Masalimo 35:1-28
Nyimbo ja Daudi.
35 Wawo Yehofa, anjenjele une kwa ŵandu ŵakunjimba magambo.Ŵapute wosope ŵakulimbana ni une.
2 Ajigale chakuchijila chawo chamwana* soni chekulungwa,Ni anyakuche kuti anjenjele une.
3 Anyakule lipanga lyawo soni liŵago lyawo lyapangondo kuti alimbane ni ŵandu ŵakundoposya.
Wawojo asale kwa une kuti, “Une ndili chikulupusyo chenu.”
4 Ŵandu ŵakuwusosasosa umi wangu ŵatesye sooni soni atende yakuti ŵakuŵasye.
Ŵandu ŵakutenda chiwembu kuti anjonanje une atile mwakutesya sooni.
5 Jemanjajo aŵe mpela masapi gagakuwululuka ni mbungo.Lilayika lya Yehofa lyatopole jemanjajo.
6 Lilayika lya Yehofa palikwatoposya jemanjajoLitala lyawo litende chipi soni liŵe lyakutelesya.
7 Pakuŵa jemanjajo andejele lwawu mwakusisa pali pangali ligongo lililyose.Awukwile lisimbo kuti ngwile pali pangali ligongo lililyose.
8 Yakupweteka yagwile jemanjajo mwakusisimuchisya.Jemanjajo atanjile mu lwawu lwandejele unelo.Agwile mu lisimbo lyawukwilelyo ni kuwa.
9 Nambo une chinjisangalala mwa Yehofa.Chinjisangalala ligongo lya yindu yakusatenda jwalakwejo pakungulupusya.
10 Mawupa gangu gosope gachiŵecheta kuti:
“Wawo Yehofa, ana ŵani ŵali ŵakulandana ni wawojo?
Wawojo akusamkulupusya mundu jwakusoŵa ŵakumkamuchisya mmyala mwa ŵandu ŵamachili.Akusamkulupusya mundu jwakusoŵa ŵakumkamuchisya soni jwakulaga kwa ŵandu ŵakusaka kumsumula yindu.”
11 Mboni syakusakala sikusayikaNi kumbusyaga yindu yakuti nganguyimanyilila.
12 Jemanjajo akusambuchisyaga yindu yakusakala pa yindu yambone yanatendele,Mwamti ngusaŵa jwachanasa mpela jwakuwilwa.
13 Nambo jemanjajo palwasile, une nawalaga yiguduli.Nalilagasyaga mwakulijima kulya,Soni lipopelo lyangu palyatemi ngajanjidwa,
14 Najendaga ndili jwachanasa mpela ngulila malilo gamjangu kapena mlongo mjangu.Nakotimisyaga mtwe wangu mpela mundu jwakulila malilo ga mamagwe.
15 Nambo panagambile kusimana ni yakusawusya, jemanjajo ŵasangalele ni kusongana pampepe.Ŵasongene pampepe kuti anjuŵilile ni kumbulasya mwakusisimuchisya.Jemanjajo nganagamba kutama jii, nambo ŵambachulenye mwakumbechetela yachabe.
16 Ŵandu ŵangamjogopa Mlungu akusanyosya une mwachipongwe.*Jemanjajo andumbilile mwamti akumemenela meno.
17 Wawo Yehofa, ana chagambeje kuyilola yeleyi mpaka chakachi?
Angulupusye une kuti jemanjajo akanjimuchila.Akulupusye umi wangu wamtengo wapenaniwu* kwa masimba.
18 Pelepo une chinjayamichila wawojo pasikati pa mpingo wekulungwa.Chinjachimbichisya wawojo pasikati pa gulu jekulunga ja ŵandu.
19 Akakunda kuti adani* ŵangu ŵakusaŵengana ni une pali pangali ligongo lililyose asangalale ligongo lya yakusawusya yangu.Akakunda kuti ŵandu ŵakusaŵengana ni une pali pangali ligongo lililyose akanyile meso gawo ni yakulinga yakusakala.
20 Pakuŵa jemanjajo ŵangaŵecheta maloŵe gakuyikasya mtendele,Nambo akupangana ngani syaunami kuti alimbane ni ŵandu ŵamtendele.
21 Jemanjajo awugwile mnope pakamwa pawo kuti anjimbe magambo.Akuŵecheta kuti, “Eyaa, tuyiweni yamkutenda.”
22 Wawo Yehofa, wawojotu ayiweni yayikundendechelayi. Akagamba kutama ngatenda chilichose.
Wawo Yehofa, akandalichila une.
23 Wawo Yehofa Mlungu jwangu, aŵe mesope soni anyakuche kuti anjenjele.Anjenjele une kumagambo gangu.
24 Wawo Yehofa Mlungu jwangu, awelusye une mwakamulana ni chilungamo chawo.Akakunda kuti adani ŵangu asangalale ligongo lya yakusawusya yangu.
25 Akakunda jemanjajo kuŵecheta kuti, “Eyaa, yeleyi ni yatusachileje.”
Akakunda jemanjajo kuŵecheta kuti, “Jweleju tummisile basi.”
26 Ŵandu ŵakusangalala pangusimana ni yakusawusya,Ŵatesye sooni wosopewo soni ŵasokonasye.
Wosope ŵakusaliwona kuŵa ŵapenani kumbunda une ŵatulusye soni ŵatesye sooni.
27 Nambo ŵandu ŵakusasangalala ni matala gangu ga chilungamo ŵakunde kuti agumile mwakusangalala.Ŵakunde kuti aŵecheteje kuti:
“Achimbichikwe Yehofa jwakusasangalala ligongo lyakuti jwakutumichila jwakwe ali pamtendele.”
28 Pelepo lulumi lwangu luchiŵechetaga* yakwamba chilungamo chawoSoni chinjachimbichisya wawojo ndaŵi syosope.
Maloŵe Gamwiŵanda
^ Ndaŵi syejinji chakuchijila chamwanachi ŵanyakulaga asilikali ŵakuponya mipamba.
^ Kagopolele kanesoni, “akusanyosya une ligongo lya yakulya.”
^ Mu Chihebeli ŵatiga, “Akulupusye wangwete pewu.” Pelepa akwamba umi.
^ Ŵane akusati “achimmagongo.”
^ Kapena kuti, “Pelepo chinjiganichisyaga mumtima mwangu.”
