Masalimo 39:1-13
Kwa jwakulongolela nyimbo. Nyimbo jakwimba pakuya kajimbe ka Yedutuni.* Nyimbo ja Daudi.
39 Une natite, “Chinjijenda mwakusamalaPakogopela kulemwa ni lulumi lwangu.
Chinjisiŵa pakamwa pangu kuti ngaŵecheta chilichoseNaga mbandikene ni jwalijose jwakusakala.”
2 Natemi jii ngaŵecheta chilichose.Nganimbecheta ngani jilijose, atamose jakwamba yindu yambone,Nambo mkati mwa mtima wangu napikanaga kupweteka mnope.
3 Mumtima mwangu mwatukaga lyosi.*
Panaganichisyaga mnope,* moto wakolelaga.
Pambesi pakwe naŵechete kuti:
4 “Wawo Yehofa, angamuchisye kumanyilila mbesi ja umi wangu,Soni angamuchisye kumanyilila winji wa masiku gangwete,Kuti manyilile mwawujipipile umi wangu.*
5 Nditu, wawojo ajipiye masiku ga umi wangu.*Soni masiku ga umi wangu nganigaŵa kandu kwa wawojo.
Nditu, mundu jwalijose atamose awoneche mpela ali pambone, umi wakwe uli wejipi mpela mpweya wapumwile mundu. (Selah)
6 Nditu umi wa mundu jwalijose ukusamala mpela chiwulili.
Akusagamba kulilagasya kusosasosa yindu.*
Akusaliwunjichila chipanje, ngamanyilila kuti ŵachachilya ali ŵane.
7 Wawo Yehofa, sambano une chinjembecheyeje chichi chakuti chingamuchisye?
Wawojope ni ŵangwembecheya kuti angamuchisye.
8 Angulupusye ku yakulemwa yangu yosope.
Akakunda kuti mbe mundu jwakunyosyeka kwa ŵandu ŵangali lunda.
9 Une nagambile kutama jii, ngaŵecheta chilichose.Nganimbugula pakamwa panguLigongo wawojo ni ŵaŵatendekasisye yosopeyi.
10 Andyochesye mlili wawo wangwichisyewu.
Une masile ligongo lyakuti mkono wawo ukumbuta.
11 Wawojo akusamjongolela mundu mwakumpa chilango* pa ulemwa watesile.Wawojo akusajonanga yindu yakwe yamtengo wapenani mpela mwalikusajonanjila lipuluputwa lyakulya yakuwala.*
Nditu, umi wa mundu jwalijose uli wejipi mpela mpweya wapumwile mundu. (Selah)
12 Apikane lipopelo lyangu, wawo Yehofa,Apikane kulila kwangu kwakuŵenda kuti angamuchisye.
Akagamba kujileka misosi jangu.
Pakuŵa une ndili mlendo kwa wawojo,Ndili mpela mundu jwapaulendo jwagamba kupita* mpela muŵaŵelele achinangolo ŵangu wosope.
13 Aleche kundola ali atumbile kuti mbe jwakusangalalaMkanimbwe ni ngawonekasoni.”
Maloŵe Gamwiŵanda
^ Alole Kugopolela kwa Maloŵe Gane.
^ Mu Chihebeli ŵatiga, “Mtima wangu watesile juu.”
^ Kapena kuti, “Panapumasikaga.”
^ Kapena kuti, “Kuti manyilile kuti ndili jwakandaŵi kamnono.”
^ Mu Chihebeli ŵatiga, “Ajipiye masiku ga umi wangu ni kuŵa ligasa limo.”
^ Kapena kuti, “Akusagamba kutenda masegwe gangakamuchisya.”
^ Ku Mozambique akusati “chamuko.”
^ Pelepa akwamba lipuluputwali pandaŵi jalili chiwungu.
^ Kapena kuti, “Ndili mpela mlendo.”
