Masalimo 58:1-11
-
Kwana Mlungu jwakusawelusya chilambo chapasi
-
Lipopelo lyakuŵenda kuti ŵape chilango ŵandu ŵakusakala (6-8)
-
Kwa jwakulongolela nyimbo. Ajimbe nyimboji pakuya kajimbe kakuti, “Akanjonanga.” Nyimbo ja Daudi. Mikitamu.*
58 Ana jemanja mpaka mŵechete yakwamba chilungamo chitamilecho mli mgambile kutama jii?
Jemanja ŵanache ŵa ŵandu, ana mpaka mwawelusyeje ŵandu mwachilungamo?
2 M’mitima mwenu mkulinganyaga yakuti mtendeje yindu mwangali chilungamo.Soni makono genu gakusaŵa gakoseka kutenda yachiwawa pachilambo chapasi.
3 Ŵakusakala akusaŵa ŵasokonechele kutyochela pakupagwa.*Akusajinjilila palitala lyakulemwecheka kwamba kutyochela papagwile.
4 Maloŵe gawo gali mpela poyisoni jwa lijoka lyakogoya.Jemanjajo ali ŵangapikana mpela litewo lyangalikusaka kupikana.
5 Ngalikusapikana kuŵilanga kwa mundu jwakutenda yamasenga,Atamose mundujo ali jwakupakombola mnope yamasengayo.
6 Wawo Mlungu, ŵakule meno jemanjajo mkamwa mwawo.
Wawo Yehofa, akasanye yipundi ya masimba gelega.
7 Jemanjajo akawonekasoni mpela mesi gagapwele.
Mlungu akunje ukunje wakwe soni ŵasome jemanjajo ni mipamba jakwe ni kwagwisya.
8 Jemanjajo aŵe mpela ngonokono jajikusasungunukuka pajikwenda.Jemanjajo aŵe mpela mwanache jwapagwile ali jwam’we ngaliwona lyuŵa.
9 Chimchikolesya moto ni mawukutu ga miŵa ni kuŵika chipoto pamotopo,Nambo chipotocho mkanichiŵe kukamula moto Mlungu chachitumisya mbungo jamachili ni kumwasanya motowo.
10 Mundu jwakulungama chachisangalala pakuyiwona kuti Mlungu ŵawuchisye adani* ŵakwe.Sajo* syakwe sichinyowa ni myasi ja ŵandu ŵakusakala.
11 Pelepo ŵandu chachiŵecheta kuti, “Nditu, mundu jwakulungama akusapochela mboto.*
Nditu kwana Mlungu jwakusawelusya chilambo chapasi.”
Maloŵe Gamwiŵanda
^ Alole Kugopolela kwa Maloŵe Gane.
^ Mu Chihebeli ŵatiga, “kutyochela m’matumbo mwa mama ŵawo.”
^ Ŵane akusati “achimmagongo.”
^ Ŵane akusati “Makawu.”
^ Ŵane akusati “mbote; chakupochela.”
