Masalimo 118:1-29
118 Amyamichile Yehofa, pakuŵa jwalakwe ali jwambone.Chinonyelo chakwe chakulupichika chichitama mpaka kalakala.
2 Jemanja Ayisalayeli mŵechete kuti:
“Chinonyelo chakwe chakulupichika chichitama mpaka kalakala.”
3 Jemanja ŵa m’nyumba ja Aloni mŵechete kuti:
“Chinonyelo chakwe chakulupichika chichitama mpaka kalakala.”
4 Jemanja wosope ŵamkusamjogopa Yehofa mŵechete kuti:
“Chinonyelo chakwe chakulupichika chichitama mpaka kalakala.”
5 Naŵilasile pa Ya* panaliji mu yipwetesi.Ya ŵanjanjile, mwamti ŵanjigele ni kumbika pamalo gambone gangali chakogoya chilichose.*
6 Yehofa ali kumbali jangu. Ngasindenda woga.
Ana mundu mpaka andende chichi?
7 Yehofa ali kumbali jangu mpela jwakungamuchisya.*Une chinjawona ŵandu ŵakuŵengana ni une ali agomechedwe.
8 Kuli kwambone kutilila kwa YehofaKulekangana ni kwadalila ŵandu.
9 Kuli kwambone kutilila kwa YehofaKulekangana ni kwadalila ŵakulongolela.
10 Mitundu josope ja ŵandu jasyungulile une,Nambo mu lina lya Yehofa,Najitutile.
11 Mitundujo jasyungulile une, elo, jasyungulile kumbali syosope,Nambo mu lina lya Yehofa,Najitutile.
12 Jasyungulile une mpela nyuchi,Nambo jasimile mwachitemachitema mpela moto paliwukutu lya miŵa.
Mu lina lya Yehofa,Najitutile.
13 Ŵandutile une mwamachili* kuti ngwe pasi,Nambo Yehofa ŵangamuchisye.
14 Ya ali m’bulili wangu soni machili gangu,Mwamti aŵele jwakungulupusya.
15 M’matenti ga ŵandu ŵakulungamaMukusapikanika kugumila kwakwika ligongo lyakusangalala soni chikulupusyo.*
Mkono wamlyo wa Yehofa ukulosya machili gakwe.
16 Mkono wamlyo wa Yehofa awukwesisye mwinani pakulosya kuti awinile.Mkono wamlyo wa Yehofa ukulosya machili gakwe.
17 Une ngangusaka kuwa amta panandi, ngusaka kupitilisya kutama ni umiKuti wandisyeje yakwamba masengo ga Ya.
18 Ya ŵanjamwiche une mwamachili,Nambo nganambeleka ku chiwa.
19 Ambugulile mageti ga chilungamo.Une chinjijinjila pamagetigo ni kumchimbichisya Ya.
20 Aji jili geti ja Yehofa.
Ŵandu ŵakulungama chachijinjila pagetiji.
21 Une chinjachimbichisya wawojo, pakuŵa ŵanjanjile uneSoni ŵaŵele ŵakungulupusya.
22 Liganga lyaŵalikanile ŵakutaŵa nyumbaLiŵele liganga lyakusosekwa mnope lyapakona.*
23 Liganga lyeleli lityochele kwa Yehofa.Soni lili lyakusalala mnope m’meso mwetu.
24 Lyeleli ni lisiku lyatamilikasisye Yehofa.Tuchisangalala soni tuchipochela palisikuli.
25 Wawo Yehofa, chonde atukulupusye, tukwaŵenda!
Wawo Yehofa, chonde atukamuchisye kuti tupunde!
26 Jwana upile mundu jwakwika mu lina lya Yehofa.Kutyochela ku nyumba ja Yehofa, m’weji tukumsosela upile jemanja ŵakutumichila ŵakwe.
27 Yehofa ali Mlungu.Jwalakwejo ni jwakusatupa lilanguka.
Ajigale nyambi sya yitela mmyala mwawo ni kulongana ni gulu jajikwenda pakutenda chisangalalo,Mpaka akayiche pamalo gakupelechela mbopesi gakola misengo.
28 Wawojo ali Mlungu jwangu, soni une chinjachimbichisya wawojo.Wawo Mlungu jwangu, une chinjakwesya wawojo.
29 Amyamichile Yehofa, pakuŵa jwalakwe ali jwambone.Chinonyelo chakwe chakulupichika chichitama mpaka kalakala.
Maloŵe Gamwiŵanda
^ “Ya” kali kasale kakata ka lina lyakuti Yehofa.
^ Kapena kuti, “pamalo gakutakasuka.”
^ Kagopolele kanesoni, “ali kumbali jangu pampepe ni ŵandu ŵakungamuchisya.”
^ Kagopolele kanesoni, “Wawojo ŵandutile mwamachili.”
^ Kapena kuti, “soni kuwina ngondo.”
^ Kapena kuti, “lyapandumba.” Mu Chihebeli ŵatiga, “Liŵele mtwe wakona.” Liganga lyeleli ŵalikamulichisyaga masengo pakulumbikanya mapupa gaŵili ga nyumba kuti galimbe mnope, mwamti ŵaliŵikaga pakona penani pa mapupago.
