Masalimo 109:1-31
Kwa jwakulongolela nyimbo. Nyimbo ja Daudi.
109 Wawo Mlungu jwangusinamchimbichisya, akagamba kutama jii ngatenda kandu.
2 Pakuŵa ŵandu ŵakusakala soni ŵachinyengo awugwile pakamwa pawo kuti alimbane ni une.
Jemanjajo akusaŵecheta yaunami yakwamba une ni malulumi gawo.
3 Wosope ŵasyungulile une akumbechetela maloŵe gakupweteka,Mwamti akusanjimuchila pali pangali ligongo lililyose.
4 Une pangwanonyela, jemanjajo akusanjimba magambo.Nambo ngusagambaga kupopela kwa wawojo.
5 Akusambuchisya yindu yakusakala pa yindu yambone yangusatenda,Soni pachinonyelo changusinalosya, akusambuchisya uŵengani.
6 Nguŵenda kuti apate mundu jwakusakala kuti am’welusye mdani* jwangu.Soni nguŵenda kuti mundu jwakusisya* ajime kumkono wakwe wamlyo kuti amjimbe magambo jwalakwejo.
7 Mundu jwelejo pakwimbidwa magambo amsimane kuti ali jwakulemwa.*Nguŵenda kuti atamose lipopelo lyakwe wawojo aliwoneje kuŵa chindu chakunyalaya.*
8 Nguŵenda kuti masiku ga umi wakwe agajipiye,Soni udindo wakwe mpela jwakulolela awujigale mundu jwine.
9 Nguŵenda kuti ŵanache ŵakwe* aŵe ŵamasije,*Nombenawo ŵamkwakwe aŵesoni ŵamasije.
10 Ŵanache ŵakwe* ajendeje aku nakuku ali mkuŵendaŵenda.Jemanjajo asosejesoseje yakulya ali mkutyochela m’majumba gawo gepasuche.
11 Mundu juŵamkongwesye jwalakwejo yindu, ayiche ni kumsumula yosope yakwete.*Soni ŵandu ŵachilendo amsumule jwalakwejo chipanje chakwe chosope.
12 Pakasimanikwa mundu jwalijose jwakumtendela chanasa* jwalakwejo,Soni pakasimanikwa jwalijose jwakwatendela yambone ŵanache ŵakwe ŵamasije.
13 Yisukulu yakwe yiwulajidwe,Soni lina lyawo limale kuti likapikanika mu m’bado* wakuyichisya.
14 Nguŵenda kuti Yehofa apitilisye kuyikumbuchila yakulemwa ya achinangolo ŵakwe,Soni ulemwa wa mamagwe ukasimasika.
15 Nguŵenda kuti Yehofa ndaŵi syosope akumbuchileje yatesile jemanjaji,Soni atende yakuti jemanjaji akasakumbuchilidwasoni pachilambo chapasi.
16 Amtende yeleyo ligongo jwalakwe nganaganichisyaga yakuti ŵatendele chanasa ŵane,*Nambo ŵatamilaga kumkuyakuya mundu jwakulagasika, jwakulaga soni jwamkasiche mtimaNi chakulinga chakuti amwulaje.
17 Ŵanonyelaga kwatembelela ŵane, myoyo matembelelo gagogo gamwujile.Nganasakaga kwapa upile ŵane, myoyo jwalakwejosoni nganapochela upile.
18 Kwatembelela ŵane kwaliji mpela chakuwala chakwe chaŵawalaga.
Myoyo matembelelo gakwepego ŵamkusulile pachilu pakwe mpela akumkusulila mesi,Mwamti gajinjile mpaka m’mawupa gakwe mpela mwagakusatendela mawuta.
19 Nguŵenda kuti matembelelo gakwego gaŵe mpela chakuwala chaliŵijilile jika,Soni gaŵe mpela lamba jwakusawalaga ndaŵi syosope.
20 Gelega ni malipilo gakusapeleka Yehofa kwa mundu jwakusisyana ni une,Soni kwa wosope ŵakusaŵecheta yakusakala yakwamba une.
21 Nambo wawo Yehofa, Ambuje Ŵakulungwa Mnope,Atende yindu yambone kwa une ligongo lya lina lyawo.
Angulupusye ligongo chinonyelo chawo chakulupichika chili chambone.
22 Pakuŵa une jwangali jwakungamuchisya soni ndili jwakulaga,Nambosoni ngupikana mpela mtima wangu awusomile.
23 Unetu ngumala basi mpela kusimililika kwa chiwulili.Mpela lusombe lwakulupatila pasi, unesoni ambatile.
24 Malungo gakutetemela ligongo lyangalya.Chilu changu chigandile soni ngumala.*
25 Mbele chindu chakuti jemanjajo atamileje kuchinyosya.
Pambweni une, akusapukunya mitwe jawo.
26 Angamuchisye, wawo Yehofa Mlungu jwangu.Angulupusye ligongo lya chinonyelo chawo chakulupichika.
27 Jemanjajo amanyilile kuti yeleyi yitendekwe ni mkono wawo.Elo, amanyilile kuti wawojo Yehofa ni ŵatesile yindu yeleyi.
28 Ŵaleche jemanjajo atembeleleje, nambo une ngwaŵenda wawojo kuti ambeje upile.
Jemanjajo panjimuchile une, wawojo ŵatesyeje sooni,Amkunde kuti jwakutumichila jwawo asangalaleje.
29 Nguŵenda kuti ŵandu wosope ŵakulimbana ni une ŵaweche sooni.Elo, ŵaweche sooni mpela mkanjo.*
30 Pakamwa pangu pachimchimbichisya Yehofa mwangalechesya.Chinjimchimbichisya jwalakwejo pameso pa ŵandu ŵajinji.
31 Pakuŵa jwalakwejo chachijima kumkono wamlyo wa mundu jwakulagaKuti amkulupusye kwa ŵandu ŵakumjimba magambo.
Maloŵe Gamwiŵanda
^ Ŵane akusati “mmagongo.”
^ Kapena kuti, “mundu jwakumjimba magambo mjakwe.”
^ Kapena kuti, “ali jwakusakala.”
^ Mu Chihebeli ŵatiga, “aliwoneje kuŵa ulemwa.”
^ Mu Chihebeli ŵatiga, “ŵanache ŵakwe ŵachalume.”
^ Mu Chihebeli ŵatiga, “ŵangali baba ŵawo.”
^ Mu Chihebeli ŵatiga, “Ŵanache ŵakwe ŵachalume.”
^ Kapena kuti, “Mundu juŵamkongwesye jwalakwejo mwakatapila amteje kuti ajigale yindu yosope yakwete.”
^ Kapena kuti, “jwakumlosya chinonyelo chakulupichika.”
^ Ŵane akusati “mpago.”
^ Kapena kuti, “yakuti ŵalosye ŵane chinonyelo chakulupichika.”
^ Mu Chihebeli ŵatiga, “Chilu changu chigandile soni changali mawuta.”
^ Kapena kuti, “malaja gangali makono.”
