Masalimo 18:1-50
Kwa jwakulongolela nyimbo. Nyimbo ja Daudi jwakutumichila jwa Yehofa. Jwalakwe ŵasasile maloŵe ga mu nyimboji kwa Yehofa palisiku lyele Yehofajo ŵamkulupwisye jwalakwejo mmyala mwa adani* ŵakwe wosope soni mmyala mwa Sauli. Jwalakwe ŵatite:
18 Wawo Yehofa, une ngusinanonyela mnope wawojo, wawo machili gangu.
2 Yehofa ali lwala lwangu soni malo gangu gakulimbangana, jwalakwe ni jwakusangulupusya.
Mlungu jwangu ali lwala lwangu, kwa jwalakwejo ni kwangusajuŵaga.Jwalakwe ali chakuchijila changu soni msengo* wangu wachikulupusyo.* Jwalakwe ali malo gangu gambone gakutilila.
3 Une ngusaŵilanjila pa wawojo Yehofa, wawo ŵakuŵajilwa kwachimbichisya,Mwamti une chinjikulupuka mmyala mwa adani ŵangu.
4 Ngonji sya chiwa syasyengenye une.Ŵandu ŵangalondeka ŵangungumuchile mpela mesi ga chigumula ni kunjogoya.
5 Ngonji sya Malembe* syasyengenye une.Chiwa chatejile ngonji pasogolo pangu.
6 Panaliji mu yipwetesi, naŵilasile pa Yehofa.Napitilisye kulila pameso pa Mlungu jwangu kuti angamuchisye.
Kutyochela m’nyumba jakwe, jwalakwe ŵapikene maloŵe gangu.Soni kulila kwangu kwakuŵenda chikamuchisyo ŵakupikene.
7 Kaneko chilambo chapasi chatandite kutenganyika soni kutetemela.Mafendeshoni* ga matumbi gatetemeleSoni gatenganyiche aku nakuku ligongo lyakuti ŵamtumbilikasisye jwalakwejo.
8 Lyosi lyatukaga kutyochela mumbula mwakwe,Soni moto wakutinisya wakopweche kutyochela mkamwa mwakwe.Makala ga moto gakopokaga kutyochela mwa jwalakwejo.
9 Jwalakwejo paŵaliji mkutuluka, kwinani kwapindiche,Soni pasi pa sajo* syakwe paliji pana chipi chekulungwa.
10 Jwalakwe ŵakwesile penani pa mkelubi soni ŵayiche ali mkuguluka.
Jwalakwe ŵatulwiche mwachitemachitema kutyochela kwinani ali akwesile pa mapapiko ga lilayika.*
11 Kaneko jwalakwe ŵaliwunichile ni chipi,Chipi chakola mawunde gepiliwu gegumbale ni mesi,Mwamti chipicho chamsyungulile jwalakwe mpela tenti.
12 Kumesya kwawonechele pasogolo pakweSoni matalila ni makala ga moto yagwaga kutyochela m’mawunde.
13 Kaneko Yehofa ŵatandite kulindima kwinani.Jwakwinani Mnopejo paŵatesile yakuti maloŵe gakwe gapikaniche,Matalila soni makala ga moto yagwile pasi.
14 Jwalakwe ŵaponyisye mipamba jakwe mwamti ŵabalalikangenye jemanjajo.Jwalakwe ŵaponyisye njasi jakwe mwamti jemanjajo yasokonasisye.
15 Pasi pa sulo pawonechele.*Mafendeshoni ga chilambo chapasi gawonechele pasa ligongo lya kwamuka kwawo, wawo Yehofa,Gawonechele ligongo lya machili ga mpweya wakopoka mumbula mwawo.
16 Jwalakwe ŵatulwisye mkono wakwe kutyochela kwinani.Ŵangamwile une ni kunjuwula m’mesi gakusokoka.
17 Ŵangulupwisye kwa mdani jwangu jwamachili,Kwa ŵandu ŵakusaŵengana ni une, ŵaŵaliji ŵamachili kumbunda une.
18 Jemanjaji ŵanjimuchile palisiku lyanasimene ni yakusawusya,Nambo Yehofa ŵangamuchisye.
19 Jwalakwe ŵangulupwisye ni kumbika pamalo gambone gangali chakogoya chilichose.*Ŵangulupwisye ligongo jwalakwe ŵasangalalaga ni une.
20 Yehofa akusamba upile mwakamulana ni kulungamika kwangu.Akusambuchisya une yambone ligongo makono gangu gali gangalemwa.*
21 Pakuŵa une nagasunjile matala ga Yehofa,Soni nganindenda yakusakala mwakumleka Mlungu jwangu.
22 Yosope yakusalamula jwalakwe yili pameso pangu.Ngasindeka kukuya malamusi gakwe.
23 Chimbitilisye kuŵa mundu jwangalemwa pameso pakwe,Soni chimbitilisye kuŵambala yakulemwa.
24 Yehofa ambuchisye une yambone ligongo lya kulungamika kwangu,Soni atende yeleyi ligongo makono gangu gali gangalemwa pameso pakwe.
25 Kwa mundu jwakulupichika wawojo akusamtendela yindu mwakulupichika.Kwa mundu jwangalemwa wawojo akusamtendela yindu mwachilungamo.
26 Kwa mundu jwamswela wawojo akusalilosya kuti ali ŵaswela,Nambo kwa mundu jwangakulupichika wawojo chachilosya kuti ali jwalunda.
