Masalimo 148:1-14
148 Amchimbichisye Ya!*
Mumchimbichisye Yehofa jemanja kwinaniko.Mumchimbichisye jwalakwejo jemanja ŵamli pamalo gapenani mnope.
2 Malayika gakwe gosope gamchimbichisye jwalakwejo.
Gulu jakwe josope ja ngondo jakwinani jimchimbichisye jwalakwejo.
3 Lyuŵa soni mwesi yimchimbichisye jwalakwejo.
Ndondwa syosope syakuŵala simchimbichisye jwalakwejo.
4 Kwinani mnope kumchimbichisye jwalakwejoSoni mesi gakwinani gamchimbichisye jwalakwejo.
5 Yindu yosope yeneyi yilichimbichisye lina lya Yehofa,Pakuŵa jwalakwejo paŵalamwile, yindu yeleyi yapali.
6 Jwalakwe akusayitendekasya kuti yindu yeleyi yikatyoka pamalo gakwe mpaka kalakala.Jwalakwe ayiŵichile yindu yeleyi lilamusi lyakuti ngasilimala.
7 Yosope yapachilambo chapasi yimchimbichisye Yehofa.Yakupanganyikwa yekulungwakulungwa yam’nyasa soni nyasa syosope syakusokoka yimchimbichisye jwalakwejo.
8 Njasi, matalila, mesi gekamulane, soni mawunde gepiliwu mnope,Pampepe ni mbungo jajikusatenda yalamwile jwalakwejo yimchimbichisye jwalakwejo.
9 Matumbi gekulungwakulungwa soni matumbi gamwanamwanaPampepe ni yitela yayisogosi soni yitela yosope ya mkungusa yimchimbichisye jwalakwejo.
10 Yinyama yamwitinji soni yinyama yosope yakulangaPampepe ni yaumi yosope yakwaŵa soni yijuni yaguluka yimchimbichisye jwalakwejo.
11 Mamwenye ga pachilambo chapasi soni mitundu josope ja ŵanduPampepe ni ŵakulamulila soni ŵakwelusya wosope ŵapachilambo chapasi amchimbichisye jwalakwejo.
12 Anyamata soni asikana*Pampepe ni ŵachikulile ni ŵanache ŵakwe amchimbichisye jwalakwejo.
13 Yosope yeneyi yilichimbichisye lina lya Yehofa,Pakuŵa lina lyakwepe ni lyalili lyapenani mnope mwamti pangali jwampaka aliyichile.
Ukulu wakwe uli wapenani mnope kupunda chilambo chapasi soni kwinani.
14 Jwalakwe chachigakwesya machili ga* ŵandu ŵakwePakwachimbichisya ŵakulupichika ŵakwe wosope,Elo, ŵanache ŵa Isalayeli, ŵandu ŵali chiŵandika ni jwalakwe.
Amchimbichisye Ya!*
Maloŵe Gamwiŵanda
^ Kapena kuti, “Aleluya!” “Ya” kali kasale kakata ka lina lyakuti Yehofa.
^ Mu Chihebeli ŵatiga, “asikana ŵanganagonejepo ni ŵalume.”
^ Mu Chihebeli ŵatiga, “chachiwukwesya msengo wa.”
^ Kapena kuti, “Aleluya!” “Ya” kali kasale kakata ka lina lyakuti Yehofa.
