Masalimo 119:1-176
-
Kuyamichila maloŵe ga Mlungu gagali gamtengo wapenani
-
“Ana jwachinyamata mpaka atende yamtuli kuti matala gakwe gaŵeje geswela?” ’ (9)
-
“Ngusayinonyela mnope yindu yakusatukumbusya” (24)
-
“Ngusaganonyela mnope malamusi gawo” (97)
-
‘Lunda kugapunda matichala gangu gosope’ (99)
-
“Maloŵe gawo gali mpela nyali jakumulichila sajo syangu” (105)
-
“Maloŵe gawo gosope gali gasyesyene” (160)
-
“Ŵakuganonyela malamusi gawo akusakola mtendele” (165)
-
א [Aleph]
119 Ŵakusangalala ali ŵandu ŵakusajenda mwangalemwesya chilichose,*Ŵakusajenda mwakamulana ni malamusi ga Yehofa.
2 Ŵakusangalala ali ŵandu ŵakusapikanila yindu yakusatukumbusya jwalakwejo,Ŵele ŵakusamsosasosa jwalakwejo ni mtima wawo wosope.
3 Jemanjajo ŵangatenda yindu yangali chilungamo.Akusajenda m’matala ga jwalakwejo.
4 Wawojo atupele lilamusiLyakuti tusunjeje mwakusamala yindu yatulamwile.
5 Ngusachilila mnope kuŵa jwangatenganyikaKuti mbikanileje malamusi gawo.
6 Pelepo ngasimba jwasooniPanguganichisya malamusi gawo gosope.
7 Chinjachimbichisya wawojo ni mtima wagolokaPachinjimanyilila yachilungamo yakusalamula wawojo.
8 Une ngusapikanila malamusi gawo.
Chonde akanjasa mpaka kalakala.
ב [Beth]
9 Ana jwachinyamata mpaka atende yamtuli kuti matala gakwe gaŵeje geswela?
Akusosekwa kulolechesya kuti akutenda yindu mwakamulana ni maloŵe gawo.
10 Ni mtima wangu wosope ngusinasosasosa wawojo.
Akakunda kuti sepuche pa malamusi gawo.
11 Ngusasunga maloŵe gawo mumtima mwanguKuti ngalemwechesya wawojo.
12 Achimbichikwe wawojo Yehofa.Anjiganye malamusi gawo.
13 Ni ngomo syangu chinjiwandisyaYakulamula yosope yasasile wawojo.
14 Yindu yakusatukumbusya wawojo ngusasangalala nayo mnopeKupunda yindu yosope yamtengo wapenani.
15 Yindu yakusalamula wawojo chinjiyiganisya mnope*Soni meso gangu ngasigatyoka palitala lyawo.
16 Ngusaganonyela mnope malamusi gawo.
Maloŵe gawo ngasinagaliŵalila.
ג [Gimel]
17 Amtendele yindu mwachinonyelo jwakutumichila jwawo,Kuti mbitilisye kutama ni umi ni kupikanilaga maloŵe gawo.
18 Ambugule meso kuti ndole cheneneYindu yakusimonjesya ya m’chilamusi chawo.
19 Une ngusaliwona mpela mlendo m’chilambo achino.
Akasisila une malamusi gawo.
20 Une masile ligongo lyakusachililaYakulamula yawo ndaŵi syosope.
21 Wawojo akusiŵajamuka ŵandu ŵakulikwesya,Ŵali ŵandu ŵalweseche* ŵasepwiche pa malamusi gawo.
22 Andyochesye une* kusambula ni mwano yakundendela ŵandu,Pakuŵa mbikanile yindu yakusatukumbusya.
23 Atamose ŵakulongolela patemitemi pampepe ni kuŵechetaga yakulimbana ni une,Jwakutumichila jwawo akusapitilisya kugaganichisya mnope* malamusi gawo.
24 Ngusayinonyela mnope yindu yakusatukumbusya wawojo.Yinduyo yili mpela mundu jwakungamuchisya lunda.
ד [Daleth]
25 Ngusagona pasi chamakuku paluwundu.
Apitilisye kusunga jwaumi mwakamulana ni maloŵe gawo.
