Masalimo 135:1-21
135 Amchimbichisye Ya!*
Alichimbichisye lina lya Yehofa.Amchimbichisye jwalakwe, jemanja ŵakutumichila ŵa Yehofa,
2 Jemanja ŵamkutumichila m’nyumba ja Yehofa,Elo, m’maluŵala ga nyumba ja Mlungu jwetu.
3 Amchimbichisye Ya, pakuŵa Yehofa ali jwambone.
Ajimbe nyimbo syakulichimbichisya* lina yakwe, pakuŵa kutenda yeleyi kuli kwakusangalasya.
4 Pakuŵa Ya amsagwile Yakobo kuti aŵe jwakwe,Elo, Isalayeli kuti aŵe chipanje chakwe chapadela.*
5 Pakuŵa une ngumanyilila chenene kuti Yehofa ali jwamkulungwa.Ambuje ŵetu ali ŵakulungwa mnope kupunda milungu jine josope.
6 Yehofa akusatenda chilichose chakusaka,Chinga kwinani, pachilambo chapasi, m’nyasa kapena pasi pa nyasa.
7 Jwalakwe akusagatendekasya mawunde* kuti gakwele mwinani kutyochela kumbesi kwa chilambo chapasi.Jwalakwe akusatendekasya njasi* kuti simesyeje pandaŵi jajikugwa wula.Jwalakwe akusajikoposya mbungo kutyochela m’nyumba syakwe syakusunjila mbungo.
8 Jwalakwe ŵawuleje ŵanache ŵandanda kupagwa ŵa ku Iguputo,Kutandila mwanache jwa mundu mpaka mwanache jwa chinyama.
9 Jwalakwe ŵatesile yimanyisyo soni yakusimonjesya pasikati penu, mmwe Iguputo.Ŵayitesile yeleyi pakulimbana ni Falawo soni ŵakutumichila ŵakwe wosope.
10 Jwalakwe ŵajijonasile mitundu jejinji ja ŵanduSoni ŵagawuleje mamwenye gamachili.
11 Ŵamwuleje Sihoni mwenye jwa Aamoli,Ogi mwenye jwa ku Basana,Nambosoni ŵagagomeche mamwenye gosope ga ku Kanani.
12 Jwalakwe ŵachipeleche chilambo cha jemanjajo kwa ŵandu ŵakwe kuti chiŵe chipanje chawo,Nditu, ŵachipeleche kwa ŵandu ŵakwe Ayisalayeli mpela chipanje chawo.
13 Wawo Yehofa, lina lyawo lichitama mpaka kalakala.
Wawo Yehofa, mbili jawo* jichitama kumibado* josope.
14 Pakuŵa Yehofa chachachenjela ŵandu ŵakwe,Soni jwalakwe chachatendela chanasa ŵakutumichila ŵakwe.
15 Milungu ja ŵandu ŵamitundu jine jili ja silifa soni golide,Jakusapanganya ŵandu ni makono gawo.
16 Pakamwa jikwete, nambo jangaŵecheta.Jikwete meso, nambo jangalola.
17 Jikwete mawiwi, nambo jangapikana.
Mkamwa mwakwe mwangali mpweya uliwose.
18 Ŵandu ŵakusajipanganya milungujo chachilandana najo,Yimpepesoni ni ŵandu ŵakusajikulupilila.
19 Jemanja ŵa m’nyumba ja Isalayeli, mumchimbichisye Yehofa.
Jemanja ŵa m’nyumba ja Aloni, mumchimbichisye Yehofa.
20 Jemanja ŵa m’nyumba ja Lefi, mumchimbichisye Yehofa.
Jemanja ŵamkusimumjogopa Yehofa, mumchimbichisye Yehofa.
21 Nguŵenda kuti Yehofa, jwele jwakusatama ku Yelusalemu,Achimbichikwe kutyochela ku Siyoni.
Amchimbichisye Ya!
Maloŵe Gamwiŵanda
^ Kapena kuti, “Aleluya!” “Ya” kali kasale kakata ka lina lyakuti Yehofa.
^ Kapena kuti, “Ajimbe nyimbo ni yida yakwimbila syakwamba.”
^ Kapena kuti, “chipanje chakwe chakusosekwa mnope.”
^ Kapena kuti, “lipundugulu.”
^ Kagopolele kanesoni, “akusawugula mageti ga wula.”
^ Kapena kuti, “lina lyawo.” Mu Chihebeli ŵatiga, “chikumbuchilo chawo.”
^ Ŵane akusati “mipago.”
