Masalimo 22:1-31
Kwa jwakulongolela nyimbo. Ajimbe nyimboji pakuya “Mbaŵala* Jajikongwe Jakumasikusiku.” Nyimbo ja Daudi.
22 Mlungu jwangu, Mlungu jwangu, ligongo chichi andesile une?
Ligongo chichi wawo ngakwika kuti angulupusye?Ligongo chichi ngakupikana kuwuwula kwangu?
2 Wawo Mlungu jwangu, musi ngusinaŵilangaga, nambo wawojo ŵanganjanga.Atamosesoni chilo ngusinaŵilangagape.
3 Nambo wawojo ali ŵaswela,Soni asyungulilidwe ni* maloŵe ga Ayisalayeli gakwachimbichisya wawojo.
4 Achinangolo ŵetu ŵadalilaga wawojo.Ligongo lyakwadalilako, wawojo ŵakulupusyaga jemanjajo.
5 Jemanjajo paŵalilile wawojo, ŵakulupusyaga.Ŵadalile wawojo, mwamti nganiŵakamulikasya liganga.*
6 Nambo une ndili nyongolosi, nganimba kose mundu,Ŵandu akwamba kumnyosya soni kumbecheta yachipongwe.
7 Wosope ŵakumbona une akusanyosya.Jemanjajo akunyogodola soni kupukunya mitwe jawo pakunyosya. Akuŵecheta kuti:
8 “Ngati ŵamkulupililaga Yehofa? Sambanotu Mlungujo amkulupusye jwalakwe!
Pakuŵa Mlungujo akusamnonyela mnope jwalakwe, ayichetu kuti amkulupusye!”
9 Wawojo ni ŵaŵangopwesye m’matumbo mwa mama ŵangu,Wawojo ni ŵaŵanjenjelaga une mama ŵangu paŵaliji mkunjonjesya.
10 Wawojo aŵele ali mkusamalila une* kutandila pakupagwa kwangu.Wawojo ŵaŵele Mlungu jwangu kutandila panaliji m’matumbo mwa mama ŵangu.
11 Akandalichila une, ligongo sigele panandi kusimana ni yakusawusyaSoni nganingola jwine jwakungamuchisya.
12 Ŵanache ŵajinji ŵa ng’ombe ŵamkambako asyungulile une.Ng’ombe syamkambako syamachili sya ku Basana sisyungulile une.
13 Siwugwile mnope pakamwa pakwe kuti silimbane ni une,Mpela lisimba lyakutongola lyalikupachulanya nyama jalikamwile.
14 Machili gamalile mpela mesi gagajitile pasi.Mawupa gangu gosope gatyosile mwakulumbikanilana mwakwe.
Mtima wangu uŵele mpela masyega,Mwamti ukusungunukuka mkati mwangu.
15 Machili gangu gajumwile mpela lupale.Lulumi lwangu lunyambatile mwinani mwa mkamwa mwangu.Wawojo akunjinjisya mwisimbo kuti mbwe.
16 Elo, mbwa sisyungulile une.Kagulu ka ŵandu ŵakusakala kasyungulile une.Jemanjaji ali mpela lisimba lyalikukatula sajo* soni makono gangu.
17 Mpaka ngombole kugaŵalanga mawupa gangu gosope.
Jemanjajo akundolechesya mnope une.
18 Jemanjaji akugaŵana yakuwala yangu pasikati pawo,Soni akutenda kalotalota* pa chakuwala changu.
19 Nambo wawo Yehofa, akandalichila une chonde.
Ngudalila machili gawo, chonde ayiche mwachitema kuti angamuchisye.
20 Angulupusye une ku upanga.*Akulupusye umi wangu wa mtengo wapenaniwu* ku ngose sya* mbwa.
21 Angulupusye une mkamwa mwa lisimba soni kumisengo ja ng’ombe syamkambako syamwitinji.Anjanje ni kungulupusya.
22 Chinjilimanyikasya lina lyawo kwa achalongo achimjangu.Soni chinjachimbichisya wawojo pasikati pa mpingo.
23 Jemanja ŵamkusimumjogopa Yehofa, mumchimbichisye jwalakwejo!
Jemanja ŵanache wosope ŵa Yakobo, mumchimbichisye jwalakwejo!
Mjime mwakumjogopa jwalakwe, jemanja ŵanache wosope ŵa Isalayeli.
24 Pakuŵa wawojo nganagamba kutama ngayikosya yakusawusya ya mundu jwakulagasidwa.Mlungu nganamsisila jwalakwe ngope jakwe.
Mlungujo ŵapikene paŵagumisile kuti amkamuchisye.
25 Chinjachimbichisya wawojo pasikati pa mpingo wekulungwa.Une chinjikwanilisya yilanga yangu pameso pa ŵandu ŵakusamjogopa jwalakwe.
26 Ŵandu ŵakufasa* chachilya ni kwikuta.Ŵandu ŵakusamsosasosa Yehofa chachimchimbichisya jwalakwe.
Umi* wawo usangalale mpaka kalakala.
27 Ŵandu wosope kutyochela kumbali syosope sya chilambo chapasi chachimmanyilila Yehofa ni kugalawuchila kwa jwalakwejo.
Maŵasa gosope ga mitundu ja ŵandu gachitindiŵala pameso pa wawojo.
28 Pakuŵa umwenye uli wa Yehofa.Jwalakwe akusalamulila mitundu ja ŵandu.
29 Ŵakusichila* wosope pachilambo chapasi chachilya ni kutindiŵala pameso pa jwalakwejo.Ŵandu wosope ŵakwawula kuluwundu chachitindiŵala pameso pakwe.Pangali jwalijose mwa jemanjajo jwampaka akulupusye umi wakwe.
30 Yisukulu yawo yichimtumichila jwalakwe,M’bado* wakwika msogolo chachiwusalila yakwamba Yehofa.
31 Jemanjajo chachiyika soni chachisala yakwamba chilungamo chakwe.
Chachasalila ŵanache ŵachachipagwa msogolo yindu yatesile jwalakwejo.
Maloŵe Gamwiŵanda
^ Komboleka kuti pelepa akwamba chuni cha nyimbo kapena mtundu wa kajimbe.
^ Kapena kuti, “Soni akusatama pampando wawo waumwenye pakatikati pa.”
^ Kapena kuti, “mwamti nganiŵatesya sooni.”
^ Mu Chihebeli ŵatiga, “Ŵambonyisye kwa wawojo.”
^ Ŵane akusati “makawu.”
^ Ŵane akusati “mayele.”
^ Upanga ukusawoneka mpela chipula chekulungwa chakutema kosekose.
^ Mu Chihebeli ŵatiga, “Akulupusye wangwete pewu.” Pelepa akwamba umi.
^ Mu Chihebeli ŵatiga, “ku makono ga.”
^ Ŵane akusati “kulijinichila.”
^ Mu Chihebeli ŵatiga, “Mitima jawo jitame ni umi.”
^ Mu Chihebeli ŵatiga, “Ŵakwimbala.”
^ Ŵane akusati “mpago.”