26 Nasalile wawojo yakwamba matala gangu, soni ŵanjanjile.Anjiganye malamusi gawo.
27 Angamuchisye kupikanichisya ngopolelo ja* yindu yakusalamula wawojo,Ni chakulinga chakuti nganichisyeje mnope* yakwamba masengo gawo gakusimonjesya.
28 Mbele ndili mkusoŵa lugono ligongo lya chanasa.
Alimbikasye une mwakamulana ni maloŵe gawo.
29 Aŵambasye une kuti ngajenda palitala lya chinyengo.Alosye une umbone mtima mwakumba chilamusi chawo.
30 Une sagwile kuti mbe jwakulupichika kwa wawojo.
Une ngumanyilila kuti yakusalamula wawojo yili yisyesyene.
31 Une nalinyambatiche kuyindu yakusatukumbusya wawojo.
Wawo Yehofa, akasakunda kuti chinaligambe.*
32 Mwakusachilila chinjipitilisya kugakuya* malamusi gawoLigongo wawojo akusagalinganyila malo mumtima mwangu.*
ה [He]
33 Wawo Yehofa, anjinganye kuti nalimanyilile litala lya malamusi gawo,Mwamti chinjilikuya litalalyo mpaka kumbesi.
34 Angamuchisye kuti mbe jwakupikanichisya yindu,Ni chakulinga chakuti mbikanileje malamusi gawoSoni kuti nagasunjeje ni mtima wangu wosope.
35 Alongolele une palitala lya malamusi gawo,Pakuŵa une ngusasangalala nalyo litalalyo.
36 Awutendekasye mtima wangu kuti unonyeleje yindu yakusatukumbusya wawojo,Nambo ngaŵa kuti unonyeleje yindu yakwamba kulisangalasya.*
37 Agatendekasye meso gangu kuti gakalolaga yindu yangali mate.Asunje une jwaumi palitala lyawo.
38 Akwanilisye chilanga chaŵatesile* kwa jwakutumichila jwawo,Ni chakulinga chakuti ŵandu ŵajogopeje wawojo.*
39 Andyochesye yindu yakutesya sooni yanguyijogopa,Pakuŵa yakusalamula wawojo yili yambone.
40 Alole yangusati kasachilile yindu yakusalamula wawojo.
Asunje une jwaumi mwakamulana ni chilungamo chawo.
ו [Waw]
41 Wawo Yehofa, angunde une kuti nachiwone chinonyelo chawo chakulupichika,Elo, chikulupusyo chawo, mwakamulana ni chilanga chawo.*
42 Pelepo une chinjimjanga mundu jwakunyosya,Pakuŵa ngusinagakulupilila maloŵe gawo.
43 Akatyosya mkamwa mwangu maloŵe gawo gagali gasyesyene,Pakuŵa une ngwembecheya chilungamo chawo.
44 Chinjipitilisya kusunga malamusi gawo ndaŵi syosope,Elo, mpaka kalakala.
45 Une chinjijenda aku nakuku m’malo gambone gangali chakogoya chilichose,*Ligongo ngusalingalinga kukuya yakusalamula wawojo.
46 Chinjiŵecheta pameso pa mamwenye yakwamba yindu yakusatukumbusya wawojo,Soni ngasindenda sooni.
47 Ngusaganonyela malamusi gawo,Nditu, ngusaganonyela kwabasi.
48 Chinjipopela kwa wawojo ndili ngwesisye makono gangu mwinani ligongo lya malamusi gawo gangusaganonyela,Soni chinjigaganisya mnope* malamusi gawogo.
ז [Zayin]
49 Akumbuchile maloŵe gaŵamsalile* jwakutumichila jwawo,Soni kupitila m’maloŵego, wawojo ŵambele une chembecheyo.*
50 Yeleyi ni yayikusandamika mtima pasi pandaŵi jangu jayipwetesi,Pakuŵa maloŵe gawo gakusunga une ni umi.
51 Ŵandu ŵakulikwesya akusanyosya une mnope,Nambo une ngangusasepuka pa malamusi ga wawojo.
