Masalimo 28:1-9
-
Mlungu akupikana lipopelo lya jwamasalimo
-
“Yehofa ali machili gangu soni ali chakuchijila changu”(7)
-
Nyimbo ja Daudi.
28 Wawo Yehofa, Lwala lwangu, une ngusapopela kwa wawojo kuti angamuchisye.Akatenda mpela kuti ngakumbikana.
Naga wawojo ngakunjanga,Chinjiŵa mpela ŵandu ŵakwawula kuti akasiche m’malembe.*
2 Apikane kulila kwangu panguŵenda kuti angamuchisyeAku ndili ngwesisye makono gangu mwakulolegana ni chipinda chamkati mnope cha nyumba jawo.
3 Akanjigala une kuti akambe chilango* pampepe ni ŵandu ŵakusakala, ŵakusatendaga yindu yakwapweteka achimjawo,Ŵandu ŵele ŵakusaŵecheta mwachinonyelo ni achimjawo nambo mumtima mwawo muli mugumbele yakusakala.
4 Ŵawuchisye jemanjajo mwakamulana ni yitendo yawo,Mwakamulana ni ndamo syawo syakusakala.
Ŵawuchisye jemanjajo mwakamulana ni masengo ga makono gawo,Mwakamulana ni yindu yatesile.
5 Pakuŵa jemanjajo ŵangayikosya yindu yakusatendaga Yehofa,Kapena kugakosya masengo ga makono gakwe.
Myoyo jwalakwe chachagwisya mwamti ngasiŵakamuchisyasoni kuti ajimuche.
6 Achimbichikwe Yehofa,Ligongo jwalakwe apikene lipopelo lyangu lyakuŵenda kuti angamuchisye.
7 Yehofa ali machili gangu soni ali chakuchijila changu.Mtima wangu ukusamdalila jwalakwejo.
Mbochele chikamuchisyo kutyochela kwa jwalakwejo, soni mtima wangu ukusangalala.Myoyo chinjimchimbichisya jwalakwejo mwakumjimbila nyimbo.
8 Yehofa ni jwakusiŵapa machili ŵandu ŵakwe.Jwalakwe ali malo gakulimbangana gakutilila, mwamti akusamkulupusya jwakusagulidwa jwakwe.
9 Ŵakulupusye ŵandu ŵawo, soni ŵape upile ŵandu ŵawo ŵali chipanje chawo.
Ŵasamalile jemanjajo soni ŵanyakule m’makono gawo mpaka kalakala mpela mwakusatendela m’busa.
Maloŵe Gamwiŵanda
^ Mu Chihebeli ŵatiga, “ŵakwawula kukwinjila mwisimbo.”
^ Ku Mozambique akusati “chamuko.”
