Masalimo 34:1-22
Nyimbo ja Daudi pandaŵi jiŵalichenjile ni kutanda kutenda yindu mpela jwamasoka pameso pa Abimeleki, mwamti Abimelekijo ŵamtopwele jwalakwejo.
א [Aleph]
34 Chinjimchimbichisya Yehofa ndaŵi syosope.Ni ngomo syangu, chinjimchimbichisya jwalakwejo mwangalechesya.
ב [Beth]
2 Chinjinyadila mwa Yehofa.Ŵandu ŵakufasa* chachipikana soni kusangalala.
ג [Gimel]
3 Amchimbichisye Yehofa pampepe ni une.Kwende wosope pampepe tulikwesye lina lyakwe.
ד [Daleth]
4 Nawusisye lunda kwa Yehofa, mwamti jwalakwe ŵanjanjile.
Jwalakwe ŵangulupwisye ku yosope yayandesyaga woga.
ה [He]
5 Wosope ŵaŵamdalile jwalakwejo ŵaliji ŵakusangalala.Ngope syawo nganisitenda sooni.
ז [Zayin]
6 Mundu jwakulagasidwa paŵaŵilasile kwa Yehofa, jwalakwe ŵapikene.
Jwalakwe ŵamkulupwisye ku yipwetesi yakwe yosope.
ח [Heth]
7 Lilayika lya Yehofa likusilyachenjela* ŵandu wosope ŵakusamjogopa Mlungu,Soni likusilyakulupusya jemanjajo.
ט [Teth]
8 Apasye ni chalole kuti Yehofa ali jwambone.Jwakusangalala ali mundu jwakusatilila kwa jwalakwe.
י [Yod]
9 Amjogope Yehofa, jemanja wosope ŵamli ŵaswela ŵakwe,Pakuŵa ŵandu ŵakusamjogopa jwalakwe ŵangasoŵa chindu chilichose.
כ [Kaph]
10 Atamose masimba gekulungwa panandi gagali gamachili mpaka gasoŵe yakulya ni kutama ni sala.Nambo ŵandu ŵakusamsosasosa Yehofa ngasasoŵa chilichose chambone.
ל [Lamed]
11 Myiche akuno jemanja ŵanache ŵangu, soni mumbikane.Chinjimjiganya kuti mmanyilile kumjogopa Yehofa.
מ [Mem]
12 Ana ŵani mwa jemanja ŵakusaka kutama ni umi wakusangalalaSoni kugawona masiku gambone gejinji?
נ [Nun]
13 Mundu jwakusaka yeleyo alulekasyeje lulumi lwakwe kuti lukaŵechetaga yakusakala,Asilekasyeje ngomo syakwe kuti sikaŵechetaga yaunami.*
ס [Samekh]
14 Aleche kutenda yakusakala ni kutendaga yambone.Asosesoseje mtendele, soni atendeje yiliyose yakomboleka kuti aŵeje pamtendele ni achimjakwe.
ע [Ayin]
15 Meso ga Yehofa gakusaŵa pa ŵandu ŵakulungama,Soni mawiwi gakwe gakusapikana kulila kwawo kwakuŵenda chikamuchisyo.
פ [Pe]
16 Nambo ngope ja Yehofa jikusaŵengana ni ŵandu ŵakutenda yakusakala,Kuti ŵapyajile jemanjajo ni chakulinga chakuti akasakumbuchilidwasoni pachilambo chapasi.
צ [Tsade]
17 Ŵakulungama ŵagumisile, soni Yehofa ŵapikene.Jwalakwe ŵakulupwisye jemanjajo ku yakusawusya yawo yosope.
ק [Qoph]
18 Yehofa akusaŵa chiŵandika ni ŵandu ŵakasiche mtima.Jwalakwe akusiŵakulupusya ŵandu ŵatengwiche.
ר [Resh]
19 Mundu jwakulungama akusasimana ni yipwetesi* yejinji.Nambo Yehofa akumsakulupusya jwalakwe ku yipwetesi yosopeyo.
ש [Shin]
20 Mlungu akusagachenjela mawupa gosope ga mundu jweleju.Pangali liwupa atamose limo lyalichitemanguka.
ת [Taw]
21 Mundu jwakusakala chachiwa ligongo lya yipwetesi yachachisimana nayo.Ŵandu ŵakusaŵengana ni mundu jwakulungama chachisimanikwa kuti ali ŵakulemwa.
22 Yehofa akusawombola umi wa ŵakutumichila ŵakwe.Ŵandu wosope ŵakusatilila kwa jwalakwe, ngasasimanikwa kuti ali ŵakulemwa.
Maloŵe Gamwiŵanda
^ Ŵane akusati “kulijinichila.”
^ Mu Chihebeli ŵatiga, “likusakunga tenti kusyungulila.”
^ Kapena kuti, “yachinyengo.”
^ Kapena kuti, “yakusawusya.”