52 Wawo Yehofa, une ngusakumbuchila yakulamula yawo yayiŵele yili yipali kutandila kalakala,Soni yikusandamika mtima pasi.
53 Ndumbile mnope ligongo lya ŵandu ŵakusakala,Ŵakusakana kukuya malamusi gawo.
54 Malamusi gawo gali nyimbo syangusajimbaKulikose kwandemi.*
55 Chilo ngusinalikumbuchila lina lyawo, wawo Yehofa,Ni chakulinga chakuti nagasunjeje malamusi gawo.
56 Kutenda yeleyi kuŵele mpela chisyoŵe changuLigongo nguyisye yakusalamula wawojo.
ח [Heth]
57 Yehofa ali jwangu.Ndesile chilanga kwa wawojo kuti chimbikanileje maloŵe gawo.
58 Ngwaŵenda* ni mtima wangu wosope,Kuti alosye une umbone mtima mwakamulana ni chilanga chawo chaŵatesile.*
59 Mbungunyisye yakwamba matala gangu,Ni chakulinga chakuti sajo* syangu sitandilesoni kukuya yindu yakusatukumbusya.
60 Ngusaŵa jwachitema pakupikanila malamusi gawoSoni jwangatendaga chisyewu.
61 Ŵakusakala andejele ngonji,Nambo une jwangaliŵalila malamusi gawo.
62 Pasikati pa chilo ngusajimuka kuti nayamichile wawojoLigongo lya kawelusye kawo ka chilungamo.
63 Ngusakamulana ni ŵandu wosope ŵakusiŵajogopa wawojoSoni ŵakusasunga yakulamula yawo.
64 Wawo Yehofa, chinonyelo chawo chakulupichika chikusagumbala pachilambo chapasi.Anjiganye malamusi gawo.
ט [Teth]
65 Wawojo atesile yindu mwachinonyelo ni jwakutumichila jwawoMwakamulana ni maloŵe gawo, wawo Yehofa.
66 Anjiganye kuti mbe jwakuganisya chenene soni jwakumanyilila yindu,Pakuŵa une mbisile chikulupi changu pa malamusi gawo.
67 Mkanisimane ni yipwetesi, nganinguyaga matala gawo,*Nambo apano ngusapikanila yakusaŵecheta wawojo.
68 Wawojo ali ŵambone, nombe nago matala gawo gali gambone.
Anjiganye malamusi gawo.
69 Ŵandu ŵakulikwesya akusambakasya mabosa,Nambo une ngusapikanila yakusalamula wawojo ni mtima wangu wosope.
70 Mitima jawo jangapikana chilichose.*Nambo une ngusinaganonyela malamusi gawo.
71 Yitemi chenene kuti nasimene ni yipwetesi,Yeleyi yindendekasisye kuti nalijiganye malamusi gawo.
72 Malamusi gawo gaŵapeleche gali gambone mnope kwa une,Kupunda mbiya syejinji sya silifa soni golide.
י [Yod]
73 Wawojo ŵambanganyisye ni makono gawo, soni napali.
Angamuchisye kuti mbe jwakupikanichisya yindu,Ni chakulinga chakuti nalijiganye malamusi gawo.
74 Ŵandu ŵakusiŵajogopa wawojo pambweni une akusasangalala,Pakuŵa mbisile chembecheyo changu pa maloŵe gawo.*
75 Wawo Yehofa, une ngumanyilila kuti wawojo akusawelusya mwachilungamoSoni kuti wawojo ambele yipwetesi ligongo lya kukulupichika kwawo.
76 Nguŵenda kuti chinonyelo chawo chakulupichika chindamiche mtima pasi,Mwakamulana ni chilanga chawo chaŵatesile* kwa jwakutumichila jwawo.
77 Alosye une chanasa chawo, ni chakulinga chakuti mbitilisye kutama ni umi,Pakuŵa ngusinaganonyela malamusi gawo.
78 Nguŵenda kuti ŵandu ŵakulikwesya ŵatesye sooni,Ligongo jemanjajo akusandendela yachabe pali pangali ligongo.*
Nambo une chinjiganichisya mnope* yindu yakusalamula wawojo.
