Masalimo 107:1-43
-
Amyamichile Mlungu ligongo lya masengo gakwe gakusimonjesya
107 Amyamichile Yehofa, pakuŵa jwalakwe ali jwambone.Chinonyelo chakwe chakulupichika chichitama mpaka kalakala.
2 Ŵandu wosope ŵaŵawombwele* Yehofa aŵecheteje yeleyi,Ŵandu ŵele ŵaŵawombwele jwalakwejo mmyala mwa* mdani.*
3 Jwalakwe ŵasongangenye pampepe ŵandu ŵeleŵa kutyochela ku yilambo yine,Kutyochela kungopokolyuŵa soni kungapililolyuŵa,Kutyochela kumpoto soni kummwela.
4 Jemanjajo ŵajendaga aku nakuku m’chipululu, m’chilambo changatama ŵandu.Jemanjajo nganapata litala lililyose lyakwinjilila mumsinda wakuti akatameje.
5 Jemanjajo jakwete sala nambosoni njota.Ŵafoweche ligongo lyakupela.
6 Pandaŵi jaŵasimanaga ni yipwetesi ŵamlililaga Yehofa kuti ŵakamuchisye,Mwamti jwalakwe ŵakulupwisye mu yipwetesi yawoyo.
7 Jwalakwe ŵalongolelaga litala lyakuŵajilwa lyakuti ajendejeKuti akayiche ku msinda waŵasosekwaga kuti akatameje.
8 Ŵandu wosope amyamichile Yehofa ligongo lya chinonyelo chakwe chakulupichikaSoni ligongo lya masengo gakwe gakusimonjesya gakusiŵatendela ŵanache ŵa ŵandu.
9 Jwalakwe ampele mesi mundu jwa njotaSoni mundu jwasala amjikutisye ni yindu yambone.
10 Papali ŵandu ŵane ŵatamaga m’malo ga chipi mnope.Ŵaliji achikayidi ŵaŵalagasikaga ali ŵataŵile maunyolo.
11 Pakuŵa jemanjajo nganapikanila maloŵe ga Mlungu.Jemanjajo nganachimbichisya yaŵalamwile Jwakwinani Mnopejo.
12 Myoyo jwalakwe, kupitila mu yipwetesi, ŵatendekasisye kuti mitima jawo jiŵe jakulinandiya.Jemanjajo ŵakuŵele ni kugwa, mwamti nganipapatikana jwalijose jwakwakamuchisya.
13 Pandaŵi jaŵasimanaga ni yipwetesi, ŵaŵilasile pa Yehofa kuti ŵakamuchisye,Mwamti jwalakwe ŵakulupwisye mu yipwetesi yawoyo.
14 Jwalakwe ŵakopwesye jemanjajo m’malo ga chipi mnope,Soni jwalakwe ŵakutulenye maunyolo gawo gaŵataŵile jemanjajo.
15 Ŵandu wosope amyamichile Yehofa ligongo lya chinonyelo chakwe chakulupichikaSoni ligongo lya masengo gakwe gakusimonjesya gakusiŵatendela ŵanache ŵa ŵandu.
16 Pakuŵa jwalakwe atemangwile matanga ga chisyano cha kopaSoni akatenyekatenye yakuwugalila yachisyano.
17 Jemanjajo ŵatesile yindu mwakuloŵela mwamti ŵalagasiche ni yipwetesiLigongo lya yakulemwa yawo soni yitendo yawo yakusakala.
18 Nganasakaga kulya chakulya* chine chilichose.Jemanjajo ŵaliji chiŵandika ni mlango wa chiwa.
19 Pandaŵi jaŵasimanaga ni yipwetesi ŵaŵilangaga pa Yehofa kuti ŵakamuchisye,Mwamti jwalakwe ŵakulupusyaga mu yipwetesi yawoyo.
20 Jwalakwe ŵatumisyaga maloŵe gakwe mwamti gaposyaga jemanjajoSoni gakulupusyaga jemanjajo m’masimbo gaŵagwilile.
21 Ŵandu wosope amyamichile Yehofa ligongo lya chinonyelo chakwe chakulupichikaSoni ligongo lya masengo gakwe gakusimonjesya gakusiŵatendela ŵanache ŵa ŵandu.
