Masalimo 45:1-17
Kwa jwakulongolela nyimbo. Nyimbo jakwimbidwa pakuya chuni cha “Maluŵa.” Nyimbo ja ŵanache ŵa Kola. Masikili.* Nyimbo ja chinonyelo.
45 Mtima wangu ukusangalala mnope ni ngani jinejakwe jambone.
Une nguŵecheta kuti, “Nyimbo janguji jili jwakwamba mwenye.”
Lulumi lwangu luŵe mpela chakulembela cha mundu jwakusakombola chenene kukopela.*
2 Mmwejo mli ŵakusalala mnope pasikati pa ŵanache ŵachalume.
Ngomo syenu sikusakoposya maloŵe gambone.
Ni ligongo lyakwe Mlungu chachimpa upile mmwejo mpaka kalakala.
3 Mtaŵilile upanga* wenu m’chiwunu mwenu, mmwe jwamachili.M’wale uchimbichimbi soni kusalala kwenu.
4 Mjawule ni uchimbichimbi wenu ni kuja kuwina ngondo.Mkwele hachi jenu kuti mkachenjele ŵandu ŵakulinandiya soni ŵandu ŵakulungama nambosoni maloŵe gasyesyene.Soni mkono wenu wamlyo ukatende* yindu yekulungwa yakusimonjesya.
5 Mipamba jenu jili jesongoche mnope, mwamti jikusagwisya ŵandu pameso penu.Mipambajo jikusasoma mitima ja adani* ŵa mwenye.
6 Mlungu ni jwampele mmwejo umwenye kuti mlamulileje* mpaka kalakala.Ndodo jaumwenye wenu jili ndodo jagoloka.*
7 Mmwejo mkusanonyela chilungamo, soni mkusaŵengana ni yindu yakusakala.
Ni ligongo lyakwe Mlungu, jwali Mlungu jwenu, ŵamsagwile mmwejo mwakumtaga mawuta soni ŵampele chisangalalo chekulungwa kupunda mamwenye gane.
8 Yakuwala yenu yosope yikununjila mule, aloye soni kasiya.Ku nyumba jaumwenye jekulungwa jesalalisye ni misengo kukwimbidwa ni yida yangonji. Nyimbosi sikusamtendekasya mmwejo kuŵa jwakusangalala.
9 Ŵanache ŵachakongwe ŵa mamwenye ali mugulu ja achakongwe ŵele mmwejo mkusimwachimbichisyaga.
Ŵamkwawo mwenye ŵali ŵakuchimbichika ajimi kumkono wenu wamlyo soni awete yindu yesalalisye ni golide jwa ku Ofili.
10 Mpikane mmwe mwanache jwamkongwe, soni mtejele liwiwi lyenu kuti mumbikane chenene.Mwaliŵalile achalongo achimjenu soni nyumba ja baba ŵenu.
11 Kusalala kwenu kwajigele mtima mwenye.Pakuŵa ŵeleŵa ali ambuje ŵenu,Myoyo mwatindiŵalile.
12 Mwanache jwamkongwe jwa ku Tulo chachiyika ni mituka.Achalume ŵakusichila mnope chachisaka kuti mwalosye umbone mtima.*
13 M’nyumba ja mwenye, mwanache jwamkongwe jwa mwenyejo ali jwakusalala mnope.Jwalakwejo awete yakuwala yesalalisye ni golide.
14 Jwalakwe chachiyika najo kwa mwenye ali awete yakuwala yakusalala mnope.*
Asikana* ŵakumpechesya nombenawo chachiyika nawo pameso pa mmwejo.
15 Jemanjajo chachiyika nawo ali mkusangalala mnope soni ali mkupochela.Jemanjajo chachijinjila m’nyumba ja mwenye.
16 Ŵanache ŵenu ŵachalume chachijigala malo ga achinangolo ŵenu.
Mmwejo chimchasagula jemanjajo kuti aŵe nduna syenu pachilambo chosope chapasi.
17 Lina lyenu chinjilimanyikasya ku mibado* josope jakwika msogolo.
Ni ligongo lyakwe mitundu ja ŵandu jichimchimbichisya mmwejo mpaka kalakala.
Maloŵe Gamwiŵanda
^ Alole Kugopolela kwa Maloŵe Gane.
^ Kapena kuti, “chakulembela cha mlembi.”
^ Upanga ukusawoneka mpela chipula chekulungwa chakutema kosekose.
^ Mu Chihebeli ŵatiga, “ukamjiganye mmwejo.”
^ Ŵane akusati “achimmagongo.”
^ Mu Chihebeli ŵatiga, “Mlungu ali mpando wenu waumwenye.”
^ Kapena kuti, “jachilungamo.”
^ Kapena kuti, “chachijoloya ngope jenu.”
^ Kagopolele kanesoni, “mikanjo jesalalisye.”
^ Mu Chihebeli ŵatiga, “Asikana ŵanganalombeleje soni nganagonejepo ni ŵalume.”
^ Ŵane akusati “mipago.”