79 Nguŵenda kuti ŵandu ŵakusiŵajogopa wawojo awujilesoni kwa une,Ŵandu ŵakusamanyilila yindu yakusatukumbusya.
80 Nguŵenda kuti mtima wangu ukuyeje malamusi gawo mwangalemwesya,Ni chakulinga chakuti yindu yakutesya sooni yikandendechela.
כ [Kaph]
81 Ngusachilila mnope* chikulupusyo chawo,Pakuŵa mbisile chembecheyo changu pa maloŵe gawo.*
82 Meso gangu gakusachilila kuyiwona yaŵaŵechete wawojo yili yikwanilichikwe.Une ngusati, “Ana chachitenda chakachi yindu yakundamika mtima pasi?”
83 Pakuŵa ndili mpela msaku walipende wawujumwile ni lyosi,Nambo malamusi gawo une jwangagaliŵalila.
84 Ana jwakutumichila jwawo ajembecheye kwa masiku galingwa wawojo mkanatendepo kandu?
Ana chachawelusya chakachi ŵandu ŵakusandagasya une?
85 Ŵandu ŵakulikwesya ŵakusaganyosya malamusi ga wawojoAmbukulile masimbo kuti ngwile.
86 Malamusi gawo gosope gali gakudalilichika.
Ŵandu akundagasya une pali pangali ligongo lililyose. Ngwaŵenda wawojo kuti angamuchisye.
87 Jemanjajo ŵasigele panandi kusimisya une pachilambo chapasi,Nambo une nganinayileka yakulamula ya wawojo.
88 Asunje une jwaumi ligongo lya chinonyelo chawo chakulupichika,Ni chakulinga chakuti nguyeje yakumbusya yaŵatusalile wawojo.
ל [Lamed]
89 Maloŵe gawo, wawo Yehofa,Gachitama kwinani mpaka kalakala.
90 Kukulupichika kwawo kuchitama ku mibado* josope.
Wawojo ŵachitamilikasisye chilambo chapasi mwakulimbangana, mwamti chichipitilisya kutama mpaka kalakala.
91 Ligongo lyakulamula kwawo, yindu yeleyi* yipalipe mpaka lelo,Pakuŵa yosope yaŵayipanganyisye yikusiyatumichila wawojo.
92 Yikaŵe kuti nganinaganonyelaga malamusi gawo,Ngaliji ndili njonasiche ligongo lya yipwetesi yanasimanaga nayo.
93 Une ngasindiŵalila yakulamula yawo,Ligongo kupitila mu yakulamula yawoyo, wawojo akusasungaga ni umi.
94 Une ndili jwawo. Angulupusye,Pakuŵa une nayisosilesosile yakulamula yawo.
95 Ŵakusakala akusaka kunjonanga,Nambo une ngusaganichisya mnope yindu yakusatukumbusya wawojo.
96 Une nayiweni kuti yindu yosope yayikusawoneka kuŵa yamlama yana malile gakwe,Nambo malamusi gawo gangali malile.*
מ [Mem]
97 Une ngusaganonyela mnope malamusi gawo.
Lisiku lililyose ngusaganichisya mnope* yakwamba malamusigo.
98 Malamusi gawo gakusandendekasya une kuŵa jwalunda kwapunda adani* ŵangu,Ligongo gali ni une mpaka kalakala.
99 Ngwete lunda lwakupikanichisya kugapunda matichala gangu gosope,Ligongo ngusaganichisya mnope* yakwamba yakumbusya yawo.
100 Ngusalosya kuti ndili jwakupikanichisya pakatende kangu ka yindu kwapunda achakulungwa.Yili myoyo ligongo ngusapikanila yakulamula yawo.
