Masalimo 72:1-20
-
Ulamusi wamtendele wa mwenye jwa Mlungu
Nyimbo jakwamba ya Solomoni.
72 Wawo Mlungu, amkamuchisye mwenye kuti awelusyeje mwakamulana ni kawelusye kawo.Soni amkamuchisye mwanache jwa mwenye kuti atendeje yindu mwakamulana ni chilungamo chawo.
2 Nguŵenda kuti ŵandu ŵawo, jwalakwejo ŵachenjeleje mwachilungamo.Soni kuti ŵatendeleje yindu mwachilungamo ŵandu ŵakunyoseka.
3 Nguŵenda kuti matumbi gape ŵandu mtendele,Soni matumbi gamwanamwana gayikasye chilungamo.
4 Jwalakwe ŵachenjeleje* ŵakunyoseka pasikati pa ŵandu.Jwalakwe ŵakulupusye ŵanache ŵa ŵandu ŵakulaga,Soni jwalakwe ŵajonanje ŵandu ŵakwajiŵila achimjawo.
5 Ŵandu chachajogopa wawojo masiku gosope galichiŵa chiŵela lyuŵaSoni masiku gosope gawuchitama mwesi kwinani,Elo, ku mibado* josope ja msogolo.
6 Jwalakwe chachiŵa mpela wula jajikugwa pamanyasi gekatile,Mpela wula ja miwumbi jajikusajitilila chilambo chapasi.
7 Mundaŵi ja ulamusi wakwe, ŵakulungama chachisipuka mpela manyasi geŵisi,*Soni kuchiŵa kwana mtendele masiku gosope gawuchitama mwesi kwinani.
8 Jwalakwe chachalamulilaga ŵandu kutandila kunyasa jine mpaka kunyasa jine.Soni kutandila ku Lusulo* mpaka kumbesi kwa chilambo.
9 Ŵandu ŵakutama m’chipululu chachiyika ni kutindiŵala pameso pakwe,Soni adani* ŵakwe chachilapita luwundu.
10 Mamwenye ga ku Talisi soni ga muyilumba gachipelekaga msongo kwa jwalakwejo,
Mamwenye ga ku Sheba soni ku Seba gachiyika ni mituka jawo.
11 Mamwenye gosope gachiyika ni kutindiŵala pameso pa jwalakwejo,Soni mitundu josope ja ŵandu jichimtumichila jwalakwejo.
12 Jwalakwe chachakulupusya ŵakulaga ŵele akulila pakuŵenda kuti ŵakamuchisye,Soni chachakulupusya ŵakunyoseka nambosoni jwalijose jwakusoŵa ŵakumkamuchisya.
13 Jwalakwe chachatendela chanasa ŵandu ŵakunyoseka soni ŵakulaga,Nambosoni chachikulupusya umi wa ŵandu ŵakulaga.
14 Jwalakwe chachakulupusya* jemanjajo kwa ŵandu ŵakwalagasya soni ŵakwatendela yachiwawa.Pakuŵa jwalakwe chachijiwona myasi jawo kuŵa jakusosekwa.
15 Nguŵenda kuti jwalakwejo atame kwandaŵi jelewu soni apochele golide jwakutyochela ku Sheba.
Nguŵenda kuti ŵandu ampopeleleje jwalakwejo ndaŵi syosope,Soni kuti apocheleje upile ndaŵi syosope.
16 Pachilambo chapasi pachiŵa tiligu jwamjinji.Penani pa matumbi tiligu juchiŵa palipose.
Yindu yamumgunda mwakwe yichiŵa yejinji mpela ya ku Lebanoni,Soni ŵandu chachitupa m’misinda mpela yakumela ya pachilambo chapasi.
17 Nguŵenda kuti lina lyakwe litame mpaka kalakala,Soni lipikaniche masiku gosope galichiŵa chiŵela lyuŵa.
Kupitila mwa jwalakwe ŵandu apate upile,Mitundu josope ja ŵandu jiŵechete kuti jwalakwejo ali jwakusangalala.
18 Achimbichikwe Yehofa Mlungu, Mlungu jwa Isalayeli.Jwalakwejo jika ni jwakusatenda yakusimonjesya.
19 Lina lyakwe lyakuchimbichika, lichimbichiche mpaka kalakala.Uchimbichimbi wa jwalakwejo ugumbale pachilambo chosope chapasi.
Ame! Ame!
20 Pelepa ni pambesi pa mapopelo ga Daudi mwanache jwa Jese.
Maloŵe Gamwiŵanda
^ Mu Chihebeli ŵatiga, “ŵawelusyeje.”
^ Ŵane akusati “mipago.”
^ Kapena kuti, “ŵakulungama yindu yichajendela chenene.”
^ Lwelelu luli Lusulo lwa Filate.
^ Ŵane akusati “achimmagongo.”
^ Kapena kuti, “chachawombola.”
