Masalimo 74:1-23
Nyimbo ja Asafu. Masikili.*
74 Wawo Mlungu, ligongo chichi atujasile m’weji mpakana kalakala?
Ligongo chichi ukali wawo wakolela moto* akuwugwichisya pa ngondolo syapamalo gawo gakulichisya yilango?
2 Ŵakumbuchile ŵandu* ŵaŵasagwile kalakala kuti aŵe ŵandu ŵawo,Mtundu waŵawuwombwele wawojo kuti uŵe chipanje chawo.
Alikumbuchile Litumbi lya Siyoni, kwele kwakusatamaga wawojo.
3 Ajawule kumalo gampaka gaŵe masame kwa ndaŵi jelewu.
Mdani* jwawo ajonasile chindu chilichose pamalo geswela.
4 Adani ŵawo akugumila mwakusangalala mkati mwa malo gawo gakutendela msongano.*
Jemanjajo aŵisile yikwangwani yawo mwelemo mpela yimanyisyo yakuwina kwawo.
5 Jemanjaji ali mpela achalume ŵajigele maŵago ni kugwisya yitela mungalango jewutale.
6 Jemanjaji ajigele maŵago soni yisyano ya ayiloni ni konanga yakwambula yosope yam’mapupa.
7 Ajochile moto malo gawo geswela.
Jemanjaji asakesye chitenti chawo chachikusamanyika ni lina lyawo, mwamti achigwisisye.
8 Jemanjaji pampepe ni ŵanache ŵawo aŵechete m’mitima mwawo kuti:
“Malo gosope ga Mlungu jwawo gakusatendela ŵandu misongano* m’chilambochi tugajoche moto.”
9 Pangali chimanyisyo chilichose chatukuchiwona.Pangali jwakulochesya jwalijose jwasigele,Soni pasikati petu pangali jwalijose jwakumanyilila kuti ana yeleyi yichimala chakachi.
10 Wawo Mlungu, ana adani ŵeleŵa chapitilisye kuŵecheta yakwanyosya mpaka chakachi?
Ana adani ŵeleŵa chapitilisye kulinyosya lina lyawo mpaka kalakala?
11 Ligongo chichi wawojo ngakongola mkono wawo wamlyo ni kutendapo kandu?
Atyosye mkono wawo pamtima pawo, ni kuwujongolo kuti ŵamasye jemanjajo.
12 Nambo Mlungu ali mwenye jwangu kutandila kalakala.Jwalakwe ni jwakusiŵakulupusya ŵandu pachilambo chapasi.
13 Ni machili gawo, wawojo ŵagatendekasisye mesi ga m’nyasa kuti gajende.Wawojo ŵayikasenye mitwe yilombo ya m’nyasa.
14 Wawojo ŵakasenye mitwe ja Lefiyatani.*Ŵasipeleche ngwenasyo kwa ŵandu ŵakutama m’chipululu kuti siŵe yakulya yawo.
15 Wawojo ŵatendekasisye mesi kuti gakopoche pasi soni kuti gatende sulo.Ŵajumwisye sulo syasikusaŵa ni mesi ndaŵi syosope.
16 Musi soni chilo yili ya wawojo.
Wawojo ni ŵaŵapanganyisye lilanguka* soni lyuŵa.
17 Wawojo ni ŵaŵaŵisile malile gosope ga chilambo chapasi.Ŵaŵisilesoni ndaŵi ja chuku soni ja chawu.
18 Wawo Yehofa, akumbuchile maloŵe gakwanyosya ga mdani jwawo.Akumbuchilesoni yakusati ŵandu ŵakuloŵela pakulinyosya lina lyawo.
19 Akawupeleka umi wa kamwanache ka njuŵa kawo kwa yinyama ya mwitinji.
Akaliŵalila mpaka kalakala umi wa ŵandu ŵawo ŵakulagasika.
20 Akaliŵalila chilanga chawo chaŵatesile ni m’weji,Pakuŵa m’malo gosope ga chipi ga pachilambo chapasi mugumbalene ni ŵandu ŵachiwawa.
21 Akakunda kuti ŵandu ŵakulagasika awujile ali ŵasooni.Nguŵenda kuti ŵandu ŵakunyoseka soni ŵakulaga alichimbichisye lina lyawo.
22 Anyakuche wawo Mlungu, soni alolechesye kuti magambo gawo gajesile mwachilungamo.
Akumbuchile yakusati ŵakuloŵela pakwanyosya wawojo lisiku lililyose.
23 Akaliŵalila maloŵe gakuŵecheta adani ŵawo.
Masegwe gakusisyana ni wawojo gakupitilisya kukwela mpaka kwinani.
Maloŵe Gamwiŵanda
^ Alole Kugopolela kwa Maloŵe Gane.
^ Mu Chihebeli ŵatiga, “wakutuka lyosi.”
^ Mu Chihebeli ŵatiga, “Awukumbuchile msongano wa ŵandu ŵawo.”
^ Ŵane akusati “mmagongo.”
^ Kapena kuti, “malo gawo gakusonganilana.”
^ Kapena kuti, “Malo gosope gakusakamulichisya masengo pakumtindiŵalila Mlungu.”
^ Alole Kugopolela kwa Maloŵe Gane.
^ Kapena kuti, “yakumulichila.”