101 Ngusaŵambala kwenda palitala lililyose lyakusakala,Ni chakulinga chakuti sunjeje maloŵe gawo.
102 Ngangusasepuka ni kuleka kukuya yalamwile wawojo,Pakuŵa wawojo ni ŵanjiganyisye yeleyi.
103 Yakusaŵecheta wawojo yili yakulyolyopela mkamwa mwangu.Yili yakulyolyopela mnope mkamwa mwangu kupunda uchi.
104 Ngusaŵa jwakupikanichisya pakatende kangu ka yindu ligongo lya yakulamula yawo.
Ni ligongo lyakwe ngusaŵengana ni litala lililyose lyaunami.
נ [Nun]
105 Maloŵe gawo gali mpela nyali jakumulichila sajo syangu,Soni mpela lilanguka lyakumulichila litala lyangu.
106 Une nalumbile kuti chinjipikanilaga yakulamula yawo yachilungamo,Mwamti chinjikwanilisya yanalumbileyo.
107 Une ndagasiche mnope ni yipwetesi.
Wawo Yehofa, asunje une jwaumi mwakamulana ni maloŵe gawo.
108 Wawo Yehofa, chonde asangalale ni mbopesi syangu syakwachimbichisya* syangupeleka mwakusaka kwangu,Soni anjiganye une yakulamula yawo.
109 Ndaŵi syosope nguŵaga pangosi jakuti mpaka mbwe,*Nambope nganinagaliŵalila malamusi gawo.
110 Ŵakusakala andejele chakutega kuti ndanjile,Nambope une nganindeka kukuya yalamwile wawojo.
111 Yakumbusya yawo yili chipanje changu mpaka kalakala,Ligongo yindu yeleyi yikusatendekasya mtima wangu kuŵa wakusangalala.
112 Une simichisye mtima kupikanila* malamusi gawoNdaŵi syosope, mpaka chiwa changu.
ס [Samekh]
113 Une ngusaŵengana ni ŵandu ŵamitima jiŵili,*Nambo ngusaganonyela malamusi gawo.
114 Wawojo ali m’bulili wangu soni chakuchijila changu,Pakuŵa une mbisile chembecheyo changu pamaloŵe gawo.*
115 Mundyochele jemanja ŵandu ŵakusakala,Ni chakulinga chakuti mbitilisye kusunga malamusi ga Mlungu jwangu.
116 Angamuchisye mwakamulana ni chilanga chawo chaŵatesile.*Atende yeleyi ni chakulinga chakuti mbitilisye kutama ni umi.Akangamulikasya liganga* payindu yangwembecheya.
117 Angamuchisye ni chakulinga chakuti ngulupuche.Pelepo ndaŵi syosope chinjiganichisyaga yakwamba malamusi gawo.
118 Wawojo akusiŵakana ŵandu wosope ŵakusasepuka pamalamusi gawo,Pakuŵa jemanjajo ali ŵaunami soni ŵachinyengo.
119 Wawojo akusiŵajasa ŵakusakala wosope ŵapachilambo chapasi mpela mwampaka ajasile yindu yangasosekwa.
Ni ligongo lyakwe une ngusanonyela yindu yakusatukumbusya wawojo.
120 Chilu changu chikusatetemela ligongo lyakwajogopa wawojo.Une ngusajogopa kulamula kwawo.
ע [Ayin]
121 Une ndesile yindu yayili yakuŵajilwa soni yachilungamo.
Akandeka une mmyala mwa ŵandu ŵakundagasya.
122 Amsimichisye jwakutumichila jwawo kuti yindu chiyimjendeleje chenene paumi wakwe.Akakunda kuti mundu jwakulikwesya andagasye une.
123 Meso gangu gapesile ligongo lyakwembecheya chikulupusyo chawoSoni kwembecheya chilanga chawo chakudalilichika.*
124 Amlosye jwakutumichila jwawo chinonyelo chawo chakulupichika,Soni anjiganye malamusi gawo.
125 Une ndili jwakutumichila jwawo. Angamuchisye kuti mbe jwakupikanichisya yindu,Kuti ngombole kuyimanyilila yindu yakusatukumbusya wawojo.
