Masalimo 27:1-14
Nyimbo ja Daudi.
27 Yehofa ni kuŵala kwangu soni chikulupusyo changu.
Ana mpaka najogopesoni ŵani?
Yehofa ni malo gangu gakulimbangana gakunjenjela
Ana mpaka natetemelesoni ŵani?
2 Ŵandu ŵakusakala paŵanjimuchile kuti ajonanje,Adani* ŵangu ŵeleŵa ŵali ŵakusisyana ni une, ni ŵaŵakuŵele ni kugwa.
3 Atamose gulu ja ngondo jili jikunjile matenti gawo kuti jilimbane ni une,Mtima wangu ngasiwujogopa chilichose.
Atamose ngondo jakulimbana ni une jili jiwuliche,Peleposoni chinjiŵa jwakulimba mtima.
4 Chindu chimo chanamŵendile YehofaChele changuchisachilila mnope,Chili chakuti ndame m’nyumba ja Yehofa masiku gosope ga umi wangu,Kuti nawuwone umbone wa YehofaSoni kuti sangalale* pangujiwona nyumba jakwe.
5 Pakuŵa jwalakwe chachisisa une mu m’bwilili wakwe palisiku lyachinjisimana ni yakusawusya.Jwalakwe chachisisa une m’malo gakusisika jajili tenti jakwe.Jwalakwe chachimbika penani pa lwala.
6 Sambano ngwapunda adani ŵangu wosope ŵasyungulile une.Chinjipeleka mbopesi ku tenti jakwe ndili mkugumila mwakusangalala.Chinjijimba nyimbo syakumchimbichisya* Yehofa.
7 Ambikane, wawo Yehofa, ambikane pangulila.Andendele chanasa ni kunjanga.
8 Mumtima mwangu ngusakumbuchila yaŵaŵechete wawojo kuti:
“Msose ngope jangu nikujipata.”
Ngope jawo, wawo Yehofa, chinjijisosasosa nikujipata.
9 Akasisila une ngope jawo.
Akamtopola jwakutumichila jwawo, wawojo ali atumbile.
Wawojo ni ŵakusangamuchisya.Akandeka kapena kunjasa, wawo Mlungu jwangu jwakusangulupusya.
10 Atamose baba ni mama wangu ali andesile,Yehofa chachinjigala.
11 Anjiganye matala gawo, wawo Yehofa.Alongolele palitala lyagoloka pakogopela adani ŵangu.
12 Akambeleka mmyala mwa adani ŵangu,Pakuŵa jemanjajo akupeleka umboni waunami pakunjimuchila une,Soni akunjogoya ni yachiwawa.
13 Ana ngaliji ndili kwapi yikaŵe kuti nganingola chikulupiChakuti chinjiwuwona umbone wa Yehofa m’chilambo cha ŵandu ŵaumi?*
14 Kwende tumjembecheyeje Yehofa.Tutende yindu mwakulimba mtima soni mwamachili.
Elo, tumjembecheyeje Yehofa.
Maloŵe Gamwiŵanda
^ Ŵane akusati “achimmagongo.”
^ Kapena kuti, “Soni kuti najiganichisyeje.”
^ Kapena kuti, “Chinjijimba nyimbo ni yida yakwimbila kwa.”
^ Kagopolele kanesoni, “Nditu ngwete chikulupi chakuti chinjiwuwona umbone wa Yehofa m’chilambo cha ŵandu ŵaumi.”