22 Jemanjajo ampe jwalakwejo mbopesi syakuyamichilaSoni awandisye yakwamba masengo gakwe ali mkugumila mwakusangalala.
23 Ŵandu ŵakusajenda m’masitima panyasa,Ŵele ŵakusatenda malonda gawo kupitila pa nyasa syekulungwa,
24 Agaweni masengo ga YehofaSoni ayiweni yindu yakwe yakusimonjesya yaŵayipangayisye m’nyasa.
25 Soni ajiweni mbungo jamachili jili mkupuga panyasapo ligongo lya maloŵe gakwe,Soni jili mkutendekasya kuti panyasapo paŵe matumbela.
26 Matumbelago gakusiganyakula jemanjajo mwinaniNi kwaponyasoni pasikati pa nyasajo.
Mitima jawo jikusasungunukuka ligongo lya yakusawusya yakwembecheya kusimana nayo.
27 Ŵakwendesya sitimawo akusatenda lusyungusyungu ni kupepeluka mpela mundu jwamkolelwe,Mwamti lunda losope lwakwete pamasengo gawogo lwangakamuchisya.
28 Kaneko akusamlilila Yehofa kuti ŵakamuchisye ligongo lya yipwetesi yasimene nayoyo,Mwamti jwalakwejo akusiŵakulupusya mu yipwetesi yawoyo.
29 Jwalakwe akusajilekasya mbungo jamachilijo.Pelepo nyasa jikusatenda bata mwamti matumbelago gakusaleka.
30 Nyasajo pajitesile bata, jemanjajo akusasangalala,Mwamti jwalakwe akusiŵalongolela jemanjajo kuti akayiche ku chiko chaŵachisakaga.
31 Ŵandu wosope amyamichile Yehofa ligongo lya chinonyelo chakwe chakulupichikaSoni ligongo lya masengo gakwe gakusimonjesya gakusiŵatendela ŵanache ŵa ŵandu.
32 Amchimbichisye jwalakwejo pasikati pa mpingo wa ŵandu,Soni amkwesye jwalakwejo pasikati pa msongano wa* achakulungwa.
33 Jwalakwe akusasijumusya sulo ni kuŵa chipululu,Soni pamalo pagali mesi gejinji akusapachenga ni kuŵa pejumu.
34 Malo gachajila akusagachenga ni kuŵa malo ganjete soni gangali chajila.Jwalakwe akusayitenda yosopeyi ligongo lya yitendo yakusakala ya ŵandu ŵakutama pamalopo.
35 Jwalakwe akusachichenga chipululu ni kuŵa matanda ga mesi gakola yakumela,Soni malo gejumu ni kuŵa malo gakola mesi gejinji.
36 Jwalakwe akusiŵajigala ŵandu ŵasala ni kwatamika kweleko,Ni chakulinga chakuti kweleko ataŵe msinda wakuti atameje.
37 Jemanjajo akusapanda mbeju m’migunda jawo soni akusalima migunda ja mipeleya*Mwamti migundajo jikusasogola yindu yejinji.
38 Jwalakwe akusiŵapa upile jemanjajo mwamti akusatupa mnope.Jwalakwe ŵangakunda kuti ng’ombe syawo simale.
39 Nambo kaneko akusaŵasoni ŵamnono soni akusaŵa ŵasooniLigongo lya kulagasidwa, yakusawusya, soni yipwetesi yayagwilile.
40 Jwalakwe akusiŵatesya sooni ŵandu ŵakuchimbichikaSoni akusiŵatendekasya jemanjaji kwendajenda m’chipululu mwanganimukola matala.
41 Nambo jwalakwe akusiŵachenjela* ŵandu ŵakulaga ligongo lyakulagasidwa.Soni maŵasa gawo akusagatupiya ni kuŵa gejinji mpela gulu ja ngondolo.
42 Ŵandu ŵagoloka mtima akusayiwona yeleyi soni akusasangalala.Nambo ŵandu wosope ŵangalungama akusawugala pakamwa pawo.
43 Jwalijose jwali jwalunda chachimanyilila yindu yeleyiSoni chachiganichisya mnope yakusatenda Yehofa pakulosya chinonyelo chakwe chakulupichika.
Maloŵe Gamwiŵanda
^ Kapena kuti, “ŵaŵasumile.”
^ Kapena kuti, “kumachili ga”
^ Ŵane akusati “mmagongo.”
^ Kapena kuti, “Umi wawo wanyalayidwaga ni.”
^ Mu Chihebeli ŵatiga, “pasikati pa mipando ja.”
^ Mipeleya jili mtundu winewakwe wa yisogosi yakusayikamulichisya masengo pakupanganya finyo.
^ Kapena kuti, “akusiŵaŵika penani,” kugopolela kuti malo gakuti mundu nganaŵa ŵasimene.