126 Ndaŵi jakuti Yehofa atendepo kandu jikwanile,Pakuŵa jemanjajo akasile malamusi gawo.
127 Ni ligongo lyakwe ngusaganonyela mnope malamusi gawoKupunda golide, atamose golide jwambone mnope.*
128 Paligongo lyeleli, yakusasala wawojo ngusayiwona kuŵa yakuŵajilwa.*Ngusaŵengana ni litala lililyose lyaunami.
פ [Pe]
129 Yindu yakusatukumbusya wawojo yili yambone mnope.
Ni ligongo lyakwe ngusayikuya.
130 Maloŵe gawo pagalondesisye chenene, ŵandu akusakuwona kuŵala,Mwamti gakusamkamuchisya mundu jwangamanyilila yejinji kuŵa jwakupikanichisya yindu.
131 Ngusawugula mnope pakamwa pangu ni kupumasika,Ligongo lyakugasachilila malamusi gawo.
132 Agalawuchile kwa une soni andendele chanasa,Mwakamulana ni yalamwile wawojo kwa ŵandu ŵakusalinonyela lina lyawo.
133 Alongolele une ni maloŵe gawo kuti njendeje palitala lyangali chakogoya chilichose.*Akakunda chindu chilichose chakusakala kuti chindamulileje une.
134 Angulupusye* kwa ŵandu ŵakundagasya,Soni une chinjisunga yakusalamula wawojo.
135 Atende yakuti ngope jawo jimŵalile* jwakutumichila jwawo,Soni anjiganye malamusi gawo.
136 Misosi jikwamba kwendelela kutyochela m’meso mwangu mpela lusuloLigongo ŵandu ngakusunga malamusi gawo.
צ [Tsade]
137 Wawo Yehofa, wawojo ali ŵachilungamo,Soni kawelusye kawo kali kachilungamo.
138 Yindu yakusatukumbusya wawojo yili yachilungamoSoni yosope yili yakudalilichika.
139 Kulipeleka kwangu kwa wawojo kuli mpela moto wawukukolela mumtima mwangu,Ligongo adani ŵangu agaliŵalile maloŵe gawo.
140 Maloŵe gawo gali gakwenga chenene,Mwamti jwakutumichila jwawo akusaganonyela.
141 Ŵandu akusambona mpela jwangasosekwa soni jwakunyoseka.Nambo atamose yili myoyo, une nganindiŵalila yakusalamula wawojo.
142 Chilungamo chawo chichiŵe chitamile mpaka kalakala,Soni malamusi gawo gali gasyesyene.
143 Atamose yipwetesi soni yakusawusya yikusangwila une,Nambope ngusapitilisya kuganonyela mnope malamusi gawo.
144 Yindu yakusatukumbusya wawojo yichiŵa yachilungamo mpaka kalakala.
Angamuchisye kuti mbe jwakupikanichisya yindu ni chakulinga chakuti mbitilisye kutama ni umi.
ק [Qoph]
145 Ngusinaŵilanga wawojo ni mtima wosope. Anjanje, wawo Yehofa.
Malamusi gawo chinjigasunga.
146 Nguŵilanga pa wawojo. Angulupusye.
Une chinjisunga yindu yakusatukumbusya.
147 Njimwiche kundaŵi* kuti naŵende kuti angamuchisye,Pakuŵa mbisile chembecheyo changu pa maloŵe gawo.*
148 Ulonda uliwose wa chilo mkaniwumale ngusaŵa ndili njimwiche,Ni chakulinga chakuti nagaganichisye mnope* maloŵe gawo.
149 Apikane maloŵe gangu ligongo lya chinonyelo chawo chakulupichika.
Wawo Yehofa, asunje une jwaumi ligongo lya chilungamo chawo.
150 Ŵandu ŵakutenda ndamo jakutesya sooni* ali chiŵandika ni une.Jemanjaji atalikangene mnope ni malamusi gawo.
151 Wawo Yehofa, wawojo ali chiŵandika ni une,Soni malamusi gawo gosope gali gasyesyene.
152 Nalijiganyisye kalakala yakwamba yindu yakusatukumbusya wawojo.Nalijiganyisye kuti yakumbusya yawoyo ŵayiŵisile mwakulimbangana kuti yitame mpaka kalakala.
