Masalimo 51:1-19
Kwa jwakulongolela nyimbo. Nyimbo jaŵajimbile Daudi panyuma pakuti jwakulochesya Natani amjamwiche ligongo lyakutenda chikululu ni Batiseba.
51 Andendele chanasa, wawo Mlungu, mwakamulana ni chinonyelo chawo chakulupichika.
Asimasye yakulemwa yangu mwakamulana ni chanasa chawo chekulungwa.
2 Anjojesye chenene kuti chakulemwa changu chityoche,Aswejesye une ku ulemwa wangu.
3 Pakuŵa une ngumanyilila chenene yakulemwa yangu,Soni ulemwa wangu uli pameso pangu* ndaŵi syosope.
4 Une nalemwechesye mnope wawojo kupunda ŵane wosope.*Ndesile chindu chachili chakusakala pameso pa wawojo.
Myoyo wawojo ngakulemwa pakunjamuka une.Soni kawelusye kawo kali kachilungamo.
5 Alole! Une napagwile ndili jwakulemwa,Soni naŵele jwakulemwa kutandila pandaŵi jaŵajigele mama ŵangu msigo wa une.
6 Alole! Wawojo akusasangalala ni mundu jwakuwona mtima.Wawo Mlungu, anjiganye une kuti ngole mtima walunda.
7 Asimasye ulemwa wangu ni hisope* kuti mbe jwamswela.Anjojesye kuti swejele chenene.
8 Angamuchisye kuti ndandilesoni kupikana kugumila kwakusangalala,Kuti nombe nago mawupa gaŵagakasenye wawojo gasangalale.
9 Ngope jawo jilole kumbali* kuti akayiwona yakulemwa yangu,Soni asimasye* yakulemwa yangu yosope.
10 Wawo Mlungu, ambe une mtima weswela,Soni aŵiche mwa une nganisyo syasambano kuti ndaŵi syosope sachilileje kutenda yambone.
11 Akandosya une pameso pawo ni kunjasa.Soni akatyosya msimu wawo weswela pa une.
12 Ambuchisye une chisangalalo changusapikana ligongo lyakuti wawojo akusangulupusya.Animbikasye une kuti ngole mtima wakusachilila kwapikanila wawojo.
13 Ŵandu ŵakukasa malamusi gawo, chinjajiganya matala ga wawojo,Kuti ŵandu ŵakulemwa awujile kwa wawojo.
14 Angulupusye une ku magambo gakuwulaga mundu,* wawo Mlungu, Mlungu jwakusangulupusya,Kuti lulumi lwangu luwandisye mwakusangalala yitendo yawo yachilungamo.
15 Wawo Yehofa, awugule ngomo syangu,Kuti pakamwa pangu pasaleje yakwachimbichisya wawojo.
16 Pakuŵa wawojo ngakusaka mbopesi, yikaŵe myoyo ngapele.Wawojotu ŵangasangalala ni mbopesi jakutinisya jamtundu.
17 Nambo mbopesi syakumsangalasya Mlungu sili mtima wakulitendela chanasa.Wawo Mlungu, mtima wakulitendela chanasa soni wakulinandiya wawojo ngasawukana.*
18 Ligongo lyakusachilila kwawo kutenda yambone, amtendele yambone Siyoni.Ataŵesoni ndenje sya Yelusalemu.
19 Pelepo, wawojo chachisangalala ni mbopesi sya chilungamo,Chachisangalala ni mbopesi syakutinisya soni mbopesi syamtundu.Kaneko ng’ombe syamkambako sichipelechedwa pamalo gawo gakupelechela mbopesi.
Maloŵe Gamwiŵanda
^ Kapena kuti, “uli munganisyo mwangu.”
^ Mu Chihebeli ŵatiga, “wawojo jika.”
^ Alole Kugopolela kwa Maloŵe Gane.
^ Kapena kuti, “Asise ngope jawo.”
^ Kapena kuti, “afufute.”
^ Mu Chihebeli ŵatiga, “magambo ga myasi.”
^ Kapena kuti, “ngasawunyosya.”