27 Wawojo akusiŵakulupusya ŵandu ŵali ŵakulagasikaNambo akusiŵatulusya ŵandu ŵakulikwesya.*
28 Pakuŵa wawo Yehofa ni ŵakusapamba nyali jangu,Wawojo ni Mlungu jwangu jwakusamulichila une pandili m’chipi.
29 Ni chikamuchisyo cha wawojo une mpaka ngombole kujitoposya gulu ja ŵachiswamba.Mwamachili ga Mlungu mpaka ngombole kuguluka* lipupa.
30 Litala lya Mlungu jusyesyene lili lyakulungamika.Maloŵe ga Yehofa gangali chakugasakasya.
Jwalakwe ali chakuchijila kwa ŵandu ŵakusatilila kwa jwalakwejo.
31 Ana pana Mlungu jwinesoni jwakupunda Yehofa?
Ana pana lwala lwinesoni kupunda Mlungu jwetu?
32 Mlungu jusyesyene ni jwakusamba une machili,Soni jwalakwe chachilitendekasya litala lyangu kuŵa lyakulungamika.
33 Jwalakwe akusasitendekasya ngongolo syangu kuti siŵe mpela sya mbaŵala.Jwalakwe akusandendekasya une kuti njime pamalo gakwela mnope.
34 Jwalakwe akusagajiganya makono gangu kuti gapute ngondo.Makono gangu mpaka gakombole kukunga ukunje wa chisyano cha kopa.
35 Wawojo akusamba une chakuchijila chachikulupusyo,Mkono wawo wamlyo ukusangamuchisya,Soni kulinandiya kwawo ni kwakukusandendekasya une kuŵa jwapenani.
36 Wawojo akusakusya litala lyangu kuti sajo syangu sijendeje mwelemo.Sajo syangu ngasisitelesya.
37 Une chinjatoposya adani ŵangu ni kwakamula.Ngasimbujila mpaka ndili napyajisile wosope.
38 Chinjakasanya jemanjajo kuti akajimukasoni.Jemanjajo chachigwila pasi pa sajo syangu.
39 Wawojo chachimba une machili gakuputila ngondo.Chachatendekasya adani ŵangu kuti agwe pameso pangu.
40 Wawojo chachitendekasya kuti adani ŵangu atile pameso pangu,Soni chinjamasya* ŵandu ŵakuŵengana ni une.
41 Jemanjajo akusalila pakuŵenda chikamuchisyo, nambo pangali jwakusiŵakulupusya.Akusayika pakumlilila Yehofa, nambo jwalakwejo ŵangajanga.
42 Une chinjaliwula jemanjajo ni kuŵa mpela luwundu lwalukuwululuka ni mbungo.Chinjametekula jemanjajo mpela matope mumsewu.
43 Wawojo chachingulupusya mmyala mwa ŵandu ŵakumbatila magongo.
Wawojo chachisagula une kuti mbe jwakulongolela jwa mitundu ja ŵandu.
Ŵandu ŵakuti unejo ngangwamanyilila chachindumichila.
44 Ŵandu pachachigamba kupikana mbekesela syakwamba une chachimbikanila.Ŵandu ŵamitundu jine chachiyika pameso pangu mwakulinandiya uli wakamwile woga.
45 Ŵandu ŵamitundu jine chachijasa mtima.*Jemanjajo chachikopoka m’malo gawo gakuuŵa ali mkutetemela ni woga.
46 Yehofa ali jwaumi. Lwala lwangu lupochele uchimbichimbi.
Achimbichikwe mnope Mlungu jwakusangulupusya.
47 Mlungu jusyesyene akusiŵawuchisya adani ŵangu.Jwalakwe akusiŵagomeka ŵandu ni kwaŵika pasi pangu.
48 Jwalakwe akusangulupusya mmyala mwa adani ŵangu ŵaukali.Wawotu akusangwesya ni kumbika penani pa ŵandu ŵakusanjimuchila.Soni akusangulupusya mmyala mwa mundu jwakutenda yachiwawa.
49 Ni ligongo lyakwe une chinjachimbichisya wawo Yehofa pasikati pa mitundu ja ŵandu,Soni chinjijimba nyimbo syakulichimbichisya* lina lyawo.
50 Jwalakwe akusatenda masengo gekulungwa pakusaka kumkulupusya mwenye jwakwe.Akusamlosya chinonyelo chakulupichika jwakusagulidwa jwakwe,Elo, kwa Daudi soni ŵanache ŵakwe mpaka kalakala.
Maloŵe Gamwiŵanda
^ Ŵane akusati “achimmagongo.”
^ Alole Kugopolela kwa Maloŵe Gane.
^ Kapena kuti, “soni jwakungulupusya jwangu jwamachili.”
^ Alole Kugopolela kwa Maloŵe Gane.
^ Ŵane akusati “Yilimbilimbi.”
^ Ŵane akusati “makawu.”
^ Kapena kuti, “ali akwesile mbungo.”
^ Kapena kuti, “Ngalande sya mesi syawonechele.”
^ Kapena kuti, “pamalo gakutakasuka.”
^ Mu Chihebeli ŵatiga, “gali geswela.”
^ Mu Chihebeli ŵatiga, “meso gakulikwesya.”
^ M’madela gane akusati “kusumba.”
^ Mu Chihebeli ŵatiga, “chinjawugala pakamwa.”
^ Kapena kuti, “chachimala.”
^ Kapena kuti, “chinjijimba nyimbo ni yida yakwimbila syakwamba.”