ר [Resh]
153 Alole yanguti pakulagasika soni angulupusye,Pakuŵa une nganinagaliŵalila malamusi gawo.
154 Anjenjele* soni angulupusye.Asunje une jwaumi mwakamulana ni chilanga chawo chaŵatesile.*
155 Chikulupusyo chili kwakutalikangana ni ŵakusakala,Ligongo jemanjajo nganatenda yakuti agasosesose malamusi gawo.
156 Chanasa chawo chili chekulungwa, wawo Yehofa.
Asunje une jwaumi mwakamulana ni chilungamo chawo.
157 Ŵandu ŵakundagasya soni adani ŵangu apali ŵajinji.Nambope une nganindeka kukuya yindu yakusatukumbusya wawojo.
158 Pangwawona ŵandu ŵachinyengo yikusasakalisya,Ligongo jemanjajo ŵangasunga maloŵe ga wawojo.
159 Alole yangusati pakuyinonyela yakusalamula wawojo.
Wawo Yehofa, asunje une jwaumi ligongo lya chinonyelo chawo chakulupichika.
160 Maloŵe gawo gosope gali gasyesyene,Soni yakulamula yawo yosope yachilungamo yichitama mpaka kalakala.
ש [Sin] kapena kuti [Shin]
161 Ŵakulamulila akundagasya une pali pangali ligongo,Nambope mtima wangu ukusagajogopa maloŵe gawo.
162 Ngusasangalala ni maloŵe gawoMpela mundu jwapatile chipanje chejinji.
163 Ngusaŵengana ni unami, ukusiwusakalisya kwabasi.Nambo ngusaganonyela malamusi gawo.
164 Wawojo ngusinachimbichisya ka 7 palisikuLigongo lya yakulamula yawo yachilungamo.
165 Ŵandu ŵakuganonyela malamusi gawo akusakola mtendele wejinji,Mwamti pangali chilichose champaka chakuŵasye.
166 Une ngwembecheya yakusatendaga wawojo pakulupusya, wawo Yehofa,Soni ngusapikanila malamusi gawo.
167 Ngusasunga yindu yakusatukumbusya wawojo,Mwamti ngusayinonyela mnope.
168 Ngusapikanila yindu yakusatulamula soni yakusatukumbusya,Pakuŵa wawojo akusamanyilila yosope yangusatenda.
ת [Taw]
169 Wawo Yehofa, apikane kulila kwangu kwakuŵenda kuti angamuchisye.
Kupitila m’maloŵe gawo, angamuchisye kuti mbe jwakupikanichisya yindu.
170 Nguŵenda kuti apikane kuŵenda kwangu kwakuti andendele chanasa.
Angulupusye mwakamulana ni chilanga chawo chaŵatesile.*
171 Ngomo syangu sisefuchile ni maloŵe gakwachimbichisya wawojo,Ligongo wawojo akusanjiganya une malamusi gawo.
172 Lulumi lwangu lujimbe yakwamba maloŵe gawo,Pakuŵa malamusi gawo gosope gali gachilungamo.
173 Nguŵenda kuti mkono wawo uŵe wakoseka kungamuchisya une,Ligongo nasagwile kuti mbikanileje yindu yakusatulamula wawojo.
174 Ngusachilila chikulupusyo chawo, wawo Yehofa,Soni ngusaganonyela mnope malamusi gawo.
175 Angunde une kutamape ni umi kuti nachimbichisye wawojo.Nguŵenda kuti yakulamula yawo yingamuchisyeje.
176 Une njasiche mpela ngondolo jesokonechele. Amsosesose jwakutumichila jwawo,Pakuŵa nganinagaliŵalila malamusi gawo.
Maloŵe Gamwiŵanda
^ Kapena kuti, “ŵakusajenda mwakulupichika.”
^ Kapena kuti, “chinjilijiganya.”
^ Ŵane akusati “kutapana; kutembelela.”
^ Mu Chihebeli ŵatiga, “Atutile kwakutalika ni une.”
^ Kapena kuti, “kulijiganya.”
^ Kapena kuti, “nalijiganye.”
