mumtima mwangu.”
^ Mu Chihebeli ŵatiga, “achenjile mkono wakwe wamlyo.”
^ Mu Chihebeli ŵatiga, “Ni mkono wawo.”
^ Mu Chihebeli ŵatiga, “ŵawombwele.”
^ Ligaleta lili ngolo jakuwutidwa ni mahachi.
^ Ŵane akusati “makawu.”
^ Mu Chihebeli ŵatiga, “kupitila mumkono wa.”
