Masalimo 32:1-11
Nyimbo ja Daudi. Masikili.*
32 Jwakusangalala ali mundu jwele yakulemwa yakwe yikululuchidwe, soni jwele ulemwa wakwe awusimasisye.*
2 Jwakusangalala ali mundu jwele Yehofa ngakumwona kuti ali jwakulemwa,Mundu jwele mumtima mwakwe mwangali yachinyengo.
3 Panagambile kutama ngasala yakulemwa yangu, mawupa gangu gatengwiche ligongo lya kuwuwula kwangu lisiku lyosope.
4 Musi ni chilo nalagaga ni mkono wawo wawasitopaga pa une.*
Machili gangu gajumwile* mpela mesi mundaŵi jachitukuta. (Selah)
5 Pambesi pakwe nasasile ulemwa wangu kwa wawojo.Nganinasisila yakulemwa yangu.
Une natite, “Chinjisala yakulemwa yangu kwa Yehofa.”
Mwamti wawojo ŵangululuchile yakulemwa yangu. (Selah)
6 Ni ligongo lyakwe mundu jwalijose jwali jwakulupichika chachipopela kwa wawojoPandaŵi jakusimanikwa wawojo.
Pelepo mesi gakusefuchila ngasigamsimana jwalakwejo.
7 Wawojo ali malo gangu gakuuŵa.Wawojo chachinjenjela une pangusimana ni yakusawusya.
Wawojo chachitendekasya kuti kugumila kwakusangalala ligongo lya chikulupusyo chawo kusyungulile une. (Selah)
8 Wawojo ŵatite, “Chinjimpa lunda soni kumjiganya litala lyamkusosekwa kwenda.
Meso gangu gachimlolela mmwejo soni chinjimsalila yindu yakumkamuchisya.
9 Mkaŵaga ŵangali lunda mpela hachi kapena bulu,Yayikusasosekwa kulongoleledwa ni ngonjiKuti yiyiche kwamli mmwejo.”
10 Mundu jwakusakala akusasimana ni yakupweteka yejinji.Nambo mundu jwakusamdalila Yehofa akusasyungulilidwa ni chinonyelo chakwe chakulupichika.
11 Msangalale ligongo lya Yehofa, soni msangalaleje mnope jemanja ŵandu ŵakulungama.Mjimbe mwakwesya maloŵe soni mwakusangalala, jemanja wosope ŵagoloka mtima.
Maloŵe Gamwiŵanda
^ Alole Kugopolela kwa Maloŵe Gane.
^ Kapena kuti, “ukululuchidwe.” Mu Chihebeli ŵatiga, “uwunichilidwe.”
^ Kapena kuti, “Ligongo lyakuti wawojo nganasangalalaga ni une, nalipikanga mpela kuti nyakwile katundu jwausito.”
^ Kapena kuti, “Chinyesi cha umi wangu chachenjile.”