^ Mu Chihebeli ŵatiga, “kupikanichisya litala lya.”
^ Kapena kuti, “kuti ndende sooni.”
^ Mu Chihebeli ŵatiga, “chinjipitilisya kuwutuka palitala lya.”
^ Kapena kuti, “akusandendekasya kuti mbe jwakulimba mtima.”
^ Kapena kuti, “kulipindulisya.”
^ Kapena kuti, “maloŵe gaŵaŵechete.”
^ Kagopolele kanesoni, “Chakusatenda ni ŵandu ŵakwajogopa wawojo.”
^ Kapena kuti, “mwakamulana ni maloŵe gawo.”
^ Kapena kuti, “m’malo gakutakasuka.”
^ Kapena kuti, “chinjilijiganya.”
^ Kapena kuti, “Akumbuchile chilanga chaŵatesile kwa.”
^ Kapena kuti, “wawojo ŵandendekasisye kuti nagajembecheyeje.”
^ Kapena kuti, “M’nyumba jilijose jandemi mpela mlendo.”
^ Kapena kuti, “Ngoloya ngope jawo.” (Ngulingalinga kuti ngope jawo jimwetulile une)
^ Kapena kuti, “ni maloŵe gawo gaŵaŵechete.”
^ Ŵane akusati “makawu.”
^ Kapena kuti, “nalemwesyaga mwangamanyilila.”
^ Mu Chihebeli ŵatiga, “jangapikana chilichose mpela mugaŵelele mawuta.”
^ Kapena kuti, “Pakuŵa ngusajembecheya pa maloŵe gawo.”
^ Kapena kuti, “Mwakamulana ni maloŵe gawo gaŵaŵechete.”
^ Kagopolele kanesoni, “akusandendela yachabe mwakumbechetela yamabosa.”
^ Kapena kuti, “chinjilijiganya.”
^ Kapena kuti, “Pakuŵa ngusajembecheya yaŵasasile wawojo.”
^ Kapena kuti, “Umi wangu umasile ligongo lyakusachilila mnope.”
^ Ŵane akusati “mipago.”
^ Pelepa akwamba yindu yaŵapanganyisye Mlungu.
^ Mu Chihebeli ŵatiga, “gakusakamula mbali syosope.”
^ Kapena kuti, “ngusalijiganya.”
^ Ŵane akusati “achimmagongo.”
^ Kapena kuti, “ngusalijiganya.”
^ Mu Chihebeli ŵatiga, “mbopesi syapakamwa pangu.”
^ Kapena kuti, “Umi wangu ukuŵaga mmyala mwangu ndaŵi syosope.”
^ Mu Chihebeli ŵatiga, “Mtima wangu ujegamile pakupikanila.”
^ Kapena kuti, “ŵandu ŵamitima jegaŵikangane.”
^ Kapena kuti, “Pakuŵa ngusajembecheya yaŵasasile wawojo.”
^ Kapena kuti, “mwakamulana ni maloŵe gaŵaŵechete wawojo.”
^ Kapena kuti, “Akandesya sooni.”
^ Kapena kuti, “kwembecheya maloŵe gawo gakudalilichika.”
^ Kapena kuti, “atamose golide jwakwenga chenene.”
^ Kapena kuti, “yiliyose yakusalamula wawojo ngusayiwona kuŵa yakuŵajilwa.”
^ Kapena kuti, “kuti njendeje mwangapepeluka.”
^ Mu Chihebeli ŵatiga, “Awombole.”
^ Kapena kuti, “jimmwetulile.”
^ Kapena kuti, “Pakuŵa ngusajembecheya yaŵasasile wawojo.”
^ Kapena kuti, “kundaŵi lyuŵa lili lisigele panandi kukopoka.”
^ Kapena kuti, “nalijiganye.”
^ Kapena kuti, “ndamo jakunyalaya.”
^ Kapena kuti, “Anjimile pamagambo gangu.”
^ Kapena kuti, “mwakamulana ni maloŵe gawo gaŵaŵechete.”
^ Kapena kuti, “mwakamulana ni maloŵe gaŵaŵechete wawojo.”
